Read Khiamniungan Naga Isa 66 Bible Online

Isa 66 - Khiamniungan Naga bible

Isa 66

¹APAOU nou ngioji, “Aün nou jü noikham, naiuso goum nou jühok ngamluttsün. Nungaito asamüh Ngo hau ti in tsamli lahsane, naiuso asamüh Ngo kih au athang ti in khekkü shane?

²Anoitsün athum Ngü jüpemüh seitho! Sauhai abülom tsünoi, mong phoklekü noin, Ngo lon hatkü jüngio angji; Ngü ngüso da monglingji.

³“Khaiuniahoi nou ngüso mong- chiotsün chhiji. Ngüsoüh jangtso- pong tsak loatkü chaithio kiutsün nung tsaklu; ngüsoüh onnemokthso tsak chaithio kiu lüko, tsüdekünai jii tsak sang longek lüko; ngüsoüh khü- lam chaithio kiu lüko, tsüdekünai yah she chaithio kiu lüko, ngüsoüh angannyamtsün chaithio kiu lüko, tsüdekünai sotsom tsak tü misao sao lüko, ngüso amkham achinyan saisile nai monglingji.

⁴Nungtiphe ngüso ti sübao tü hatji nung akuothe ngü ngüso khako kankü shi-e, tiautenai Ngü jontsün taoko sauüh tsüthala, tsüdekünai Ngü wetsün taoko sauüh tsü-anglu. Ngüsoüh Ngo tü tsü-angau naiuso tsümeikün chhiau cholouji.”

⁵Asam Apa lon hattsünso naiuso apa ngio angtsünso, APAOU nou ti ngioji nung anglu: “Asam Ngo ko mongkiu nou shioko, asam khaiunia- soteng ajantsoüh asam chinyanji, lüko asam tü ti chhiau tsüshio-e. Ngüsoüh asam lochikü ngioji, ‘Samüh asam monglingtsün epau,’ APAOU nou asong asam hau hanküta asam lükipsan!’

⁶Noknio nai sang asong ngem nou tü anglu! Nung Amkham tsam nai ngemji, nung apa ehso lohattsün APAOU sang nou noin!

⁷“Jü asio Noknio nungto nyiuhai tsaküh methso chet taoko alekta chetkiutsün tsak khekkü noin.

⁸Khaiunia ajantsoüh nungtin chhisiya thaiutha epkü tsüdekünai lulakü noimo? Mele tsak ajepek tsak mongko chetji süne? Mele nou mochetkiukün khako, Zion nung laiukü tsü omhe-e.

⁹Jü khaiuniaso achetau atao tü thalutkü nialoukü shiküta tsüchite-i-e ta layang.” Nung APAOU nou ngiowaniu.

¹⁰Asam nung noknio tsüojintsünso chikü Yirusalem ko lümonglinge; apa ko monglingkü lünoi! Asam apa thaiutha mongsaiutsünso chikü lo apako lümonglinge!

¹¹Methso tsak meshen nyiu nyao tü monglingattsün khekkü asam apa ün atsüomei nouko monglinge.

¹²APAOU nou ngioji, “Tilai tsü-aplüshikü asaita tsangkü noitsün haiumong tsak khekkü, Ngü mele nouso atsüomei asam dongai kankü shi-e. Nungko atsüojin nou kongnai lokkü meshen nyiu tsangkü paotsangtsün methso tsak khekkü nung asam noi-e.

¹³Nyiu tsaküh meshen thso hau aalou-itsün khekkü Ngü asam Yirusalem nai aalou-i-e.

¹⁴Tilai asamüh nung thawaotsün eppe, asam monglinge, nungüh asam kongkü naiuso ameilei iula-i-e. Nungai asamüh Ngo, APAOU sauüh jüngio angji, ngüso hachuji naiuso jü ehso thako jü amongmat ngü hanji ta nge-e.”

¹⁵APAOU nou in hakü shi-e. Apa mongmattsünso hau angja kiuau Apa ah-ou-ahsheih tsak chiai moknoikü shi-e.

¹⁶Sauhai aphio epsane, nung goumchi khaiunia chikü hau in naiuso sah tsangkü apaüh angja kiu-e naiuso khaiunia piakü loatkü wane.

¹⁷APAOU nou ngioji, “Sauhaiüh paisilung amkhamau thaiutha meshen chija losiolouji, naiuso asio aimong nai sauhai sonthsa khukü napji, naiuso sauhaiüh yahnyih naiuso sao naiuso amao achinyan chihsikhiam heshiuji, ngüso thaiutha athon nou shimkü noin.

¹⁸Ngü ngüso mongyang naiuso ngüso chhisiya nouso ngeji. Mele chikü ün khaiuniahoi chikü kamshiau Ngo shiji. Tilai ngüso aikü kamshi-e, ngüsoüh jü oukong nou ti chhiau shioji nung eppe,

¹⁹naiuso ngüso hau angja kiutsün tsak nou Ngo noin ta ngüsoüh nge-e. “Lüko Ngo ngüso ajantso poitaiu küta jü niansong molulakünso tsüdekünai jü asong nou si oukong nou mo-epkünso mele- Spain, Libia, naiuso Lidia hai dongai uokop montsün khaiuniahoi hakü, naiuso Tubal naiuso Greece mele nouso naiuso laiukü jettekü noitsün goumchi nouso ai honge. Nung mele nouso ongko ngüsoüh jü asong nou welut-e.

²⁰Ngüsoüh agoumchi khaiuniahoi mele nouso ainou paopei tsakli kankü shi-e. Israelhaiüh chio asio nouko Amkham Tsam mongai khülam chaithio nouso kantsünli, khaiuniahoi nousoüh jü asio king Yirusalem nai mokthso chiai, mokthso asangh nou chiai, ut nouso chiai, naiuso mokthso nou kankeitsün tsamkei nousoko asio nai kankü shi-e.

²¹Ngü ngüso ongko ajantso meson au naiuso ajantso Levi hoi hau shane.

²²“Goumchi ayan naiuso aün ayan nouso jü-oukong tsangkü noitsünli, athsaosithsoso naiuso anian tsülaokü noi-e.

²³Alei Yan Sümai naiuso Yihuda Anonyi pungkü nouko mele pungkü ün khaiuniahoi Ngo tü amkhamau nungko Yirusalem nai shi-e;” ta APAOU nou ngioji.

²⁴“Ngüsoüh tsaloukü khu taoko, ngüsoüh jü thako khengshitsün ee mea nouso eppe. Nungko ngüso he-antsün song nouso tilaitso tsü-e-e, naiuso ngüso chethetsün in nou tilaitso tsünyate. Khaiunia chikü khako ngüso a-epao atsaoteng tsak noi-e.”