Read Khiamniungan Naga Isa 7 Bible Online

Isa 7 - Khiamniungan Naga bible

Isa 7

¹Uzzia thsao naiuso Jothan thso Ahaz Nokpaoüh Yihuda nai nokshingkü noitsün tao ehli tsak sungh. Nung ehli nouko Siriahai nokpao Resin, naiuso Israel hai nokpao Remalia thso Peka neüh Yirusalem kumlüko nung thalouau tsüshio.

²Tilai Siriahai süpaihoi nouso Yihuda nai shinappaniu ta ngiongem nou Yihuda hai nokpao shingoin, apa naiuso apa khaiuniaso chikü ahsheih nou paita saiutsünli ngaongaokü thsüokü hatat.

³APAOU nou Isaia tü ngiom, “Athso Shear Jashub nialouküta khukü Ahaz nokpao ko lüphete. Ni apa neshe shantsünso yamko asungthon temkhao ainou saotsün khiamyam athon nai eppe.

⁴Apa tü hattatkü naiuso yangelatkü tsüdekü thsü- monkü noiau lüngio. Nokpao Resin, Siria hai, naiuso Nokpao Peka amongmat nungto pailai nime ai inkhao sungtsün tü tsaokü tsüde.

⁵Israel nokpao ko Seria haiüh tsümeikün mongthat that.

⁶Ngüsoüh khaiuniahoi nouso loatküta ngüso dongai halutikü hau Yihuda komao ayang noiküla, küta Tabel thso nokpao noikham nai noi-iau noiküla.

⁷“Lüko ngo, APAOU nou nung tilaitso tsüthawao-e ta ngioji.

⁸Tiau- tenai Siria nung apa noknio ateng Damaska ta oukongkü tsüde; naiuso Damaska nung nokpao Resin chiai oukong tsüde. Israel thaiutha to pon aoluokkü pungo mongko mele tsak ta noi-au to thatü achek noi-e.

⁹Noknio ateng Samaria chiai Israel oukong tsüde naiuso Nokpao Peka chiai Samaria nung oukong tsüde. “Asam amonglam tsükongkünai, asamüh kiplouau tsüshio-e.”

¹⁰APAOU nou Ahaz dongai amao ngiongem tsak hongshikü ngiom,

¹¹“Ni APAOU a Goa tü ni hau ii tsak kiuau lüsang. Nungto eantsün athang akheiting goumchi ainou tsüdekünai aün atsok ainou tha au shiom.”

¹²Ahazüh thalakü ngiom, “Ngo ii thaiutha tsüsange. Ngo APAOU tsülilu-e.”

¹³Nungtü Isaiaüh thashi, “Anglu lo, Nokpao David thsaosithsoso khaiu- nia mongaulaiu shila-itsün nungüh saiuwane, Goa mongau lüko shila-e süne?

¹⁴Nungaito, APAOU nou apa chija asam hau ii tsak kiu-e: asang- ting menyiuthso tsak pem tsükengkü iulaküta melothso tsak chetkiu-e naiuso apa nian Immanuel ta niane.

¹⁵Apa athe amei singluau monkü sungküta, khaiuniahoi nou jangnyao naiuso liukhiam shiu-e.

¹⁶Methso nou athe si amei ngeau atao mosaokün khako lüko nung nokpao nime sauhaiüh ni lekkatikü noiküla ngüso gohthang aodangkü leane.

¹⁷“APAOU nou akhaiuniaso khako, akhako, naiuso nokpao tsamkhaiu athum khako Yihuda ainou Israel nokshing janthatkü khutsün ajekhaiu ainou moshitengkü noitsün angja atsaoting ajekhaiu nouso kankü shiji tiautenai apaüh Asiriahai nokpao kankü shiau noin.

¹⁸“Tilai nung atao shi-e, APAOU nou Nile haiutsong alaiuting ainou Ijip hai chinyi khekkü shi-iau ajon- kamtsün ii tsak kiu-e, naiuso Asiria- hai ngüso goumchi ainou noumhoi khekkü shiau kiu-e.

¹⁹Ngüsoüh lungkap tsamei nouso tsappokkü meanlou-e naiuso lungken nouso mean-e, naiuso ngüsoüh tsaopai naiuso khengliu pungkü chiai hükü meanlowane.

²⁰“Tilai nung tao shi-e, APAOU nou Eufrates haiu chiai noitsün Asiria hai nokpao khaiu iuwan kiutsün tsak kankü shi-e! Küta apaüh asunpon, akhaiuo, naiuso achongmai apem iuwane.

²¹“Tilai nung atao shi-e, eiu-ai khaiunia tsaküh jangtso thso tsak naiuso won nime talu poilou lüko,

²²ngüsoüh anyao piakü kiu-e küta nungüh apa apotsün chikü eppe. Ah, nung goumchi nai thsaothsaokü poi- santsünsoüh nyao naiuso liukhiam nou shiu-e.

²³“Tilai nung atao shi-e, sainaoshep eiu amei nouso sainao pungkü heng ta noi-e naiuso sai- naoshep pungkü tangkason heng mai noitsün tsaopai naiuso paidongau iula-e.

²⁴Khaiuniahoi nou nungai uokop pai si chon nouso hakü liuhom khu-e. Tiautenai nung goumchi athum paidong naiuso tsaopai jije nou miankü noi-e.

²⁵Chihsam khiamsam sungtsün king nouso apem sau khuau tsüshiokü tsao nou miankü noi-e. Nung jangtso naiuso onnemok khetsün athang tsak iula-e.”