Read Khiamniungan Naga Isa 8 Bible Online

Isa 8 - Khiamniungan Naga bible

Isa 8

¹APAOU nou ngü tü ngiom, “Lungkhio asong tsak alou naiuso nung da thsamsat asong nou nungti lüsat: ‘Shakta lüyanhean, khaolaokü Lüyanhean’.

²Nung mitha theau monglamkü noitsün meson Oria naiuso Jeberekia thso Zekaria nung khaiunia nime alou.”

³Atao intso noikü phiai jü tsammongnyiu pem tsükengkü iula. Tilai apaüh melothso tsak chetkiu APAOU nou ngütü ngiom, “Apa nian Liukü Lüyanhean, khaolaokü Lükamhean ta lüjon.

⁴Nung methso ‘Apü’ naiuso ‘Anyie,’ ta jonau omkü mosongkün khako Damaskahai jengtsaiu chikü naiuso Samaria ainou aploutsün jengtsaiu nouso chikü Asriahai nokpao tsangkü kanlükhune.”

⁵APAOU nou ngüko tsülaokü chite,

⁶“Tiautenai nung khaiuniahoi nousoüh Sheloa Krek haiu ainou khiamngem tsüngemkü tsangtsün khiam nou wankü, Nokpao Resin naiuso Nokpao Peka khako ngao- ngaophe,

⁷Ngo APAOU nou, Asiriahai nokpao naiuso apa akonghoi nouso kankü shiküta Yihuda komane. Ngüso Eufrates Haiu, mianshikü tsangtsün khiampek khekkü tsange.

⁸Ngüso Yihuda thsatkü khiamtheli nappe, küta nungüh sangdongkhaiu ngoikü sunge, naiuso apem mianlou-e.” Goa samko hakü noin! Apa ekuk sapengtsün nou goumchi sojeikü noin.

⁹Asam mele nouso ahat nai aikü akamshi! Shikü noitsün goumchi nousoüh anglu. Ehli au lükhemlou! Ah, lükhemlou, lüko hatkü lüthe!

¹⁰Asamüh lüthattaiu, asamüh aiutsünli thatso lüngemlou! Lüko nung chikü asapate, tiautenai Goa samko hakü noin.

¹¹Apa oukong asong nouko APAOU nou ngü tü khaiuniahoi nou khutsün yam tü tsühoilutau lohatkü noiküla. Apaüh ngiom,

¹²“Nung khaiunia nouso akausai mongthat nouko laha naiuso ngüso hattsün nouko hatkü lanoi.

¹³Ngo APAOU Apemshiotsün, asio noin; tiautenai asam hatau nou ngo noin.

¹⁴Tiautenai jü asio nou ahatau lümeikü khaiuniahoi hokkha thektsün lung tsak khekkü noin; Yihuda si Israel nokshing nai khaiunia naiuso Yirusalem khaiuniahoi thalouau noitsün jin tsak khekkü ngo noin.

¹⁵Khaiunia piakü khia-ane; ngüso loiane naiuso sutnekü wane. Ngüso jin nouko monane.”

¹⁶Asam jü sahoisoüh ngü hau Goa nou kiutsün ngiongem nou meikü tsangsankü taiuau noin.

¹⁷APAOU, apa khaiuniaso ainou meshen kha tsangpokkü wananiu lüko jü ayang apa da monglamtsün nai taim.

¹⁸APAOU nou ngü hau kiutsün methsoso ko hakü ngo nungko noin. Zion king nai nokpao noikham noitsün APAOU Apemshiotsün nou sam Israel khaiuniahoi dongai aa mitha hongkü noin.

¹⁹Lüko khaiuniahoi nou asam tü, “mia on ko achitekiu naiuso asangkiu ta,” ngio-e, ngüsoüh aa noitsünso thaiutha khaiuniahoi nou mia onthso ta sangau noin ta ngio-e.

²⁰Asamüh ngüso tü nungti thalaau noin, “APAOU nou asam hau ti tsandeji nungtü anglu! Mia on ko chitetsünso tü la-ang ngüsoüh asam hau ti chiteji, nungto asam thaiutha ti alesan tsünoi.”

²¹Naiuso khaiuniahoi nou goh yankü amonghen nouko naiusilekü tsakei-e. Ngüso naiusile nai naiuso amongmat nai ngüsoüh nokpao naiuso ngüso Goa athesan kiu-e. Ngüsoüh maou nai thapsane

²²tsüdekünai goh ai thapthio-e, lüko ngüsoüh aangja, anyakhem, ahatau lümeikü noitsün sübao nou ngüso tü komkeiji, nungko simkü amao titso tsüeppe.