Read Khiamniungan Naga Isa 9 Bible Online

Isa 9 - Khiamniungan Naga bible

Isa 9

¹Lüko nungko ngüso thaiutha nung angja ainou haiulouau ayam ti tsünoi-e. Zebulun naiuso Napthali hai mele goumchi ataojam amiam nai noiküla, lüko nung khiamkhan nou dongai ashiau noitsün atao nou asuhat kankü shi-e, nung ajepek nai noitsün Mideteranean khiamnok ainou Yordan Haiu etsai noitsün goumchi, gohmao khaiuniahoi kihtsün Galil lüko saoko noi-e.

²Anyakhem nai tsakeitsün khaiuniahoi nousoüh awon asong tsak epiu. Ngüso anyakhem goumchi nai kihküla, lüko lo awon nou ngüso da thsalutiu.

³Ni ngüso hau amongling asong kiuwaniu, APAOU, ni ngüso monglingi-iu. Ngüso be-eiuyam taoko tsüdekünai athaloutsün jengtsaiu janthat loutsün taoko monglingattsünli ni ti chhikü shin, nungko ngüso monglingatiu.

⁴Tititenai ni ngüso khe thsale naiuso ngüso sangdongkhaiu ai shiuhtsün son auo lothatkiuwaniu Kümei nai ni Midianhai süpaihoi shiolokü shitsünli akhaiuniaso thangmangtsün naiuso ajouheantsün mele nou ni shiolouwaniu.

⁵Akomau shitsün hokkhut nouso naiuso ngüso ün she leptsün neshe chikü in nou jahwane.

⁶Sam hau Methso tsak chetkiukü noin! Sam hau Melothso tsak kiukü noin! Naiuso Apa sam nokpao au the-e. Apa tü; “Angawantsün, Ayangpungtsün,” “Oukong suntsün Goa,” “Athontsüyang Po,” “Nokmei Nokpao Thso” ta jone.

⁷Apa nokshing oukong athontsüyange; apa nokshing asaita nokmei nailu noi-e. Lo nai yanou atao athon ta thalutkü apa oukong atha nou naiuso ngiotsüo nou tsakü, Apaüh Nokpao David tü liloukü nokshing shinge. APAOU Apemshiotsün nou nung apem chhiau khemlou-iu.

⁸APAOU nou Yakob thsaosithsoso khako, Israelhai nokshing chiai mikhem nou welutiu.

⁹Israel khaiuniahoi chikü, Samaria noknio nai kihtsün khaiunia pungkü nou nung apaüh chhin ta nge-e. Lo ngüso bülomji naiuso mongkongji. Ngüsoüh ngioji,

¹⁰“Ajeklung tsam nouso loianiu, lüko samüh nungso lung tsam nou leane. Sikamor pai kheam atengpao nouso lohongane, lüko samüh nungso cedarpai ameiting nou li-ane.”

¹¹APAOU nou ngüso komanau ngüso ehso lothsümone.

¹²Israel miolianao ajepek nai Siriahai naiuso ajenap nai Filistia hai son kopengkü noin. Nungti lüko APAOU ün amongmat tsülao; apa pha losaokü ngüso angja kiuau loksankü noin.

¹³APAOU Apemshiotsün nou ngüso lohat lüko, Israel khaiuniahoi mong tsüphokle, apa dongai ngüso laokü tsüshi.

¹⁴Nungtiphe APAOU nou Israel hai aheihoi naiuso khaiunia ajekhaiu tsakolu ngüso khaiusihok tapsankü angja kiu-e.

¹⁵Petche naiuso asuhatkü noitsün khaiunia- hoi nouso khaiu noin naiuso hok nou e-po nouso sauhaiüh yaang tsandeji ngüso noin!

¹⁶Nung aheihoi nousoüh ahoi nou ayam tsüthakünai nialü- khun küta ngüso thumkü pülai-ikü noin.

¹⁷Nungtiphe APAOU nou pühehoi sautso tsüthakhu-i, naiuso apaüh jihi nouso si mejet nouso khako atsüojinyang tsühane, tiau- tenai khaiunia chikü nou Goa tsünge naiuso akausai naiuso ngüso ün ngiotsün alum tsümei. Nungti lüko APAOU ün amongmat tsüthone, lüko apa pha to angja kiu au loksankü noi-e.

¹⁸Tititenai khaiuniahoi akausai chhisiya nou tsaopai naiuso tsao nouso ün nou chetheantsün in khekkü noin. Tiautenai nungüh injah in khekkü chetheanji naiuso pengmongaili khaosanji.

¹⁹Tiautenai APAOU Apemshiotsün mongmatphe, apa amongmat goumchi thapekkü inyai khekkü khuküta khaiuniahoi lotheanji, naiuso nung sam apem mi noin.

²⁰Goumchi apemai khaiunia- hoi nou eheshiu in diodio ashiotsün lektso tsamkü heshiu, lüko ngüso naiusile tilaitso amongtsam tsünoi. Ngüsoüh meshen thsoting lüko hean!

²¹Manase kau si Efraim kau ne tsak si tsak thako ehli tsalou, naiuso ngüne kamlouküta Yihuda ko likü noiküla. Nungti lüko APAOU ün amongmat tsüthone, lüko apa pha loüh angja kiuau loksankülu noin.