Read Khiamniungan Naga Levi 1 Bible Online

Levi 1 - Khiamniungan Naga bible

Levi 1

¹APAOU noitsün Nejenkhio ainou APAOU nou Mosa jonkü Israelhaiüh aloat chaithio thiotsün taoko kankeiau amsikham ngiokhem nouso,

²nungso kium. Tilai asamüh APAOU hau aloat chaithio kanne, asamüh onnemokhoi naiuso jangtsohoi ainou meshen chaithio akiu.

³Apa chaithio nung janghoi ongko nou ajah chaithio tsak naito, apaüh alothe tsüpokün jangtsopong tsak thio-ela.

⁴Nungaih apa angei nouso wankiuau thaiutha apaüh apa pha nung thainian khaiu noutü thanglutkü taiu-e.

⁵Apaüh nungko jangtsopong nou loate, naiuso Aron thsaosithso mesonhoi nousoüh nung jangshe APAOU noitsün Nejenkhio nai naptsün amthang aniokün püle nouso chikü thako satlutte.

⁶Nungaih apaüh ajah au noitsün thainian chaithio khun shisan-e naiuso nung nelangkü lamne-e,

⁷naiuso mesonhoi nousoüh ajah au amthang nai pai kamshikü nungtü in jahlute.

⁸Ngüsoüh nung thainian khaiu naiuso i-iu nou hakü nyih nouso in chinai letaiu-e.

⁹Naiuso nung khaiunia nou athaisisai naiuso ahok nou tsaowane, küta nung meson nou amthang nai jah-e. Nung chih chaithio angannyam APAOU monglengtsün noin.

¹⁰Khaiunia tsaküh apa won tsüdekünai onnemok tsak chaithio kiunaito, nung alothe tsüpokün apong tsak theau noin.

¹¹Apaüh nung thainian amthang noutü ajenapki nai loate, naiuso meson nou thainian she nou amthang aniokün püle nai satpenge.

¹²Khaiunia nou nung nyih lopek phiai, meson nou nung nyih nouso akhaiu si iiu nou hakü in chiai lolute.

¹³Naiuso nung khaiunia nou athaisisai naiuso ahok nou tsaowan küta meson nou nung amthang nai jahkü APAOU hau chaithio kiu-e. Nungh nyih chaithio angannyam nou APAOU monglengiji.

¹⁴Khaiunia tsaküh ajah chaithio nung waio tsak kiunaito, nung chongmükham tsak tsüdekünai mükham tsak thio-ela.

¹⁵Meson nou nung asang nai chhakü chha-at-e, küta amthang nai akhaiu nou jah-e. Ashe nou amthang noutü shelut-iau noin.

¹⁶Apaüh nung waio paiopi nou lokü khuküta amthang ajepek nai luo noitsün athang nai yakkanela.

¹⁷Apaüh ekok nou tsüchansankü nemtso ai thaloküta apim nou chipekke, nungphiai amthang nai athum jah-e. Nung chih chaithio angannyam nou APAOU monglengiji.