Read Khiamniungan Naga Levi 11 Bible Online

Levi 11 - Khiamniungan Naga bible

Levi 11

¹Israelhai thaiutha APAOU nou Mosa si Aron ne hau nung ngiokhem nouso kiu.

²Goumchi thainian ongko asamüh heau nungso:

³achanjong jongkü noitsün naiuso achihli litsün,

⁴lüko asamüh ut nyih, Badger nyih, tsüdekünai chongsao nyih lahe. Nungso tsüyanthsüokün thainian ta wesanau noin; tiautenai ngüsoüh achihli nou liji, lüko achanjong tsüjong.

⁷Yah nyih lahe, nungso tsüyanthsüokün thainian ta wesanau noin; tiautenai ngüso tü achanjong jong lüko achihli tsüliji.

⁸Nungso thainian nyih lahe tsüdekünai nungso ee mea nou tü athan lüko lathan; nungso tsüyanthsüokün thainian noin.

⁹Asamüh akoi naiuso akhunlap pokü noitsün nguo in tilünou heau shio-e,

¹⁰lüko akoi naiuso akhunlap tsüpokü khiamai kihtsün ti lahe.

¹¹Lüko nungtin thainian asam thaiutha tsüyanthsüokü noi-e: Asamüh nungso tsüheau noin tsüdekünai amea nouso tü athan tso lathan.

¹²Akoi naiuso akhunlap tsüpokü khiamai kihtsün ti nyih lünou asamüh tsüheau noin.

¹³Asamüh nungso waionyih tsüheau noin: Letche, anya waio, yahhe letche, ahai heshitsün waiotso in pungkü, tangküloin, mükho, Ostrich waio, khiam waio, asang naiuso ahok laiukü noitsün waio, nguo hetsün khiam waio, anyaching khiam waio, aleng hemkiamkü noitsün waio, naiuso pia nouso.

²⁰Akoi potsün aathso, ahokthek potsün tü simkü

²¹apem tsüyanthsüokü noin.

²²Asamüh jongku asong, naiuso jimikhiao, naiuso khengliu chiai tsakeitsün jongku nouso heau shio-e.

²³Lüko akoi potsün aathso chikü naiuso achinkeitsün apem tsüyanthsüokün ta vesankü noin.

²⁴Achihlikü naiuso achan potsün thainian lüko achanjong tsüjongkün, naiuso aphaphuo yangkü ahok püle potsün thainian ee mea nouso tü sauhaiüh thantane ngüso asham saokü nouko tsüyanthsüokü noi-e. Ajantsoüh nungso ee mea kan nai apa neshe phetanau noin, lüko apato asham saokü tsüyanthsüokü noi-e.

²⁹Kongkeinio, sao, tsam sao, naiuso thsajiin nouso tsüyanthsüokün thainian ta vesanau noin.

³¹Nungso mea naiuso apim nou tü athan lüko sauüh thane, apa asham tü thalutkü nouko tsüyanthsüo ta vesane.

³²Naiuso nungso mea tsotsak chiai salutnai, nung tsüyanthsüokü iulaji. Nung jengtsaiu, pai, neshe, tsüdekünai nyikong, ti thaiutha kankeikü noilünou nungso tü salutnai tsüyanthsüo ta vesane. Nung saluttsün jengtsaiu nouso khiamai amkü wane, lüko asham saokü tsüyanthsüo ta vesane.

³³Naiuso nungso ee mea pulak nai sathionai, nungh mongko noitsün alum tsüyanthsüokü iulaji, naiuso asamüh nung pulak lopekkü wanau noin.

³⁴Eheshiu athatha heau noitsün tso tsak ta nung sathiotsün pulak ainou khiam khaiuthio nai nung tsüyanthsüokü noi-e, naiuso nung lak nai ashiu au noitsün alum tsüyanthsüokü noi-e.

³⁵Nung ee mea saluttsün tilünou alum tsüyanthsüokü noi-e, pulak tsüdekünai chio thanai, nung lopaikü wane,

³⁶lüko ee mea nouso tü thantsün to tsüsio, lüko khiamngan tsüdekünai khiamdan nouto asio noi-e.

³⁷Nung mea chihle asiuau noitsün tsak tü salutnai, nung chihle to yanthsüokü noi-e.

³⁸Lüko nung chihle nou khiamai amtaiukü thakü nung tü salutnai, nung chihle tsüyanthsüokü noi-e.

³⁹Naiuso asamüh hetsün thainian ajantso ean nai, naiuso ajantsoüh nungtü thantan nai apa asham saokü tsüyanthsüokü noi-e.

⁴⁰Naiuso ajantsoüh nung thainian nyih henai, apaüh apa neshe phetanau noin, lüko asham saokü apa tsüyanthsüokü noi-e. Naiuso ajantsoüh nung ee mea kankei nai, apaüh apa neshe phetanau noin, lüko apa asham saokü tsüyanthsüokü noi-e.

⁴¹Asamüh thainian ehentso goh chiai keitsün titso tsüheau noin,

⁴²achinkeitsün, tsüdekünai ahok püle tsüdekünai ahok piakü pokü tsakeitsün thainian tsüheau noin.

⁴³Nungso tsüyanthsüokün thainian nyih hetsün tsangkü asam tsüyanthsüokü lathe.

⁴⁴Ngo APAOU asam Goa noin, naiuso asam siokü noiau noin, tiautenai Ngo asio noin.

⁴⁵Ijip ainou asam niasantsün Ngo APAOU nou noin, nungtiphe Ngo asam Goa theau noin. Asam siokü lüthe tiautenai Ngo asio noin.

⁴⁶Nungtiphe thainian waio si sao, khiamai kihtsün alum, goh chiai chinkeitsün alum thaiutha nung ngiokhem nouso noin.

⁴⁷Asamüh amsikham yamko ayanthsüo si tsüyanthsüo, eheau thainian si tsüheau thainian jetko meikü tsangsheikü taiuau tsüokü lüthe.