Read Khiamniungan Naga Levi 12 Bible Online

Levi 12 - Khiamniungan Naga bible

Levi 12

¹Israelhai thaiutha APAOU nou Mosa hau nung ngiokhem nouso kiu.

²Menyiu tsaküh melothso tsak chetkiukü phiai ajekhaiu chinyatnyi thaiutha, alei pungkü nai achinyan khutsün taokoli apa amsikham yamko tsüyanthsüokü noin.

³Ajekhaiu petjeinyi nouko nai nung methso nou tsashethun tipane.

⁴Nungaih loüh ajekhaiu aosamkü süme nyi apa she khuwantsün ainou amkham yamko yanthsüokü moiulakün khako, apaüh ti asio nungtü tsüthanau noin, tsüdekünai apa losiotsün atao mokhemkün lektso asio Nejenkhio nai tsünapau noin.

⁵Menyiu tsaküh menyiuthso tsak chetkiukü phiai ajekhaiu chekü pülenyi thaiutha alei pungkü nai achinyan khutsün taokoli apa amsikham yamko tsüyanthsüokü noi-e. Küta apa she khuwantsün ainou amkham yamko yanthsüokü mo-iulakün ajekhaiu aoluok kü luok simkü noi-e.

⁶Melothso tsüdekünai menyiuthso thaiutha lüko apa losiotsün atao nou khemkü shinai, apaüh ajah chaithio thaiutha pon tsak shelokü onnemok tsak naiuso angei chaithio thaiutha mükham tsüdekünai chongmükham tsak APAOU noitsün Nejenkhio nai naptsün ko meson dongai kankü shiau noin.

⁷Meson nou apa chaithio APAOU hau kiukü apa tsüyanthsüokü ainou losioau amkham chhi shane, naiuso apa amkham yamko yanthsüokü noi-e. Methso chet phiai nyiuhai tsaküh chhiau nou nungti noin.

⁸Naiuso menyiu nou onnemok tsak losanau tsüshiokünai, apaüh chongmükham nime tsüdekünai mükham nime nou ajah chaithio thaiutha tsak naiuso amao tsak nou angei chaithio thaiutha kankü shiküta apa tsüyanthsüokün losioau meson nou amkham shane, küta amkham yamko yanthsüokü noi-e.