Read Khiamniungan Naga Levi 13 Bible Online

Levi 13 - Khiamniungan Naga bible

Levi 13

¹APAOU nou Mosa si Aron nehau nung ngiokhem nouso kiukü ngiom.

²Ajantso tü khun nai chaikia, jam, tsüdekünai khun aseng iulakü pumkü sungküta nung khun tsümekü jeekia auli iulanai, nungaih apa Aron kau meson nouso dongai nialokü shiau noin.

³Nungaih nung meson nou chaikia nou tü thape, naiuso chongmai nou athaiu iulakü naiuso chaikia nou intso aokü hau lümeikü nung lemkü khun nouso epnaito, nung jeekia, naiuso meson nou nung khaiunia tsüyanthsüo ta mitha kiu-e.

⁴Lüko nung chaikia to athaiu naiuso nung lemkü noitsün khun da aokü tsüde, naiuso chongmai nouso athaiu tsüde ta epsan naito, nungaih meson nou nung khaiunia hoikam ainou ajekhaiu chinyatnyi thaiutha soikü taiukei-e.

⁵Meson nou nung khaiunia tü loüh chinyatnyi nouko thapshi-e, nungaih chaikia nou tsüsomlükhunkü nungtilu epsan naito, apaüh loüh chinyatnyi thaiutha apa soikü taiushi-e.

⁶Loüh meson nou chinyatnyi nouko jam thapshi-e, nungaih chaikia nou somkü tsükhukü wailakü epnaito, apaüh nung khaiunia amkham yamko yanthsüokü noin ta mitha kiu-e, tiautenai nungto chaikialu noin ta ngio-e. Nung khaiunia nou apa neshe phetane naiuso yanthsüokü noi-e.

⁷Lüko meson nou apa tü thapkü apa yanthsüokü noin ta velutkütün phiai nung chaikia somlükhunkü naito, apa loühjam meson khako shishiau noin.

⁸Meson nou apa tü jam thapshi-e, naiuso nungko chaikia nou somlükhunkü naito, apaüh nung khaiunia nou tsüyanthsüo ta velute; tiautenai nung jeekia noin.

⁹Ajantso ta nung jeekia sunkü noinaito, apa meson dongai nialokü shiau noin;

¹⁰küta apa tü thape. Nungko apa khun nai chaikia athaiu naito, naiuso chongmai nouso athaiu iulakü nung jao nou meankü naito,

¹¹nung jeekia keng noin. Meson nou apa tsüyanthsüo ta velute; nungko apa mothikü soikü wanau tsüpo, tiautenai nung ngengekü tsüyanthsüokü noin.

¹²Nung jeekia nou khaiu ainou hok saokü sung naito,

¹³meson nou loüh apatü thapshi-e. Nungko apaüh nung pem atsüoting athum meaniu ta epsan naito, apaüh nung khaiunia amkham yamko tsüyanthsüokü noin ta velute. Naiuso apa khun athum nung athaiu iula naito, apa amkham yamko tsüyanthsüokü noin.

¹⁴Lüko ayanai yakü müo satkü sungan naito apa tsüyanthsüo.

¹⁵Meson nou apatü loüh thapshi-e, naiuso apaüh müo satkü epnaito, meson nou nung khaiunia tsüyanthsüo ta velute. Müo sattsün nungto jeekia noin, naiuso nung khaiunia nou tsüyanthsüo.

¹⁶Lüko tilai nung müo nou meilakü athaiu iula-e, nungaih khaiunia nou meson dongai khushi-e;

¹⁷küta apa tü loüh thapshi-e. Nung taoko müo sat nou athaiu iulakü naito, apa amkham yamko yanthsüokü noin, naiuso meson nou apa yanthsüokü noin ta mitha kiu-e.

¹⁸Ajantso tü jam sungkü meilo nai,

¹⁹naiuso phikü nung jam sungtsün thangko müo nou sungkü pumsan shinai, apa meson dongai khu-e.

²⁰Meson nou apatü thapnai nung athang nou khun lemkü noitsün tü intso aoküli epsan naito, naiuso nungko chongmai nou athaiu iulakü naito, apaüh nung khaiunia tsüyanthsüo ta velute. Nung chaikia nouko jeekia nou yalowaniu.

²¹Lüko meson nou nungtü thapkü chongmai nouso athaiu tsüiulakü epsan naito naiuso müo nou khun nouso khei ai aokü tsüdekü lüko aleng intso amomo naito meson nou apa chinyatnyi thaiutha moda soikü wane.

²²Lüko athang nou somkü khu naito, meson nou apa tsüyanthsüo ta velute, tiautenai apa da akia sunganiu.

²³Lüko nung tsüsomlükhun naiuso tsüli-eshikü naito, nung müothang nouko chülüchonlu noin, naiuso meson nou apa tü amkham yamko yanthsüokü noin ta velute.

²⁴Khaiunia tsak tü in nou jeknai, tsayan nou athaiu tsüdekünai aseng iula naito,

²⁵apa da meson nou thape. Nung müo nouso ko chongmai nouso athaiu iulakü nung lemkü khunkhei ai aoküli epsan naito, nung müothang nouko jeekia sungji ta ngio-e, naiuso meson nou apa tsüyanthsüo ta velute.

²⁶Lüko nungko chongmai nou athaiu tsüiulakü naito, naiuso nung lemkü noitsün khun nouso tü aokü tsüdekü lüko aleng nou intso awonkü naito meson nou apa ajekhaiu chinyatnyi thaiutha moda soikü taiu-e.

²⁷Meson nou apa tü chinyatnyi nouko loühjam thapshi-e, naiuso nungtaoko somkü khukü epnaito, nung jeekia ta vesane, küta meson nou apa tsüyanthsüo ta velute.

²⁸Lüko müothang nou tsüli-eshikü naito, nung jeekia tsüde. Meson nou apa yanthsüokü noin ta velute, tiautenai nung injekthang chülüchun lu noin.

²⁹Melo tsüdekünai menyiu tsak tü khaiu nai tsüdekünai küp nai chaikia pohnai,

³⁰nung tü meson nou thape. Nung khun lemkü noitsün ta aokü epsan naito, naiuso nungko chongmai nouso ham lung naiuso matchaikü naito, nung jeekia ta vesane. Küta nung khaiunia nou tsüyanthsüo ta vesane.

³¹Tilai meson nou apa tü thape, nungaih müo nou khun kheiai aokü tsünap ta epnaito, lüko loüh nungko chongmai pun meikü tsüsamkü naito, nung khaiunia nou chinyatnyi thaiutha soikü taiu-e.

³²Meson nou chaikia müo nou ta chinyatnyi nouko loüh jam thapshi-e, nungaih tsüsomlükhunkü naiuso chongmai nou hamlungli tsüiulakü, naiuso nungthanko chaikia nou khun nouso tü aokü müo nou tsünapkü naito,

³³nung khaiunia nou da khaiuo nou müo dongko poitaiukü apa khaiuo nung lemkü iuwane. Küta loüh meson nou apa chinyatnyi moda soikü taiushi-e.

³⁴Chinyatnyi nouko loüh meson nou nung müo nou tü thapshi-e, naiuso nung tsüsomlükhunkü naiuso lemkü noitsün khun nouso khei ai aokü tsükhu ta epsan naito, apaüh nung khaiunia nou amkham yamko yanthsüokü noin ta velute. Nung khaiunia nou apa neshe phetane, naiuso apa yanthsüokü iula-e.

³⁵Lüko apaüh nung khaiunia yanthsüokü noin ta velut phiai chaikia müo nou somkü iula naito,

³⁶meson nou apa tü müjam thapshi-e. Müo nou somkü khuwan naito, apaüh chongmai hamlung iulatsün tü thapau tsüpoh, tiautenai nung khaiunia nou tsüyanthsüo ta tsangsheikü noin.

³⁷Lüko meson mongyang ai müo nou tsüsomlükhun naiuso chongmai meikü noin ta yang naito, nung müo nou mei-aniu, naiuso meson nou nung khaiunia yanthsüokü noin ta velute.

³⁸Tilai melo tsüdekünai menyiu tsak tü khun nai athaiu leng poh-e,

³⁹nungh khaiunia nou tü meson nou thape. Nung aleng pohtsün athaiu naito, nungto khun ainou sungtsün alengsat tsaklu noin; nungtiphe nung khaiunia nou yanthsüokü noin.

⁴⁰Khaiunia tsak tü khaiuo nou khakheng nai tsüdekünai khaiuphi nai thukan nai, nungüh apa tsüyanthsüokü tsüiulaji.

⁴¹

⁴²Lüko khaiuphoi thang nouko chaikia aleng sengkü sung naito, nungto jeekia nou noin.

⁴³Meson nou apa tü thape, naiuso nungko müoleng aseng naito,

⁴⁴apaüh nung khaiunia tsüyanthsüo ta velute, tiautenai apa tü jee nou khaiu nai noin.

⁴⁵Khaiunia tsak sau tü jeekia sungkü noin, apaüh nethe tenau noin, apa khaiuo tsühete, naiuso apa kha ngan nouko yangkü helai nou khutjei-e küta, “Tsüyanthsüo, tsüyanthsüo!” ta wekü ngio-e.

⁴⁶Apa da nung akia noitsün lektso apa tsüyanthsüo, naiuso apa asaothang pe-chiai amaohai ainou pungekü kih au noin.

⁴⁷Tilai neshe emok ne tsüdekünai amatchai,

⁴⁸ne amatchai thun, emok ne thun, nyihkhun tsüdekünai nyihkhun nou shantsün tsotsak da muo poh-e,

⁴⁹asangnya tsüdekünai aseng, nung muo penglükhunauli epnai, nung meson hau hanela.

⁵⁰Meson nou nung tü thape, naiuso muo pohtsün chinyatnyi thaiutha soiankü taiu-e.

⁵¹Apaüh loüh nungtü chinyatnyi nouko thapshi-e, naiuso nung muo pohtsün penglükhunkü noi naito, nung muo pohtsün tsüyanthsüokü noin.

⁵²Meson nou nung in nai jawane, tiautenai nung asunpengtsün muophe in nai jahkü lomowanau noin.

⁵³Lüko tilai meson nou muo pohtsün tü thape, naiuso apaüh nung tsüsunlükhun ta epsane,

⁵⁴apaüh nung jengtsaiu tsawanau ngiokhem kiu-e küta nung muo pohtsün jengtsaiu loüh chinyatnyi wanane.

⁵⁵Nungaih loüh apaüh thapshi-e, naiuso nung muo nou aleng tsülieshikü naito, asun to tsüsunlükhun lüko, nung tsüyanthsüokü noin; asamüh nung muo pohtsün jengtsaiu athe nou kha ai tsüdekünai phiai poh lüko nung in nai jahkü wanela.

⁵⁶Lüko tilai meson nou nungtü müjam thapshi-e, nung muo nou nyomankü naito, apaüh nung ne tsüdekünai nyihkhun ainou chisankü wanela.

⁵⁷Loüh nung muo sungshi nai, somlükhun naito, nung jengtsaiu paou nou jahwanela.

⁵⁸Apaüh nung jengtsaiu tsaowan nai, nung müothang mowan naito, apaüh loüh nung tsaowanshi-e, küta nung amkham yamko yanthsüokü iulashi-e.

⁵⁹Emok ne tsüdekünai amatchai ne, naiuso nyihkhon nou shantsün in amomo ta amkham yamko yanthsüokü tsüdekünai tsüyanthsüokü lüko ti ta nung muo poh-e nung thaiutha ngiokhem nung noin.