Read Khiamniungan Naga Levi 14 Bible Online

Levi 14 - Khiamniungan Naga bible

Levi 14

²jee kiatsün khaiunia tsak meiküta losangtsün amsikham thaiutha nungso kiu. Apa yanthsüo-iu ta veluttsün ajekhaiuko nai nung khaiunia nou meson dongai nialokü shi-e,

³küta meson nou apa asaothang pe-chiai nialokü khuküta apatü thape. Nungaih nung jeekia meilakü noi naito,

⁴meson nou sau losioau noin apa thaiutha amkham yamko yanthsüokü noitsün waio nime, cedar pai tsakko hakü, ao aseng tsak naiuso esop kankü shi-iau noin.

⁵Nungaih meson nou asangling haiungan khiam taiutsün puochio chiai waio tsak loatau ngio-e.

⁶Küta apaüh amao waio tsak nou loküta waioshe nai cedar pai, ao aseng, naiuso esop nousoko hakü chamthio-e.

⁷Nungaih jeekia meilatsün khaiunia nou losioau apa da ashe nou chinyatjam satlute, küta nung khaiunia nou yanthsüokü iula-iu ta velute. Naiuso apaüh aa waio tsak nou khengpun nai jeikü khuwani-e.

⁸Nung khaiunia nou apa neshe phetane, apa khaiu iuwanküta khiam pengane; nungaih apa amsikham yamko yanthsüokü noi-e. Apa asaothang nai napau shio-e, lüko apa Nejenkhio pe-chiai chinyatnyi noi-ela.

⁹Chinyatnyi nouko loüh apa khaiu, sonpun, niokup pon, naiuso chongmai apem iuwane, apaüh neshe phetane, naiuso khiam pengküta apa amkham yamko yanthsüokü noi-e.

¹⁰Petjei nyi nouko apaüh onnemokpong nime naiuso asangtso tsak ti alothe tsüsunkü pon tsak shelokü noitsün, olip khiam nouko laowekü wonne tsoi süme, naiuso olip khiam tsoi tsak nouko haoson süme nou kankü shi-e.

¹¹Meson nou nung khaiunia nou nungso chaithio nousoko hakü APAOU noitsün Nejenkhio dongai nialokü shi-e.

¹²Nungaih meson nou onnemok apong nime ongko tsak naiuso olip khiam tsoi tsak nouko haoson süme nou loküta apaüh nung alaokiushitsün chaithio tsakli thio-e. Apaüh nungso meson nou thaiuthako APAOU hau amothi paopei tsakli kiu-e.

¹³Apaüh nung onnemok angei chaithio naiuso ajah chaithio kiutsün asiothang nai loate. Apaüh nung chhiau noin tiautenai nungso angei chaithio, sübao thatü asio nung meson ün kotha nou noin nung khekkü alaokiushitsün chaithio noin.

¹⁴Meson nou onnemok she intso loküta nuodhan uai nai, phakhapao uai nai, naiuso hokkhapao uai nai alosio amkham kiutsün khaiunia thaiutha loate.

¹⁵Meson nou olip khiam intso loküta apa phapho tsatai nung tsathio-e,

¹⁶naiuso nungko apa phakhatso uai nou chamthio küta she ajantsoüh APAOU noitsün Nejenkhio tü chinyatjam satlute.

¹⁷Apaüh apa phamongko noitsün olip khiam intso naiuso onnemok she intso loküta apa nuodong uai, apa phakhapao uai naiuso nung khaiunia sau losioau noin apa hokkhapao uai nungso lolute.

¹⁸Apaüh khaiutsom apoi nou apa phamongko noitsün loküta nung khaiunia khaiu ai honglute. Nungli apaüh amsikham losangtsün amkham shanau noin.

¹⁹Nungaih meson nou angei chaithio nou kiukü alosiotsün amkham shane. Nungphiai apaüh nung thainian ajah chaithio thaiutha loate

²⁰naiuso nungh chih chaithio nouko aikü amthang nai thio-e. Nungli meson nou alosiotsün amkham shane, küta nung khaiunia nou amkham yamko yanthsüokü noi-e.

²¹Nung khaiunia nou tsosilu thekü nung chiai kiuau tsüshiokü nai, apaüh alaokiushitsün chaithio khekkü, apa losio amkham thaiutha onnemokpong tsaklu kankü shi-e, naiuso nung meson thaiutha APAOU hau amothi paopei tsak noi-e. Apaüh olip khiam nouko laowekü wonne tsoi tsak, chih chaithio thaiutha naiuso olip khiam tsoi tsak nouko haoson süme kankü shi-e.

²²Naiuso loüh apaüh angei chaithio tsak naiuso ajah chaithio tsak ta mükham tsüdekünai chongmükham nime kankü shi-e.

²³Apa losiotsün ajekhaiu petjeinyi nouko nai apaüh nungso meson dongai Nejenkhio nai naptsün dongko kankü shi-e.

²⁴Meson nou onnemok tsüdekünai olip khiam loküta meson thaiutha APAOU hau amothi paopei tsakli kiu-e.

²⁵Apaüh onnemok nou loatküta ashe nou intso lokü nung khaiunia nuodong uai, phakhapao uai, naiuso hokkhapao uai noutü tsomlute.

²⁶Meson nou khaiutsom intso loküta, apa phamong tsatai thio-e,

²⁷naiuso apa phakha uai nou chamluküta APAOU noitsün nai chinyatjam satlute.

²⁸Nung she loluttsünli, apaüh khaiutsom intso nung athang tü tsomlute, naiuso khaiunia nou nuodong uai, phakhapao uai, naiuso hokkhapao uai ta lolute.

²⁹Apa pha nai poitaiutsün khaiutsom apaüh nung khaiunia khaiu nai lolute, nungli alosiotsün amkham shan-e.

³⁰Küta apaüh chongmükham ongko tsak tsüdekünai mükham ongko tsak ta

³¹angei chaithio naiuso ajah chaithio nou chih chaithio ko aikü kiu-e. Nungli meson nou alosio amkham shanau noin.

³²Apa losioau thaiutha amkham kiuau pohtsün ko chaithio thasanau tsüshiokün jeekia sungtsün khaiunia thaiutha nung ngiokhem noin.

³³APAOU nou Mosa naiuso Aron

³⁴hau tsam mou sunpengtsün tsangkü lothetsün thaiutha nung ngiokhem nouso kiu.(Israelhai Kanan goumchi sübao APAOU nou ngüso tengkamau kiu-e, nungaih napküta kankeiau nung noiküla.) Ajantsoüh apa tsamai mou nou sunpengtsün nung APAOU nou hong ta epsan naito, apa meson dongai khuküta nung chiteau noin.

³⁵

³⁶Meson nou apa khukü nung mou tü mothapkün khako, tsam ainou alum jengtsaiu kengai yanshiau ngio-e, nungti tsüdekünaito tsamai noitsün alum tsüyanthsüo ta velute. Küta apa nung tsam nai khuküta

³⁷nung mou tü thape. Nungko athang nou asangnya tsüdekünai aseng nung dioai heantsünli epsan naito,

³⁸apaüh nung tsam chinyatnyi thaiutha le-ankü khuwane.

³⁹Chinyatnyi nouko apa laokü shiküta nung tü loühjam thapshi-e. Nungtaonai nung mou sunpengkü epnaito,

⁴⁰apaüh nung mou suntsün lung nou lowanküta athang tsüsiokün noknio pe-chiai athang tsakai yakkanau ngiokhem kiu-e.

⁴¹Nungphiai apaüh tsammong dioai apem ai shiowanküta lepjeikü taiutsün nung khosanküta noknio pe-chiai tsüyanthsüokün athang tsak ai wanau noin.

⁴²Nungaih amao lung nouso awanantsün lung nouso liko thioshi-e, küta dio ainou alepjeitsün ayan nou lepjeikü wane.

⁴³Lung naiuso achinyan nouso chi-ankü lepshi phiai loüh mou nouso sungshi naito,

⁴⁴meson nou khuküta thape. Nung somlakü naito nung tsam tsüyanthsüo ta vesane.

⁴⁵Nung tsam laopengkü, lung nouso, pai nouso, naiuso alepjeitsün nouso noknio pe-chiai kankü khukü tsüyanthsüokün athang tsakai wanane.

⁴⁶Nung tsam kiapjeikü taiutsün taoko ajantso napnai apa amkham yamko asham saokü tsüyanthsüokü noi-e.

⁴⁷Nung tsam nouko ajantso moknoinai naiuso heshiunai, apaüh neshe phetanau noin.

⁴⁸Tsam nou lepshikütün phiai meson nou shinai nung mou nou tsüsungshikü epnaito, apaüh nung tsam yanthsüokü noin ta velute, tiautenai muo nou thumkü thasiokü lowaniu.

⁴⁹Nung tsam losioau apaüh waio nime, cedar pai intso, ao aseng tsak, naiuso esop tsak ta lo-e.

⁵⁰Apaüh nung puochio tsak mongko haiungan khiam asangling naptsün chiai waio nouso tsak loate.

⁵¹Küta apaüh cedar pai, esop ao aseng nou da naiuso waio tsak aa poitaiu nou, nung waio she nai naiuso khiam asangling nai chamthio-e. Naiuso apaüh tsam nai chinyatjam nung satpenge.

⁵²Nungli apaüh tsam nou waio she, khiam asangling, waio aa poitaiu nou, cedar pai, esop nou, naiuso auo aseng nou losang kiu-e.

⁵³Küta apaüh nung waio aa nou kengpun nai noknio pe-chiai jaküta jeikü khuwani-e. Nungli apaüh tsam losiotsün thaiutha amkham shanau noin, naiuso nung amkham yamko yanthsüokü noi-e.

⁵⁴Chaikia muo, jam, tsüdekünai tsapumkia, jeekia, naiuso neshe tsüdekünai tsam da suntsün muo nouso thaiutha ngiokhem nungso noin.

⁵⁵

⁵⁶

⁵⁷Tso tsak tsüyanthsüo, si ayanthsüo noitsün, janthatau thaiutha nung ngiokhem nouso noin.