Read Khiamniungan Naga Levi 17 Bible Online

Levi 17 - Khiamniungan Naga bible

Levi 17

¹APAOU nou Mosa hau

²Aron, apa thsoso, naiuso Israelhai apem thaiutha nung ngiokhem nouso kiuau thoilut.

³Israelhai sauüh jangtso tsak onnemok tsak, tsüdekünai won tsak APAOU hau chaithio kiuau, APAOU noitsün Nejenkhio nai naptsün ko tsüdekü amao athang ai loate apaüh ngiokhem lotheji. Apaüh she nou loshi-iu, nungtiphe loto apa Goa ün khaiunia ongko tsak ta tsüvesanha-e.

⁵Nung athoilut alat nou: Israelhaiüh thainian kengpun nai loatkü kankeitsün nung loto APAOU dongai kankü shi-e. Loto ngüsoüh nung thainian nouso nung Nejenkhio nai naptsün dongko loatküta nokmei chaithioli meson dongai kankü shi-e.

⁶Meson nou nung she Nejenkhio nai naptsün amthang aniokun chikü nai satpenge, küta APAOU monglingikü angannyam sungiau nung i-iu nou jah-e.

⁷Israelhaiüh loto ngüso thainian kengpun nai aloat chaithio biya hau kiutsünli APAOU nou tü mongtsükiukü tsünoishi-e. Israel khaiuniahoi nousoüh nung ngiokhem ashiau nou atao chikü thaiutha kankeiau noin.

⁸Israelhai tsüdekünai ngüso ongko kihatsün gohmao khaiuniahoi saulünou ajah chaithio tsüdekünai amao chaithio

⁹Nejenkhio ai naptsün dongko tsüdekü athang amao ai APAOU hau chaithio kiunai apa loto Goa ün khaiuniahoi ongko tsak ta tsüvesanha shi-e.

¹⁰Israelhai tsüdekünai ngüsoko kihatsün gohmao khaiuniahoi sauüh she sunkü noitsün nyih heji, APAOU nou apa thako tsa-e, naiuso loto apa meshen khaiuniaso ongko mepem tsak ta tsüvesanha-e.

¹¹Aathso alum da aa nou she nai noin, nung shioko APAOU nou ashe apem nung khaiuniahoi angei kankü khuwanau amthang nai tsapengkü wane. She, nung sübao aa noin, nungüh angei kankü khuwanji.

¹²Nung shioko APAOU nou Israel khaiuniahoi tsüdekünai ngüso ongko kihatsün gohmao khaiunia saulünou ashe sunkü noitsün nyih titso tsühe-e.

¹³Israelhai ajantso tsüdekünai hoikam ongko kihatsün gohmao khaiunia ajantsoüh amkham yamko siokü noitsün thainian tsüdekünai waio tsak homat nai, apaüh nung da noitsün ashe nou goh ai tsa-anau noin, küta nung puo nou soipokkü wanau noin.

¹⁴Aakihtsün alum da aa nou she nai noin, nungshioko APAOU nou Israel khaiuniahoi tü ashe sunkü noitsün ti nyih lünou ngüsoüh tsüheau ngiom, naiuso ajantsoüh nung henai, apato apa ün khaiunia ongko tsak ta tsüvesanha-e.

¹⁵Israelhai tsüdekünai gohmao khaiuniahoi saulünou, yaang eantsün thainian nyih heji, tsüdekünai liu thainian nou jeiattsün nyih heji, apaüh apa neshe phetanau noin, naiuso khiam pengau noin, naiuso apa amkham yamko yanthsüokü moiulakün asham saokü taiuau noin.

¹⁶Apaüh nung tsüchhi naito apaüh meshen angei thsa kane.