Read Khiamniungan Naga Levi 18 Bible Online

Levi 18 - Khiamniungan Naga bible

Levi 18

¹APAOU nou Mosa tü

²Israel khaiuniahoiso tü nung lüngio ta ngiom, “Ngo APAOU asam Goa noin.

³Asam jam kihkü shitsün Ijiphai chhisiya nouso tsüdekünai Ngo lo asam tü ngiotsün Kanan goumchi nai noitsün khaiuniahoi nousoüh chhitsün tü lahoilut.

⁴Jü ngiokhem nouso angio lü-ang, naiuso Ngo thoiluttsün lüchhi. Ngo APAOU asam Goa noin.

⁵Ngo asam hau kiutsün ngiokhem nouso tü hoilutkü lüchhi; nung chhitsün tsangkü asam aa kipsane; Ngo APAOU noin.”

⁶APAOU nou nung ngiokhem nouso kiukü ngiom. Atsammongso sauko lünou emkamkü lajisiwop.

⁷Anyiuko emkamkü jisiwoptsün tsangkü apo lalomiam. Naiuso ni anyiu tsülomiam kiuau noin.

⁸Apo tsammongnyiu amao saukolünou emkamkü ajisiwop chhitsün tsangkü apo lalomiamkiu.

⁹Anio menyiuthso atsamkhaiuko nou tsüdekünai amao tsamkhaiu nai chet nouko emkamkü ajisiwop lachhi.

¹⁰Athsao menyiuthso nouko emkamkü ajisiwop lachhi; nungto ni apim thaiutha amiam noin.

¹¹Ni po tsak da lu chetsinyimtsün menyiuthso nouko emkamkü ajisiwop lachhi, nungh anio noin.

¹²Apo ün nio anyai tsüdekünai anyiu ün nioko emkamkü ajisiwop lachhi.

¹⁴Apo ehen ün tsammongnyiu ko emkamkü ajisiwop lachhi; apa lüko anyiu lu noin.

¹⁵Athso ün tsammongnyiu

¹⁶tsüdekünai adei tsammongnyiu ko emkamkü ajisiwop lachhi.

¹⁷Ni emkamtsün ün menyiuthso tsüdekünai thsao menyiuthso nouko ni emkamkü ajisiwop lachhi, ngüso she shimekü noin, nungto achinek noin.

¹⁸Atsammongnyiu aa noin lektso, apa nio nung atsammongnyiu theau lalo.

¹⁹Menyiu tsak apa alei pungkü achinyan khutsün taoko la-emkam, tiautenai apa tsüyanthsüokü noin.

²⁰Amao khaiunia tsak ün tsammongnyiu ko emkamkü ajisiwop lachhi, nungüh ni amkham yamko tsüyanthsüokü iula-e.

²¹Asamüh asam thsoso Molek goa sotsom tü amkhamtsün nai kankeiau lakiu, tiautenai nungüh APAOU Goa nian khako alochinyan kankü shi-e.

²²Pohai tsak amao pohai tsakko emkamtsün saisile lachhi, Goa nou nungh chinyanji.

²³Pohai tsüdekünai nyiuhai saulünou thainianko emkamkü ajisiwop lachhi; nungh saisile ayam tsüdekü nou ni amkham yamko tsüyanthsüokü iulaji.

²⁴Nungti nou chhisiya tiühtso asam chija tsüyanthsüokü la-iula, nungti chhikü asam khako mele nousoüh ngüso chija tsüyanthsüokü shanlo, naiuso nungko asam napkü kihloau thaiutha APAOU nou ngüso komankiu.

²⁵Ngüso chhisiya nou nung gohthang tsüyanthsüokü iula-i, nungtiphe APAOU nou nung gohthang naiuso nungko kihtsün khaiuniahoi nouso tsülokü le-antsün angja noin.

²⁶Ngüsoüh nung achinyan chhisiya nouso apem chhin, küta gohthang nou tsüyanthsüokü iula-i, lüko asamüh to nung tsüchhiau noin. Asam Israelhai lüko tsüdekünai asam ongko kihakü noitsün gohmao khaiuniahoi lüko apemüh nung APAOU ün ngiokhem naiuso athoilut nouso angio ang-au noin.

²⁸Naiuso asam khako kihkü shitsün mele nouso leantsün to nung gohthang nou asam tsüleane.

²⁹Sauhaiüh nungtin achinyan chhisiya tsotsak lüko chhi-e, ngüso to Goa ün khaiunia ongko tsak ta tsüvesanha shi-e ta asamüh ngeji.

³⁰Naiuso APAOU nou ngiom, “Ngü kiutsün athoilut nouso angio lü-ang, naiuso nung gohthang nai asam khako kihkü shitsün khaiuniahoi nousoüh chhitsün tü lahoilut, naiuso nungtin tso tsak lüko chhitsün tsangkü asam tsüyanthsüokü la-iula. Ngo APAOU asam Goa noin.”