Read Khiamniungan Naga Levi 19 Bible Online

Levi 19 - Khiamniungan Naga bible

Levi 19

¹APAOU nou Mosa hau

²Israel hoikam tü ngioau nung ngio nou kiu, “Asam siokü lünoi, tiautenai Ngo, APAOU asam Goa, asio noin.

³Asam pungkü nou meshen posinyiu asuhatau noin, naiuso Ngo thoiluttsünli chinyatnyi nou nuo au noin. Ngo APAOU asam Goa noin.

⁴“Asamüh Ngo leankü sotsom nousotü la-amkham; asamüh sun nou shantsün goa lashan naiuso nungso la-amkham. Ngo APAOU asam Goa noin.

⁵“Tilai asamüh nokmei chaithio thaiutha thainian tsak loate, Ngü asam hau kiutaiutsün ngiokhem nouso lükankei, naiuso Ngü nung chaithio lo-e.

⁶Thainian aloattsün ajekhaiu tsüdekünai nungthan ajekhaiuko nai nung thainian nyih heanau noin. Samnyap saokü nouko nung nyih tso tsak poishi naito in nai jahwanela,

⁷tiautenai nung amkham yamko tsüyanthsüo, naiuso ajantsoüh nung nyih henai, Ngo nung chaithio tsülo-e.

⁸Sauüh nung nyih he-e, nungüh Ngo tü losiokü taiutsün asio ta tsüvesanphe, aphio noi-e, naiuso loto apa jü khaiunia ongko tsak ta tsüvesanha-e.

⁹“Tilai asamüh asam eiu be-eiuyame, asamüh chih-pai nou eiuthun saokü lalamlo, naiuso aleantsün chih lamloau lakhushi.

¹⁰Asam sainaoshep tsüpanlokü yanlükhunantsün, tsüdekünai asali-antsün khailoau sainaoshep eiu yankü lakhu, nungso tsosiluhai tsüdekünai gohmao khaiuniahoi thaiutha lüle-an. Ngo APAOU asam Goa noin.

¹¹“Asamüh lakau, lakausaiate, tsüdekünai yaang latsande-e.

¹²Asamüh atsüo tsükankei-etünai jünianko athalou-e lashan; nungüh jünian chiai amiam kankü shiji. Ngo APAOU asam Goa noin.

¹³“Ni saulünou lakausaiat, tsüdekünai apa lakauat. Sotso thaiutha lüko chaichenhai ajantso ün amai tsükiuwankü lataiuwan.

¹⁴Nuokek khaiunia tsak ta athesan lakiu, tsüdekünai niopek khaiunia tsak hokkha thekau lümeikü apa khako titso lataiukiu. Ngo lun lühat; Ngo APAOU asam Goa noin.

¹⁵“Mikhemtsün khako tilai ni ajanthat kiu-e, saitha naiuso ngiotsüo lüthe, tsosiluhai tü atsüojinyang lühan, tsüdekünai memeihai lun lahat.

¹⁶Ajantso thaiutha yaang ngio lalopengkiu, naiuso tilai ajantso meshen aa thaiutha angja athelu nai noi-e, amithaüh apa haloau shionai lüsingio. Ngo APAOU noin.

¹⁷“Sau thakolünou mongai tsümeikü yangtaiukü lanoi, lüko aje jetko ayangtaiu amomo noitsün nung shakta lükheman, nungaito ni apa thako angei tsüsunhe-e.

¹⁸Sau thakolünou phaosan lasan tsüdekünai apa tü chinyanlutkü lanoi, lüko aphaosipo tü apimli lütsüojin. Ngo APAOU noin.

¹⁹“Asamüh jü athoilut nouso angio lü-ang. Asamüh tsam thainian in nime nou kamkü lanyim. Eiu tsak kolu lelu nime tsüsiuthioau noin. Ewoi in nime kamshikü lahsantsün nepat laten.

²⁰“Sua menyiuthso tsak khaiunia tsak ün nyiu-ib thekü, apa sokshiau amai mokiukü naito, nungko amao khaiunia tsak emkamkü ajisiwop chhi nai, ngüso hau angja kiu-e, lüko alo to tsüloate; tiautenai nung menyiuthso nou sua noin.

²¹Nung khaiunia nou apa laokü kiushitsün chaithio nou jükhako Nejenkhio nai naptsün thang nai onnemokpong tsak kankü shi-e,

²²naiuso nungüh meson nou nung khaiunia angei wankiuau alosiotsün amkham shane, naiuso Goa nou apa hau wankiu-e.

²³“Tilai asam Kanan goumchi ai nape, naiuso shep-pai ti inlünou thomthio nai, nung da chongting pon süme mongko eiusantsün nungto amkham yamko tsüyanthsüo ta lüyang. Nungtaoko asamüh nung shep tsüheau noin.

²⁴Pon püle nouko nai asamüh Ngo APAOU hau amongling hankü nung shep alosio chaithio akiu.

²⁵Lüko nung shep nouso pon pungo nouko nai asamüh heau shio-e. Asamüh nung chhi naito, asam hau pai nousoüh eiu paikü eiukiu-e. Ngo APAOU asam Goa noin.

²⁶“Ashe lepkü noitsün nyih tilünou lahe. Alonga chhi ti inlünou lachhi.

²⁷Asamüh asam khaiu tsoki nai la-iu, tsüdekünai sonpon nou lalolet

²⁸tsüdekünai eanhai thaiutha amongsaiu au ngeplaokü asam pemai lahelo. Ngo APAOU noin.

²⁹“Asam menyiuthsoso amkham tsam ajisiwop chhi-itsün tsangkü alomiam lakiu; asamüh nung chhi naito, asam amao goa nouso dongai phoklekü khuwane, naiuso goumchi nou tsütsamtsütsüokün ajisiwop nou meane.

³⁰Asamüh jü Anuo lükankei, naiuso Ngo amkhamtsün athang asulühat. Ngo APAOU noin.

³¹“Asam eanhai onthso ko chitetsün khaiunia nouso dongai ayamhan sangloau lakhu. Asam khunaito, asam amkham yamko tsüyanthsüo. Ngo APAOU asam Goa noin.

³²“Asamüh petchehai lülomsan naiuso ngüso asulühat. Asuhat nou Ngo tü angio lü-ang. Ngo APAOU noin.

³³“Asam goh ko kihatsün gohmao khaiunia nouso tü tsümeikü lakankei.

³⁴Ngüso tü asam meshen Israelhaili lükankei, naiuso asamüh meshen tsüojintsünli ngüso lütsüojin. Asam lüko ataojam Ijip goumchi nai gohmao khaiuniahoi noiküla ta lüyangsan. Ngo APAOU asam Goa noin.

³⁵“Asamüh saulünou tsoithat athang, alethsang, naiuso apia nou yaang kankeitsün tsangkü lakausaiat.

³⁶Saitha tsoithat, saitha alethsang, naiuso saitha athat lükankei. Ngo APAOU asam Goa noin, naiuso Ngo asam Ijip ainou niasan.

³⁷Jü ngiokhem naiuso athoilut nouso chikü asamüh angio lü-ang. Ngo APAOU noin.”