Read Khiamniungan Naga Levi 2 Bible Online

Levi 2 - Khiamniungan Naga bible

Levi 2

¹Tilai khaiunia ajantsoüh APAOU dongai chih chaithio kanne, apaüh ayating nung wonne thaonekü the-ela. Apaüh nung tü olip-khiam naiuso chiai laosang angannyamtsün lolutküta

²nung Aron thsaosithso mesonhoi dongai kankü shi-e. Meson nou wonne phalam tsak, naiuso olip-khiam naiuso angannyamtsün laosang nouso loküta nung apem APAOU hau chaithio kiuji ta ii tsak amthang nai jah-e. Nung chih chaithio angannyam nou APAOU monglengiji.

³Nung chih chaithio apoi nouso mesonhoi kotha nou noin; tiautenai nung APAOU hau chih chaithio kiutsün ainou losanphe, nung thatü asio noin.

⁴Nung chaithio kim tsak mongko themtsai naito, nung phoplao tsühakü shantsün theau noin. Nungto olip khiam nouko wonne lao-ekü themtsai teithamkü the-ela, tsüdekünai olip-khiam nou penkü themtsai shanela.

⁵Naiuso achaithio nung atsaotsün lak nai tsaokü themtsai tsak naito, nung phoplao tsüthiokü wonne nou olip-khiam ko lao-ekü jah-iau noin.

⁶Nung nelangkü loneküta nungtü olip-khiam thsalutkü ni nung chaithio tsak lüthio.

⁷Naiuso chaithio nou atsaotsün lak nai tsaokü kiutsün naito, nung wonne naiuso olip-khiam nou shantsün theau noin.

⁸Ni nung chaithio APAOU dongai kankü ashi, naiuso nung meson hau lükiu, apaüh nung amthang nai kankü khu-e.

⁹Nung apem APAOU hau kiuwaniu ta ii hankü meson nou ajantso lo-e, naiuso apaüh nung amthang nai jah-e. Nungh chih chaithio angannyam nou APAOU monglengiji.

¹⁰Nung APAOU hau kiutsün chih chaithio ainou losanphe, apoi chaithio nouso mesonhoi kotha nou noin, nung thatü asio noin.

¹¹Asamüh chih chaithiotsün tsaktso phoplao thiokü tsüshanela; asamüh APAOU hau chih chaithio thiotsünko tilaitso phoplao tsüdekünai liukhiam tsükankei-ela.

¹²Asamüh pon pungkü yamkantsün ayating pai-eiu nung APAOU hau chaithio kanau noin, lüko nungto amthang nai ajah au tsüde.

¹³Chih chaithio pungkü nouko jem lüthio, tiautenai jem nung Goa naiuso asam jetko athalou-e liko tsaji.(Asam chaithio pungkü nouko jem lolutau noin.)

¹⁴Tilai asamüh be-eiuyam pai-eiu chongting eiusantsün APAOU dongai chaithio kanne, nung chih nou tsaokü tsüdekünai pannekü thio-ela.

¹⁵Nungko olip-khiam laolutküta nung chiai angannyamtsün laosang lülolut.

¹⁶Meson nou ayathsüotsün nianko nung chih ajantso naiuso olip-khiam ta jah-e, naiuso APAOU hau chih chaithio tsakli angannyamtsün laosang apem jah-e.