Read Khiamniungan Naga Levi 21 Bible Online

Levi 21 - Khiamniungan Naga bible

Levi 21

¹APAOU nou Mosa tü Aron thso mesonhoi nousotü ngioau thoilutkü ngiom, “Tilai tsammonghoi ongko tsak eanji, nung meshen nyiu, po, thso, thso menyiuthso, dei,

²tsüdekünai apa tsamkhaiuko nou tsamsigoh moyangkün nuohai tü simkü,

³nungtaoko meawan akam nai haoson lohakü mesonhoi saulünou meshen chija amkham yamko tsüyanthsüokü tsü-iula-ela.

⁴Apaüh meshen tsammongphe ta meshen chija amkham yamko tsülochinyanloela.

⁵“Meson sauühtso apa amongsaiu nai noin ta hanau khaiu, sonpun, tsüdekünai apa pem ainou chongmai titso tsü-iuwanela.

⁶Apa siokü theau noin naiuso jünian ta amiam tsülolutau noin. Apaüh Ngü hau chih-chaithio kiujiphe apa siokü the-ela.

⁷Meson tsaküh ajisiwop chhi nai noikü shitsün menyiu, asangting tsüdekün menyiu, tsüdekünai tsamsigoh yangkü noitsün ainou pungetsün menyiu tsamsigoh tsüyangela, tiautenai apa asio noin.

⁸Khaiuniahoi nousoüh meson nung asio ta vesanau noin, tiautenai apaüh Ngo hau chih-chaithio nou thioji. Ngo APAOU, Ngo asio naiuso Ngo jü khaiuniaso asio au shanji.

⁹Meson ün menyiuthso tsak ajisiwop iula nai, apaüh meshen po lomiamji, apa jekkatkü wanau noin.

¹⁰“Akhengting Meson nou apa khaiu ai atsomkiutsün khaiutsom tsalukü apa meson neshe thoau losiokü taiuphe, apa amongsaiu nai noin ta hanau apaüh meshen khaiuo tsühet thekü tsüdekünai neshe chipekkü tsüthe-ela.

¹¹Apa to Ngo tü losiokü noin naiuso apa chija am- kham yamko tsüyanthsüokü tsüthe-e, tsüdekünai jü asio Nejenkhio le-ankü, eantsün mea noitsün tsamai napkü, apa po tsüdekünai apa nyiu thalüko, nungso ainou yanthsüokü the-ela.

¹³Apaüh asangting meso tsamsigoh yangau noin,

¹⁴jihi, akoman taiutsün menyiu, tsüdekünai ajisiwop chhikü shitsün menyiu tsak tsüthe-ela. Apaüh meshen kau mongko nou asangting meso lu tsamsigoh yange.

¹⁵Tsüdekünaito, apa thsoso asio theau noitsün nung amkham yamko tsüyanthsüokü noi-e. Ngo APAOU noin naiuso Ngo apa Akhengting Meson tsak theau mothikü jonsankü taim.”

¹⁶APAOU nou Mosa hau

¹⁷Aron tü ngioau thoilutkü ngiom, “Athsaosithsoso ongko saulünou pem nai tsaosilao tso tsak sunkü noitsün nou Ngo hau chih-chaithio tsükiu-e. Nung ashiau noitsün atao chikü thaiutha noi-e.

¹⁸Niopek, chiune, niosingan alothe, tsüdekünai haoson tsüpungkü,

¹⁹hok-kiang si phakiang,

²⁰sankao, memang, niovei tsüdekünai khunkia suntsün, naiuso athsülem khaiunia, nungtin pem tsaosilao tsotsak noitsün khaiunia nou chaithio tsükiu-e.

²¹Aron thsaosithsoso meson sau da pem nai tsotsak tsaosilao sunkü noin apaüh Ngo hau chih-chaithio tsükiu-e.

²²Nungtin khaiunia nou Ngü hau kiutsün chih-chaithio nouko asiochih chaithio naiuso thatü asio chih-chaithio nemtso heau shio-e;

²³lüko tiautenai apa pem nai tsotsak tsaosilao sunkü noiphe, asio nekhong taiutsün tsüdekünai amthang shimkü lüko tsüshiau noin. Apaüh nung asio jengtsaiu nouso tsülochinyanau noin, tiautenai Ngo APAOU naiuso Ngo nungso siokü hau shanji.”

²⁴Nungti Mosaüh Aron thsoso tü naiuso Israel khaiuniahoi chikü hau chite.