Read Khiamniungan Naga Levi 23 Bible Online

Levi 23 - Khiamniungan Naga bible

Levi 23

¹APAOU nou Mosa hau

²Israelhai amkham kiuau kamshinai don yamko sümai nouso thaiutha nung ngiokhem nouso kiu.

³Asamüh chhi chhiau ajekhaiu luoknyi noin, lüko chinyatnyi nung aalo ajekhaiu noin ta lüyangsan. Nungnyi to ti lachhi, lüko amkham kiuau akamshi. Asam to tiai kihlünou nung Chinyatnyi nou APAOU kotha nou noin.

⁴Nung sümai nouso asamüh ataothat kiutaiu nouko lüpungpeng.

⁵Yankü khutsün sümai, sübao APAOU asuhat kiuau saoheji, nung chongting alei chekü pülenyi nouko ajenap taoko tsaloji.

⁶Chekü pungonyi nouko nai Phoplao tsüthiokün Themtsai Sümai tsaloji, naiuso chinyatnyi thaiutha asamüh phoplao thiokü shantsün themtsai tsühe-ela.

⁷Nungso ajekhaiu chongting nyi nouko asamüh ti tsüchhikü amkham kiuau kamshi-e.

⁸Chinyatnyi thaiutha asam chih-chaithio APAOU hau lükiu. Chinyatnyi nouko nai asam loüh amkhamau akamshi, lüko asamüh nungko ti chhi lachhi.

⁹Tilai asam, asam hau APAOU nou kiutsün goumchi nai nape naiuso be-eiuyam yame, asamüh chongting tsopong nou meson dongai kankü lükhu.

¹¹Apaüh nungh asam loau thaiutha APAOU hau amothi chaithioli thio-e. Meson nou nung Chinyatnyi than nyi nouko kiu-e.

¹²Asamüh khülam chaithio kiutsün nyi nai, ajah chaithioau ti alothe tsüsunkün pon tsak shelokü onnemokpongtso tsak hakü kiu-e.

¹³Nungko hakü asamüh chih chaithioau wonne ko olip khiam laowekü tsoi nime thio-e. Nung chaithio angannyam nou APAOU monglengiji. Naiuso asamüh nungko hakü theng liter tsak chaithio kiu-e.

¹⁴Asamüh nung chaithio nouso: chih ayan, nungh asang, atsao, tsüdekünai themtsai ko hakü tsankü noitsün lüko APAOU hau mokiukün lektso ti lahe. Nung ngiokhem athsaosithsosoüh ashiau atao chikü thaiutha kankei-e.

¹⁵Asamüh APAOU hau tsopong kankü shitsün Chinyatnyi nou phiai tsalokü anuojet chinyat thunkü lüvelo.

¹⁶Chinyatnyi ajekhaiu phiko nou ajekhaiu pungo nyi nouko APAOU hau loüh amao khülam chaithio lüthio.

¹⁷Tsamkhaiu pungkü nou themtsailop nime kankü shiküta nung APAOU hau amothi paopei tsakli lükiu. Themtsailop pungkü nou wonne ko phoplao hakü tsoi nime nou saitsün the-ela, naiuso nungh APAOU hau chongting be-eiuyam chaithio kiu-e.

¹⁸Naiuso nung themtsai nouko hakü hoikam nou pon tsak shelokü noitsün onnemokthso chinyat, jangtsopong tsak, naiuso onnemok pong nime alothe ti tsüpokü thio-ela. Nungso chih chaithio naiuso theng chaithio nouko aikü ngüsoüh APAOU hau ajah chaithio tsak kiu-e. Nung chaithio angannyam nou APAOU monglengiji.

¹⁹Naiuso wonpong tsak angei chaithioau naiuso onnemokpong nime pon tsak shelokü noitsün nung nokmei chaithio au kiu-e.

²⁰Meson nou nung themtsai onnemok nime ko meson thaiutha ko APAOU hau amothi paopei kiu-e. Nung chaithio nouso asio noin.

²¹Nungnyi nai asam sauüh chhi lachhi, lüko amkham kiuau akamshi. Athsaosithsoso sauhai tiai kihlünou ashiau atao apem thaiutha nung ngiokhem nouso kankei-e.

²²Tilai asamüh asam eiu ai be-eiuyame, eiu athun saokü to chih lalamlo, naiuso apoiantsün chih kamloau laokü lakhu; nungso tsosiluhai si gohmao khaiuniahoi hau lütaiukiu. APAOU nou asam Goa noin.

²³Alei chinyat nou da chongting ajekhaiu nouko amothi aalo ajekhaiu tsak lünoi, naiuso tilai jangong mate, amkham thaiutha akamshi.

²⁵APAOU hau chih chaithio tsak lükiu naiuso asamüh meshen chhisiya ti lachhi.

²⁶Alei chinyat nou da chenyi nouko khaiuniahoi angei kankü khuwanau thaiuthako ponthon amkham shantsün ajekhaiu noin. Nungnyi nai asamüh titso laheting, amkham kiuau kamkü ashi, küta APAOU hau chih-chaithio akiu.

²⁸Nungh ajekhaiu ko chhi lachhi, tiautenai nungh angei kankü khuau amkham kiutsün ajekhaiu noin.

²⁹Ajantsoüh nung ajekhaiuko tsotsak henai apa loto Goa ün khaiunia ongko tsak ta tsüvesanha-e.

³⁰Naiuso ajantsoüh nung ajekhaiu ko tsotsak chhi nai, APAOU nou apa loatkü wane.

³¹Ngüso tilüsongai kihlünou, nung ngiokhem athsaosithsoso apem thaiutha noi-e.

³²Nung Alei nou da lükaonyi nouko ajenap ai yanou ajekhaiu che nyi nou saokü nung ajekhaiu asamüh amothi aalo ajekhaiu ta lütaiu, nung taoko titso tsüheau noin.

³³Asolotsün sümai nung alei chinyat nou da cheküpungonyi nouko tsalo nou chinyatnyi saokü tsülaokü saoheji.

³⁵Nung ajekhaiu nouso chongting nyi nai amkham kiuau asam akamshi naiuso meshen chhisiya titso lachhi.

³⁶Ajekhaiu chinyatnyi pungkü asamüh chih chaithio kiu-e. Petjeinyi nouko loüh amkham kiuau akamshi, naiuso chih chaithio akiu. Nung amkham kiutsün ajekhaiu noin, nungtiphe asamüh chhi tsüchhiau noin.

³⁷(Nungso asamüh chih-chaithio kiuau, ajah chaithio thioau, khülam chaithio thioau, aloat chaithio thioau, naiuso theng chaithio kiuau ajekhaiu tsütokü potsün amkhamau kamshitsün tsangkü APAOU asuhat kiuau nou donyam sümai noin.

³⁸Nung sümai nouso asaita chinyatnyi noitsün tü aphop noin, naiuso nung chaithio nouso asam ün asai paopei nouso tü aphop, asam chaithio nung ngiomongshinge thawao-itsün thaiutha naiuso asamüh APAOU hau kiutsün nung asam amongchio chaithio nouso noin.)

³⁹Tilai asamüh asam eiu be-eiuyam kheme, alei chinyat nou da ajekhaiu chekü pungonyi nouko nai yalokü nung sümai chinyatnyi thaiutha lüsaohe. Chongting ajekhaiu nung amothi aalo ajekhaiu tsak noi-e.

⁴⁰Nungnyi nai asam aimong ainou ameiting pai-eiu ajantso lülo, naiuso mepai shah naiuso ashah saokü noitsün paisha amomo lülo, küta APAOU asam Goa asuhat kiuau don sümai lüyalo.

⁴¹Nung chinyatnyi lümaihe, nung ngiokhem athsaosithsosoüh ashiau tao chikü thaiutha kankeiau noin.

⁴²Israelhai apem chinyatnyi thaiutha asolotsün nai kihau noin,

⁴³nungti athsaosithsosoüh Israelhai APAOU nou Ijip ainou niasantsün taoko asolotsün asaitha nai kih au shankiu ta nge-e. Apa APAOU asam Goa noin.

⁴⁴Nungti nung yamko Mosaüh Israelhai hau APAOU lomsanau donyam sümai nouso kankeiau ngiokhem nouso kiukü noiküla.