Read Khiamniungan Naga Levi 24 Bible Online

Levi 24 - Khiamniungan Naga bible

Levi 24

¹APAOU nou Mosa hau

²Israelhai tü nung ngio nouso kiuau ngiom: Tson asaichi ta nyailutkü noiau thaiuthako ameiting naiuso asanglingteng olip-khiam nou tson nai thioau kankü anap.

³Nung Thatü AsioThang nai nekhongjeitsün chiai Ngiokhem Paidan khako APAOU noitsün nai ahom saokü nyailutkü noiau asham tsütokü nung tson nou ta Aronüh sonlute. Nung ngiokhem nou ashiau atao chikü thaiutha kankei-e.

⁴Aronüh asanglingteng chaiou tson taiutsün nai APAOU noitsün khako nung asaita nyailutkü noi süne tsünoi ta tson nouso tü paotsange.

⁵Ni wonne tsoi chekü nime loküta nungüh themtsailop chekü nime lüshan.

⁶Nung themtsailop luok luok au thekü ahoi nime shanküta nungh APAOU noitsün khako puo chinai asangling chaiou nou lopokkü taiutsün chiai lütaiu.

⁷Nung ahoi pungkü chiai asangling angannyam nyamtsün lolutküta themtsai liko APAOU hau chih-chaithio thaiutha lükiu.

⁸Ashiau atao chikü thaiutha Chinyatnyi Anuo pungkü nung APAOU khako taiukiu-ela. Nung asaita hau Israelhai ün chhisiya noin.

⁹Nung themtsai Aron naiuso apa thsoso kotha nou noin, naiuso ngüsoüh nung asiothang tsak nai heau noin, tiautenai nung chih haoson mesonhoi thaiutha APAOU hau kiutsün thatü asio noin.

¹⁰Dan kau ainou Dibri ün menyiuthso, Israel nyiuhai nian nou Shilomit naiuso apa Ijiphai khaiunia tsak nou thso noiküla. Nungh asaothang nouko nung khaiunia nou Israelhai tsak koli-ekü noiküla. Ali-etsün taoko apaüh Goa athesan kiu, nungtiphe ngüsoüh apa Mosa dongai nialokü khu,

¹²küta apatü ehükü taiu, naiuso nung khaiunia noutü ti chhi-e ngüsotü ngio-iau APAOU tü taiukü noiküla.

¹³APAOU nou Mosa tü ngiom,

¹⁴“Nung khaiunia nou asaothang pe-chiai lüniashi, khaiunia pungkü sauhaiüh apa athesan kiutsün lulakü noin ngüsoüh nung khaiunia khaiu ai ngüso pha thanglute, küta nungüh apa aphio noin ta mitha kiu-e, naiuso nungthankü hoikam athum nou apa lung nou yakkate.

¹⁵Küta sauüh Goa athesan kiu-e apaüh nung mai nou

¹⁶apa loatkü wane ta Israelhai hau lüchite. Sau Israelhai tsüdekü gohmao khaiunia Israel nai kihkü noin, nungso sauüh APAOU athesan kiu-e, apato hoikam athum nou yakkatkü wane.

¹⁷“Sauüh ajantso loate, apa lüko loatkü wane,

¹⁸naiuso sauüh ajantso ün thainian loate, apaüh nung thangko kiushi-e. Ngioyam athang nou aa tsak liko aa tsak ta noin.”

¹⁹“Sauüh amao khaiunia tawai-e, apaüh ti in chhin nung apa tü lüko chhishi-e.

²⁰Apaüh uo tsak longek naito, apa uo lüko tsak longekshi-e, apaüh khaiunia niovei lopek kiunaito, apa niovei lüko tsak lopekshi-e; apaüh huo tsak thaowan naito, apa huo lüko tsak thaowanshi-e. Apaüh amao haitü tilüsong tawaikü chhi-e, apa tü lüko nungti lu laokü chhishi-e.

²¹Sauhaiüh thainian loate, nungliko thamshi-e, lüko sauhaiüh khaiunia tsak loate, apato loatkü wane.

²²Nung ngiokhem nou Israelhai naiuso asam ongko kihatsün gohmao khaiunia apem mongthiokü noin, tiautenai Ngo APAOU asam Goa noin.”

²³Tilai Mosaüh nung ngio Israelhai hau chite, ngüsoüh nung khaiunia nou asaothang pe-chiai nialokü shiküta apa lung nou yakkat. Nungli Israelhaiüh APAOU nou Mosa tü thoiluttsün khekkü chhin.