Read Khiamniungan Naga Levi 25 Bible Online

Levi 25 - Khiamniungan Naga bible

Levi 25

²Israelhai hau nung ngiokhem nouso kiuau thoilutkü ngiom. Tilai asam APAOU nou asam hau kiutsün goumchi nai nape, asamüh pon chinyat nou pungkü eiu tsü-atsün tsangkü APAOU lomsanau noin.

³Pon luok asamüh asam eiu ai lelu nou shiuthio-e, naiuso pon luok asamüh asam sainaoshep eiu nai paikia nouso thsomane, naiuso pon luok asamüh asam chihsikhiam yamkhame.

⁴Lüko pon chinyat nouto, nung gohthang thaiutha thumkü aalotsün, APAOU hau losiokü kiutsün pon tsak nou noi-e. Asam eiu nai lelu tsüshiu-e, tsüdekünai asam sainaoshep akia nouso tsüthsomane.

⁵Asam eiu ai chija samsantsün tilünou lakamlo, naiuso sainaoshep akia tsüthsomankün pai nouso ainou lakamlo, nung gohthang thaiutha nung thumkü aalotsün pon tsak noin.

⁶Nungh ponko lelu tsülethio lüko asam thaiutha, asam ün suaso thaiutha, asam chaichenhoi thaiutha, asam ko aikü kihatsün gohmao khaiuniahoi thaiutha,

⁷asam ün tsam thainian thaiutha, naiuso asam liu ai noitsün liuthainian nouso thaiutha eheau chih eppe. Nungko sungtsün alum heau shio-e.

⁸Asamüh pon chinyatjam chinyat lüvelo, nung apem kamkü nai aopülekü lükao pon noi-e.

⁹Nungaih alei chinyat nou da ajekhaiu che nouko, nung Atuhsan Ajekhaiu, nai goumchi athum thapekkü jangongmat au khaiunia tsak lühong.

¹⁰Nungti asamüh Aopungo Pon nung mothikü losioküta goumchi ko kihtsün chikü dongai khaiuniatsüo nou velutau noin. Nung pon nai jengtsaiu jantaiukü noitsün chikü aya paou hau tsüdekünai apa thsaosithsoso hau laokiushi-ela, ajantso sua au janankü noinai nung apa tsammong hau laokü kiushi-e.

¹¹Asamüh asam eiu ai lelu tsülethio-e, naiuso yaang eiusantsün chih be-eiuyam tsüyamkame, tsüdekünai sainaoshep eiu nai paikia tsüthsomankün ainou shep tsükamlo-e.

¹²Ponthum nou asam thaiutha asio noi-e; nungko asamüh eiu ai eiusantsünlu heau noin.

¹³Nung ponko jengtsaiu janankü noitsün apem aya paou hau laokü kiushi-e.

¹⁴Nungtiphe tilai asamüh meshen Israelhoi hau goh jane, tsüdekünai apa ainou goh tuhlu-e, nungko tsaküh tsak tü kausaiekü tsüchhi-ela.

¹⁵Gohmai nou nungthan laokü kiushitsün pon khako nung gohthangko titithatso sunge nung saokü mongthiokü la-eau noin.

¹⁶Pon piakü naito, amai nou tsokkü sao-e, lüko pon thsaokü lu naito, amai nou nyape, tiautenai chihle sungtsün thatluküta nunglilu ni hau jankiuau noin.

¹⁷Nungtiphe asamüh meshen khaiunia Israel ongko tsaküh tsak tsükauate kü, APAOU asam Goa angio ang-au noin.

¹⁸Goumchi nouko asam alokü kihau thaiutha asamüh APAOU ün ngiokhem naiuso athoilut nouso apem angio lü-ang.

¹⁹Naiuso goh nou meshen eiu eiusane, naiuso asam thai meankü heshiu-e, küta asam alokü noi-e.

²⁰Naiuso sauüh tsülethiokünai naiuso be-eiuyam tsüyamkünai pon chinyat nouko heau ti the-e ta ajantsoüh sangnai,

²¹APAOU nou nung gohthang pon luok nouko ouk kiu-e, nungti asam pon nime thaiutha heau saiukü noi-e.

²²Tilai asamüh pon petjei nouko chihle lethio-e, asamüh pon luok nouko yamkhamtsün nungtao saokü hekü noi-e, naiuso nungh pon asamüh lethiotsün moyamkün saokü eheau saiukü taiu-e.

²³Asamüh goh nou asaita theau thaiutha tsüjanela, tiautenai nung asamüh tsütha; nungh Goa ün noin, naiuso asam nung chhi-iau taiukiutsün gohmao khaiuniahoi khekkü noin.

²⁴Tilai goh nou janji, athahpao nou nung laokü tuh au atsangshei noitsün tsak theau noin.

²⁵Israelhai tsak tsosilu iulakü apaüh taiu nou goh jananau lu iulanai, apa ün ashimteng tsammong nou nung laokü tuh au noin.

²⁶Khaiunia nung laokü tuhshiau tsammong tsünoikünai phikü apa tsüomeikü iulashiküta laokü tuhshiau noi-e.

²⁷Nungti naito apaüh nung tuhtsün khaiunia hau nungthan Alaokiushitsün Pon saokü nouko apoitaiu pon nouso thaiutha thathamkü chai kiuau noin, nung apa gohthang thaloshitsün taoko.

²⁸Lüko apaüh nung goh laokü tuhloshiau chai saiukü tsütaiukü naito, nungh nungthan Alaokiushitsün Pon saokü atuhpao nou oukong ai noi-e. Nungh Alaokiushitsün Ponko naito athapao hau nou laokü kiushi-e.

²⁹Khaiunia tsaküh pe-pejeikü noitsün noknio mongko tsam tsak jan nai, apaüh nung ajan ajekhaiu tü yalokü pon tsak mongko to laokü tuhshiau ayam noi-e.

³⁰Lüko apaüh nungpon mongko laokü tsütuhshikü naito, apaüh müjam tuhshiau ayam nou tsünoishi, nungtiphe nung tsam atuhtsün naiuso apa thsaosithsoso ün asaita hau jengtsaiu haoson tsak iulaji, nungto Alaokiushitsün Pon nouko laokü tsükiushi-e.

³¹Lüko pe tsüpekün nok nouso nai noitsün tsam nouso eiu khekkü nai ayam kankei-e, nungsoto athapao nou laokü tuhshiau ayam noin, naiuso nungsoto Alaokiushitsün Ponko laokiushi-e.

³²Lüko Levihai hau sonkiutsün noknio nouso nai Levihaiüh to titaokolünou ngüso jengtsaiu laokü tuhshiau ayam sate.

³³Nung noknio nouso ongko tsam tsak Levihaiüh janthiokü noikü nung laokü motuhshikünai nungh Laokükiushitsün Ponko laokiushi-ela, tiautenai ngüso noknio nousoko Levihaiüh thatsün tsam nouso to Israel khaiunia ongko ngüso ün asaita hau jengtsaiu noin.

³⁴Lüko Levihai noknio nouso lemkü noitsün thsanyan goh nung tilaitso tsüjane, nungto asaita ngüso tengkam noin.

³⁵Asam meshen Israel khaiunia asam dongko shimkü kihkü meshen chija tsaau tsüshiokü tsosilu iulanai, asamüh apa hau chaichen khaiunia tsak hauli kiuhaau noin, nungti apa asam dongko tsülaokü kih au shio-e.

³⁶Apa tü anü titso lalo, lüko Goa tü angio angkü akhaiunia Israelhai tsak nou asam dongko lükih-i.

³⁷Ni apa hau chai laiukiu nai apa tü anü hakü lasao, naiuso apa hau jankiutsün chihsikhiam khako alesan layam.

³⁸Nung APAOU asam Goa sauüh asam Kanan goumchi asam hau kiuküta asam Goa theau asam Ijip ainou niasan nung apa ün athoilut noin.

³⁹Israel khaiunia tsak adongko kihtsün thatü tsosilu iulakü apaüh meshen chija nihau sua tsakli janthio nai, ni apa hau sua chhisiya chhiau lakiu.

⁴⁰Apa adongko chaichen khaiunia tsakli noi-e; naiuso nungthan Alaokiushitsün Pon saokü apaüh ni yathsüo-e.

⁴¹Nungtaoko apa naiuso apa thsosoüh ni letaiukü apa tsammong dongai laokü shi-e naiuso apa paosiposo tengkam dongai laokü shi-e.

⁴²Israel khaiuniahoi nouso APAOU ün suaso noin, naiuso apaüh ngüso Ijip ainou niasan, ngüsoto sua au tsüjanthioau noin.

⁴³Ngüso tü thsüokü tsaokü lakankei, lüko asam Goa angio lü-ang.

⁴⁴Asamüh sua tuh au poh nai, asam lemkü noitsün mele nouso ainou lütuh.

⁴⁵Asam ongko kihatsün gohmao khaiunia nouso ün thsoso lüko asamüh sua au tuh au shio-e. Nungtin thsoso asam goumchiko chetsinyimtsünso to asam tengkam iula au shiom,

⁴⁶naiuso asamüh asam thsoso ko ngüso tengkam tsakli taiukiuau shiom, nungko ngüsoüh ngüso aakihtsün lektso asam yathsüo-e. Lüko asamüh meshen Israel khaiunia saulünou thsüokü tsaokü tsükankei-ela.

⁴⁷Asam ongko kihatsün gohmao khaiunia tsak memei iulanai, naiuso meshen Israel khaiunia tsosilu iulakü nungh gohmao khaiunia hau meshen pem nung sua tsakli janthiowan nai tsüdekünai apa tsammongso tsak hau janthio nai,

⁴⁸apa janthiowan phiai lüko apa laokü tuhshiau apaüh loüh ayam thakü noin.

⁴⁹Nung apa po ehen, deiso, apa ashimteng tsammong tsaküh apa laokü tuhshiau shio-e, tsüdekünai apaüh chija shiosanloau shiokü chai chenlokü noinai apa chija meshen pem khaiuniatsüo nou tuhsanau shio-e.

⁵⁰Apa tuhtsün khaiunia nouko apa epeküta, nungthan Alaokiushitsün Pon saokü apa janthiotsün atao ainou pon nouso tü veau noin, naiuso chaichen khaiunia tsak hau kiutsün mephaiu mai thangko apa jashiau thaiutha amai kiuau noin.

⁵¹Pon apoitaiutsün haove likü apa tuhtsün chaimai haoson tsak apaüh lao- kiushiau noin,

⁵²

⁵³nung apa ponthum nai chaichen thekü shitsünli noi-e. Apa tsampaoüh apa thsüokü tsaokü tsükankeiau noin.

⁵⁴Apa nung yam nouso tikotso tsüjashikü nai, apa naiuso apa thsoso nungthan Alaokiushitsün Pon nouko nai jashiau noin.

⁵⁵Israelhai tsak asaita sua theau tsüshio, tiautenai Israelhai khaiunia nung APAOU ün sua nouso noin. Apaüh ngüso Ijip ainou niasan; Apa APAOU ngüso Goa noin.