Read Khiamniungan Naga Levi 26 Bible Online

Levi 26 - Khiamniungan Naga bible

Levi 26

¹APAOU nou ngiom, “Sotsom nouso, tsüdekünai akhek nai, lung kheam nouso, a-amkhamau thaiutha lung langkü titso lashan. Ngo APAOU asam Goa noin.

²Donyam nai sümai nouso lükankei, naiuso Ngo amkhamtsün athang asulühat. Ngo APAOU noin.

³“Asam jüngiokhem nouso tsangkü kihnaito naiuso jü athoilut nouso angio-ang naito,

⁴Ngü atao tongtü nouko a-uo nou honge, naiuso goh nou meshen eiu eiusane, naiuso pai nousoüh eiu nou eiukiu-e.

⁵Sainaoshep pantsün tao lüko asam be-eiuyam tsülaokü noi-e, tiautenai asam chihsikhiam phopthiokü noi-e, naiuso lelu shiuthiotsün tao saokü asamüh sainaoshep pantsün atao noi-e. Asamüh heau aiutsün apem asamüh epe, naiuso asam goumchi nai asam aalokü kih-e.

⁶“Ngo asam goumchi nai nokmei nou kiu-e, naiuso asam saulun tsühatkü sai-e. Ngü asam goumchi ainou ahattsün thainian nouso lowane naiuso nungko ehli tsünoishi-e.

⁷Asam ehoi khako asamüh shiolotsün noi-e;

⁸asam pungoüh ehoi tsom tsak nou shiolo-e, naiuso tsom tsak nou heng che shioloau ashiolotsün noi-e.

⁹Ngo asam ouk kiu-e naiuso asam hau methso piakü ouk kiu-e, Ngo asam ko shanetaiutsün athalou-e jü haoson kankei-e.

¹⁰Asamüh be-eiuyam piakü yame, naiuso nungti lüko ponkengko yamkantsün nungso ayan nou thioshiau athaiutha athang kiuau ajantso wanane.

¹¹Ngo asam ongko Jü asio Nejenkhio nai kih-e, naiuso Ngo asam ainou tilaitso tsükhushi-e.

¹²Ngo asam ko ha-e, Ngo asam Goa the-e, naiuso asam Jü khaiuniaso noi-e.

¹³Asam loto sua tsütheshiau Ngo, APAOU, asam Goaüh asam Ijip ainou niasan. Asam kha khemkü napkü iula-itsün oukong Ngo lopek-iu naiuso Ngo asam khaiu ngükü chükü tsakei-au taiukiu-iu.”

¹⁴APAOU nou ngiom, “Asamüh jü athoilut nouso angio tsü-angkü naito, Ngo asam hau angja kiu-e.

¹⁵Asamüh jü ngiokhem naiuso jü athoilut nouso angio ang-au nankü Ngo asamko athalou-e shantaiutsün lothean naito,

¹⁶Ngo asam hau angja kiu-e. Ngo asam dongai ameila au tsüshiokün akiasiya naiuso kiashi sübao nou asam niopek iula-e naiuso asam aa nyomane, nungh aküothe nouso kankü shi-e. Asamüh asam lelu shiuthio-e, lüko nungso tsüsamkü yaang iula-e, tiautenai asam ehsoüh asam shiolowane, naiuso asamüh a-santaiu nou heane.

¹⁷Ngo asam thako tsa-e, nungtiphe asam meüh shiolowane, naiuso asam tü chinyantsünsoüh asam khako nokshinge; naiuso sauüh tsükomkünai lüko asam khuthiowane, nungti asam thatü thsüokü lekkate.

¹⁸“Nungso chikü thawaokütün phiai lüko loüh asamüh jüngio tsü-angkü naito, Ngo asam hau angja kiutsün chinyatjam phopkü lopia shi-e.

¹⁹Ngo asam ün athsüoting abülom lopek-e; nungko a-nou tsü uo-e, naiuso goumchi nou sonli jüokü naiuso wailaakü noi-e.

²⁰Asamüh chhi kongkü chhitsün alesan ti tsünoi-e; tiautenai asam goumchiüh eiu nou tsü-eiusane, naiuso pai nouso tü eiu nou tsü-eiu-e.

²¹“Asam loüh ngütü angio ang-au tsülaokülu nan naito, Ngo loüh angja chinyatjam lopiashi-e.

²²Ngü ahateng thainian nouso asam ongai honge, naiuso ngüsoüh asam thsoso jeiate, asam thainianso loate, naiuso asam thatü thsaokü poishi-e, nungti asam ün yam nouso aodangkü le-ane.

²³“Nung angja chikü kiukü phiai asamüh loüh Ngo tü tsü-anglukü, lüko tsülaokü Ngo lochikiu naito,

²⁴nungaih Ngü asam thako tsakü asam hau nungthaiuko nou tü chinyatjam phopkü athsüoting angja kiushi-e.

²⁵Sam athalue lotheantsün thaiutha asam khako ehli kankü shikü asam hau angja kiu-e, naiuso asam soloau thaiutha asam noknioso ai kamshi lüko, Ngo asam ongko ameila au tsüshiokün akiasiya honge, naiuso nungso asam ehso phamongai asam anapau tsümongchio lüko napanau sunge.

²⁶Ngo asam hau eheshiu kiutsün yam kiapane, nungti menyiu che nou ngüso themtsai tsaiau ngüso chikü thaiutha lak tsaklu poh-e, naiuso asam hau themtsai thatkülu kiu-e, naiuso asamüh nung apem helüko, asam loüh naiulutkülu noi-e.

²⁷“Nungso chikü thawaokü phiai lüko asamüh Ngo lochikü, Ngo tü angio angtsün tsülaokü nan naito,

²⁸nungaito Ngo jü amongmat nouko asam thako tsa-e, naiuso nung thaiuko nou tü chinyatjam phopkü asam hau angja athsüoting kiu-e.

²⁹Nungai asam tü anaiu nou thatü thsüophe, asamüh meshen thsoso he-e.

³⁰Ngo king nouso ai asamüh amtsün akamthang nouso lothe-e, angannyam jahtsün amthang nouso chinekü wane, naiuso asam meapem nouso loiankü noitsün sotsom nouso chiai yaklute. Athsüoting amongmat nouko

³¹Ngo asam noknio nouso lotheane, naiuso asam ün amkhamthang nouso lomowane, naiuso asam ün aloat chaithio nouso tsülo-e.

³²Asam ehsoüh asam goumchi thalonai alotheantsün nung thatü thsüokü lekkatau lümeikü Ngo asam goumchi moisemkü lotheane.

³³Ngo asam thako ehli kankü shiküta asam gohmao goumchi nai pengpuni-e. Asam gohthang aodangkü naiuso noknio nouso lothekü leane.

³⁴Naiuso nungaih asamüh aalo tsükiukünko thumkü aalo pon nouso nung goumchi nou koihe-e; asam meshen ehso goumchi nai thalokü khuwantsün tao chikü goh nou aodangkü naiuso thumkü aalo nai noi-e.

³⁶“Sauhai thalokü khuwankü noin, ngüso thatü lohatkü, asheih nou paithsam sipsiptsün lunai lüko khuthiowane. Ehli taoko asam tü komkeitsünli, asam khuthiowane, naiuso asam dongko ehoi shimkü tsünoi lüko asam loiane.

³⁷Tilai sauüh asam tü tsükomkünai asam tsaksitsak ko thonge-e, naiuso asam ehoi nouso khako tsaau oukong tsünoi-e.

³⁸Asam akhothiotsün goumchi nai eane, küta ehoi goumchi nai asam nyomane.

³⁹Asam ehoi goumchi nai asam thsaothsaokü poikü noinso asam angei si asam paosiposo angei nai tanatkü noi-e.

⁴⁰“Lüko asam thsaosithsosoüh to Ngo tsülotsün naiuso nanantsün asam paosiposo angei si ngüso ün angei thalo-e,

⁴¹naiuso loüh Ngo ngüso thako tsa-ikü ngüso ehoiso goumchi nai thalokü khuwantsün nai hongan shi-e. Aphiteng nai, tilai athsaosithsoso nyaplokü ngüso angei naiuso akhengshitsün mai thamankü shi-e,

⁴²Ngü jü athalo Yakob ko, Isak ko, naiuso Abraham ko shantaiutsün yangsanshi-e, küta jükhaiuniaso hau goumchi nou kiuau athalo lomongshi-e.

⁴³Chongting nai ngüso amongling saiukü epau thaiutha nung goumchi ko kihtsün khaiunia nouso chong komankü hau noin, naiuso jüngiokhem si jü athoilut nouso leantsün thaiuthako ngüsoüh thamaikü thamshiau noin.

⁴⁴Nungti lüko tilai ngüso ehoi goumchi nai ngüso nape, Ngo ngüso ehso moisemkü tsülomo-e, tsüdekünai tsüleane. Nungko jü athalue ngüsoko noitsün thone, Ngo APAOU ngüso Goa noin.

⁴⁵Ngo, APAOU, ngüso Goa theau, jükhaiuniaso Ijip ainou niashitsün tsangkü, tilai Ngo mele nouso hau jü oukong hane, ngüso paosipo ko athalue shantaiutsün Ngo lomongshi-e.”

⁴⁶APAOU nou Israel khaiuniahoi thaiutha Sinai King ai nai Mosa hau nung ngiokhem naiuso athoilut nouso kium.