Read Khiamniungan Naga Levi 27 Bible Online

Levi 27 - Khiamniungan Naga bible

Levi 27

¹APAOU nou Mosa hau

²Israelhai thaiutha nung ngiokhem nouso kiu. Amothi ngiomongshinge thawaotsün thaiutha ko APAOU hau tilai khaiunia tsak kiu-e, nungh khaiunia apin chaithat likü chai nungti kiunai jahshiau shio-e:

³Pohai pon khei ainou aoluok naitangkason=50 Nyiuhai naitangkason=30 Melohai Pon pungo ainou kheitangkason=20 Mesohai Pon pungo ainou kheitangkason=10 Nionyaothso melo pon pungo khemaitangkason=5 Nionyaothso menyiu pon pungo khemaitangkason=3 Melo pon aoluok khengaitangkason=15 Menyiu pon aoluok khengaitangkason=10.

⁸Sauüh ngiomongshinge shan nung khaiunia nou nyong chaithat ngoikü kiuau tsüshiokü thatü tsosilu naito, apaüh nung khaiunia nou meson dongai kankü shi-e, naiuso nung khaiunia nou kiuau shiokü hau meson nou amai nou anyap nai thatkiu-e.

⁹Nung ngiomongshinge nou thainian thaiutha thekü nung APAOU hau aluao lümeikü chaithio naito, nung APAOU hau kiutsün alum chaithio asio noin,

¹⁰naiuso nung khaiunia sauüh ngiomongshinge shan nung thaiutha thainian üli tsükiu-e. Apaüh kiunaito, thainian nemtso APAOU kotha nou noi-e.

¹¹Lüko nung ngiomongshinge nou amkham yamko tsüyanthsüokün thainian thekü APAOU nou loau lümeikün chaithio tsüdekünaito nung khaiunia nou thainian nou meson dongai kankü khu-e.

¹²Amei si tsümei likü meson nou amai nou thatkiu-e, naiuso nung amai nou athon the-e.

¹³Nung khaiunia nou laokü tuhshiau aiu naito, apaüh amai thatkiutaiutsün ko aphop haoson tsom tsak nouko khei thioshikü tuh au noin.

¹⁴Tilai khaiunia ajantsoüh meshen tsam APAOU hau thumkü losiokiu au yange, meson nou nung amei si tsümei likü amai nou lathate, naiuso nung mai nou athonting noi-e.

¹⁵Nung khaiunia sauüh APAOU hau tsam thumkü losiokü kiuwan, nungh laokü tuhshiau aiu nai, apaüh amai thatkiutaiutsün ko aphop haoson tsom tsak nouko khei thioshikü tuh au noin.

¹⁶Khaiunia tsaküh apa goh apaitso APAOU hau thumkü losiokiu au yangnai, nungko jinyak tsoi khei pungkü nouko tangkason che chaithat nai nung goh nouko lelu titso shiuji nung likü amai nou thatau noin.

¹⁷Apaüh nung gohthang Laokükiushitsün Ponthonteng nouko losiokü kiunaito, nungko amai titso tsülothsaokü apem kiu-e.

¹⁸Apaüh nung intso noikütün phiai losiokü kiunaito, meson nou nungthan Laokükiushitsün Pon saokü nouko ponve titso noishin nungh thalokü amai nou thatsane; naiuso lonyapkü nai amai nou thatkiu-e.

¹⁹Khaiunia tsak nou goh losiokü kiuwan phiai laokü tuhshiau mongchio nai, apaüh amai nou aphop haoson tsom tsak nouko khei thioshikü tuh au noin.

²⁰Apaüh nung chongting nai APAOU ainou laokü motuhshikünai khaiunia ajantso hau nung gohthang janan naito, apaüh nung laokü tuhshiau ayam kiapanji.

²¹Nungthan Laokükiushitsün Pon nung gohthang APAOU ün tengkam iula-e; naiuso nungh mesonhoi kotha noi-e.

²²Khaiunia tsaküh gohthang tsak apaüh tuhküta APAOU hau losiokü kiunai,

²³meson nou nungthan Laokükiushitsün Pon saokü nouko nou amai nou thatsane, naiuso nung khaiunia nou nung mai nung ajekhaiu noukolu thame; nung chai APAOU kotha nou noin.

²⁴Laokükiushitsün Ponko nung gohthang paou nou hau tsüdekünai apa thsaosithsoso hau laokü kiushi-ela.

²⁵Amai apem nyong tsoithat tsangkü thatela.

²⁶Thainian pungkü chongting pontsün APAOU kotha nou noianiu, nungtiphe nungto apa hau sauüh amongchio chaithio tsükiu-e. Jangtso thso, onnemok thso, tsüdekünai wonthso APAOU kotha nou noin;

²⁷lüko tsüyanthsüokün thainian chongting pontsün tsom tsak nouko haoson khei aphop hakü apin chaithat tsangkü laokü tuhshiau shio-e. Nungh laokü tsütuhshi naito, ajantso hau apin chaithat nai amai lokü janshiau noin.

²⁸Khaiunia lüko, thainian lüko, tsüdekünai gohthang lüko, APAOU hau nung koko ta tsüdekü kiuwantsün sauüh janshiau tsüdekünai tuhshiau tsüshio.

²⁹Khaiunia lüko nung kokota tsüdekü kiuwantsün laokü tuhshiau tsüshio; tuhshi naito apa loatkü wane.

³⁰Goh ai eiusantsün apem ainou chih lüko, shep lüko, che nouko tsak nou APAOU kotha nou noin.

³¹Khaiunia tsaküh nungko tsotsak tuhshiau aiu naito, apaüh apin chaithat nai kiu-e, loüh nungko hakü tsom tsak nouko khei aphop hoilut hakü kiu-e.

³²Tsam thainian che pungkü nouko apim tsak APAOU kotha nou noin. Tilai thainian nouso ve-e, che nou pungkü nouko tsak nou APAOU kotha nou noin.

³³Apao nou nung kiu-e ta tsülithat taiuau noin nungti lithat naito atsaosilaotso nou chosanau shiom, naiuso apaüh tsak nou liko amao tsak nou ta tsükiu-ela. Apaüh thainian tsak liko amao thainian tsak kiu naito, nung thainian nemtso APAOU kotha nou noi-e, naiuso nung laokü tsüshiosanloshi-e.

³⁴APAOU nou Israel khaiuniahoi thaiutha Sinai King ai nai Mosa hau nung athoilut nouso kium.