Read Khiamniungan Naga Levi 4 Bible Online

Levi 4 - Khiamniungan Naga bible

Levi 4

¹APAOU ün athoilut nouso

²ajantsoüh tsüngeankü lothekü angei sunnai nung ngiokhem nouso lükankei ta Israelhai hau chiteau APAOU nou Mosa tü thoilut.

³Nung angei suntsün khaiunia nou Akhengting Meson lathakü khaiuniahoi khako aphio nou kankü shinaito, apaüh apa angei thaiutha alothe ti tsüsunkün jangtsopong tsak APAOU hau aloat chaithio kiuau noin.

⁴Apaüh nung jangtsopong nou Nejenkhio nai naptsün khako kankü shikü akhaiu nai apa phaüh thangküta, nung APAOU khako loatau noin.

⁵Küta Akhengting Meson nou nung thainian she nou intso loküta Nejenkhio nai kankü nappe.

⁶Nung she nouko apa phakha chamthioküta asio nekhongjeitsün khako chinyatjam satpenge.

⁷Naiuso apaüh nung thainian she ajantso Nejenkhio nai angannyam jahtsün amthang aniokun kheam nouso tü peilute. Apaüh ashe apoi nouso Nejenkhio nai naptsün dongko aloat chaithio jahtsün amthang athan nai thsapenge.

⁸Nung jangtsopong ainou apaüh iiu apem, asansimong iiu nouso,

⁹awe naiuso nung tü suntsün iiu nouso, naiuso asan ainou ameiting haoson apem lo-e.

¹⁰Meson nou nung iiu nou loküta, ajah chaithio thaiutha amthang nai jah-e, nung nokmei chaithio thaiutha apaüh aloattsün thainian ainou iiu nou da chhikü shitsünlilu noi-e.

¹¹Lüko apaüh nungso akhun, atsah, akhaiu, ahok, naiuso asaih nou hakü asansimong nouso,

¹²asaothang pechiai luo kheppantsün amkham yamko asiothang tsak nai kankü khuküta apaüh nung pai jahkü taiutsün in nai jah-e.

¹³Nung APAOU ün athoilut ongko tsak Israel hoikam athum nou tsüngeankü angei sunloküta aphio iula nai,

¹⁴nung angei ngelatsünko aikü, hoikam athum nou angeiwan chaithio jangtsopong tsak kankü shiau noin. Ngüsoüh nung jangtsopong nou APAOU khako Nejenkhio nai kankü shi-e;

¹⁵hoikam nouko aheihoi nousoüh nung thainian khaiu nai ngüso pha thanglute, naiuso nungko thainian nou loate.

¹⁶Akhengting Meson nou nung jangtsopong she intso loküta Nejenkhio nai kankü nappe,

¹⁷nungko apa phakha chamthioküta nung akhongjeitsün ne khako chinyatjam satpenge.

¹⁸Apaüh Nejenkhio mongai angannyam jahtsün amthang aniokun kheam nouso da nung thainian she intso lolute; küta Nejenkhio nai naptsün dongko ajah chaithio thaiutha kankeitsün amthang athan nai lolute.

¹⁹Küta apaüh iiu nouso chikü loküta nung amthang nai jah-e.

²⁰Apaüh nung jangtsopong nou da lüko jangtsopong tsak angei thaiutha ko chaithio kiutsün tü chhikü shitsünli lu chhi-e, nungli apaüh khaiuniahoi angei thaiutha aloat chaithio shane, naiuso ngüso hau angei wankiu-e.

²¹Nungaih apaüh meshen angei thaiuthako jangtsopong jahkü chaithio kiutsünli, nung jangtsopong nou lüko asaothang pechiai kankü khuküta jahkü chaithio kiu-e. Nung chaithio hoikam angei kankü khuwanau nou chaithio tsak noin.

²²Nung APAOU ün athoilut ongko tsak nou nokpao tsaküh tsüngeankü angei sunloküta aphio iula nai,

²³nungaih apaüh nung angei noin ta ngelakü iulanai, apaüh won apong tsak ti alothe tsüsunkü chaithio tsak kankü shi-e.

²⁴Apaüh apa pha nung wonkhaiu nai thangkü nung amthang nou tü ajenapki, tiai ajah chaithio thainian nouso loatji, nungko loat au noin. Nung angei kankü khuwantsün chaithio tsak noin.

²⁵Meson nou apa phakhason nung thainian she nai chamthioküta, amthang aniokun kheam nouso tü satlute, naiuso apoi nouso amthang athan nai thsa-ane.

²⁶Küta nokmei thaiutha thainian nouso loatkü iiu jahtsün khekkü, apaüh iiu nouso apem amthang nai jah-anau noin. Nungli meson nou nokpao tsak angei thaiutha aloat chaithio nou kiu-e, naiuso apa hau angei nou wankiu-e.

²⁷Nung APAOU ün athoilut ongko tsak nou sauühlünou tsünge-ankü angei sunlo küta aphio iulanai,

²⁸nungaih apaüh nungto angei ta ngelakü iula nai, apaüh meshen angei mai ti alothe tsüsunkün won asang tsak chaithio kankü shiau noin.

²⁹Apaüh apa pha nung thainian khaiu nai thangkü, amthang noutü ajenapki nai noitsün tiai thainian nouso ajah chaithio thioji nungko loatau noin.

³⁰Meson nou apa phakhatso nung thainian she nai chamthio küta, amthang aniokun kheam nouso tü satlute, küta apoi nouso amthang athan nai thsa-ane.

³¹Nungaih nokmei thaiutha kiutsün thainian ainou iiu lowantsünli, apaüh nung thainian ainou iiu nouso apem lowane, naiuso apaüh nung APAOU ta angannyam nou monglengiau amthang nai jahwane. Nungli meson nou khaiunia ün angei thaiutha aloat chaithio nou thio-e, naiuso nung khaiunia hau wankiu-e.

³²Khaiunia tsaküh angei chaithioau onnemok tsak kankü shinai, nung thainian to alothe ti tsüsunkün asangtso tsak theau noin.

³³Apaüh apa pha nung thainian khaiu nai thanglutküta, amthang tü ajenapki nai noitsün thainian jahkü loattsün amthang nai loate.

³⁴Meson nou apa phakhatso nung thainian she nai chamthio-e küta amthang aniokun kheam nouso tü satlute, naiuso apoi nouso amthang athan nai thsa-ane.

³⁵Nungaih apaüh nokmei chaithio thiotsün onnemok ainou iiu nouso lowantsünli, iiu nouso apem lowane, naiuso apaüh nungh APAOU hau kiutsün chih chaithio nousoko aikü amthang nai jah-e. Nunghli meson nou nung khaiunia ün angei thaiutha aloat chaithio thioau noin, naiuso nung khaiunia hau angei nou wankiu-e.