Read Khiamniungan Naga Levi 8 Bible Online

Levi 8 - Khiamniungan Naga bible

Levi 8

¹APAOU nou Mosa tü ngiom,

²“Aron naiuso apa thsoso ngü noitsün Nejenkhio ai naptsün dongai nialokü ashi naiuso meson neshe, atsomkiutsün khaiutsom, angei chaithio thaiutha jangtsopong tsak, onnemok nime, naiuso phoplao tsüthiokün themtsai tsak ta kankü ashi.

³Küta hoikam athum nungaih ajonkam.”

⁴APAOU nou thoiluttsünli Mosaüh chhin, naiuso tilai hoi nou kamjikan,

⁵apaüh ngüsotü ngiom, “Ngü lo chhiau noitsün nung APAOU nou thoiluttsün noin.”

⁶Mosaüh Aron naiuso apa thsoso khaai nialokü shiküta ngüso tü amkham yamko khiam pengau ngiom.

⁷Apaüh Aron tü phakhut naiuso meson phalaiu phakhut nou khutkü naiuso apa om lemkü omkhi kheilut. Apaüh Aron tü meson phakhut sübao thatü jenkü noiküla nung apa om lemkü jenkü khilut.

⁸Apaüh Aron hau phacham chamkiu, naiuso nungh phacham nou tü Urim si Thumim nou lolut

⁹Apaüh Aron khaiu ai kandio nou keilutkiu, naiuso kha ai chaiou nou chiolut, nung alat nou asio nai thumkü kiutsün, nungti APAOU nou apa tü thoiluttsünli apaüh chhin.

¹⁰Nungaih Mosaüh atsomkiutsün khaiutsom loküta APAOU noitsün Nejenkhio naiuso nungko noitsün jengtsaiu alum tü lolut, nungti apaüh nungso apem APAOU hau thumkü losiokü taiukiu.

¹¹Apaüh khaiutsom intso loküta nungso APAOU hau losiokü taiuau thaiutha amthang nou, jengtsaiu nouso, chiokau nou, naiuso nung taiutsün tü chinyatjam satlut.

¹²Apaüh Aron khaiu ai atsomkiutsün khaiutsom thsalutkü thumkü losiokiu.

¹³Nungthanko Mosaüh Aron thsoso khaai nialokü shiküta ngüso hau phakhut nou khutkiu, ngüso om lemkü phacham nou chamkiu naiuso APAOU nou thoiluttsünli ngüso khaiu ai kandio nouso keilutkiu.

¹⁴Nungaih Mosaüh angei chaithio thaiutha jangtsopong tsak kankü shin, naiuso Aron si apa thsosoüh ngüso pha nung jangkhaiu nai thanglut.

¹⁵Mosaüh nung loatküta ashe intso lokü nungko apa phakha chamthiokü alosio au thaiutha amthang aniokun kheam nouso tü peilut. Nungthanko apaüh she apoi nouso amthang thannai thsa-an. Nungli apaüh nung losio naiuso losangkiu.

¹⁶Mosaüh asansimong ameiting haoson ainou naiuso athai ainou ii-iu nouso chikü losan, nungko awe nou ii-iu nouko hakü, naiuso nungh apem amthang nai jahwan.

¹⁷Apaüh jangtsopong ainou akhun, atsah, asaih nouso lüko loküta APAOU nou thoiluttsünli asaothang pechiai jahwan.

¹⁸Nungthanko Mosaüh ajah chaithio thaiutha onnemok tsak kankü shin, naiuso Aron si apa thsosoüh nung onnemok khaiu nai ngüso pha thanglut.

¹⁹Mosaüh nung thainian loatküta amthang aniokun püle nai nung she satlut.

²⁰Apaüh nung onnemok nou nelangkü tapne, among nouso naiuso ashiophi nouso khiam nou tsaowan, naiuso APAOU nou thoiluttsünli, akhaiu nou, ii-iu nou, naiuso apoi nouso apem amthang nai jahwan. Nung ajah chaithio nou chih chaithio tsak noiküla, naiuso nungh angannyam nou APAOU monglengikü noiküla.

²²Nungthanko Mosaüh onnemok nime nou kankü shin, nung meson nouso tsomkiuau thaiutha noiküla, nungko Aron naiuso apa thsosoüh akhaiu nai ngüso phaüh thanglutkü noiküla.

²³Mosaüh nung loatküta ashe intso lokü Aron nuodhan uai, phakhapao uai, naiuso hokkhapao uai tsomlut.

²⁴Küta apaüh Aron thsoso kha ai nialokü shin naiuso ngüsotü nuodhan uai, phakhapao uai, naiuso ngüso hokkhapao uai she intso tsomlut. Nungphiai Mosaüh she apoi nouso amthang aniokun püle nai satlut.

²⁵Apaüh ii-iu nou, ami nou, asansimong nyingjeitsün ii-iu, amongpem ameiting nou, awe nou ii-iu nouso sunkü, naiuso ashiolak uai nouso lo.

²⁶Nungaih apaüh APAOU hau losiokü taiutsün phoplao tsüthiokün themtsai, kim ainou themtsai tsak lo, khaiutsom khiam nou tsaotsün themtsai tsak, ta loküta nungso chiai ii-iu nou naiuso ashiolak uai nouso chiai taiu.

²⁷Apaüh nung chih nouso Aron naiuso apa thsoso phamongai lethio, naiuso ngüsoüh nung APAOU hau amothi paopei tsakli kiu.

²⁸Nungaih Mosaüh ngüso ainou chih loküta nung amthang nai jah, nungh atsomkiu chaithio tsakli ajah chaithio chinai taiu. Nung chih chaithio tsak, naiuso nungh angannyam nou APAOU monglengiji.

²⁹Küta Mosaüh nung thainian nyaolak nou loküta APAOU hau amothi paopei tsakli kiu. Nung atsomkiu thaiutha onnemok nou Mosa haoson noiküla. Mosaüh alum APAOU nou thoiluttsünli chhin.

³⁰Mosaüh amthang nai taiutsün atsomkiutsün khaiutsom naiuso she nouso intso loküta Aron naiuso apa thsoso naiuso ngüso nesheso tü satlut. Nungti apaüh ngüso naiuso ngüso neshe APAOU hau thumkü losiokiu.

³¹Mosaüh Aron naiuso apa thsoso tü ngiom, “Nyih nou APAOU noitsün Nejenkhio nai naptsün dongai kankü lükhu, nung lütheng, küta APAOU nou thoiluttsünli atsomkiu chaithio kim nai noitsün themtsai nouko aikü lühe.

³²Apoisantsün nyih tsüdekünai themtsai in nai lüjahwan.

³³Asamüh nung Nejenkhio nai naptsün kuo nou amsikham mokhemkün lektso ajekhaiu chinyatnyi tsüle-ankü jimau noin.

³⁴Asam angei kankü khuwanau thaiuthako samüh lonyi ti chhin nung APAOU nou sam tü lüchhi ta thoilut.

³⁵APAOU nou ti thoilut nung chhisiyakü asam Nejenkhio nai naptsün dongko anyi si asoh ajekhaiu chinyatnyi noiau noin. Asam tsünoikü naito, asam eane. Nung ngiokhem APAOU nou ngü hau kium.”

³⁶Nungtiphe Aron si apa thsosoüh APAOU nou Mosa tsangkü thoiluttsün alum chhin.