Read Khiamniungan Naga Yeremia 1 Bible Online

Yeremia 1 - Khiamniungan Naga bible

Yeremia 1

¹Benjamin goumchi Anathot nok- song nai, mesonhoi ongko tsak nou Hilkia thso Yerimia tsangkü ngiotsün ngiolat.

²Nung Yihudahai nokpao Amon thso nou Josia nokshing pon chekü süme nouko nai APAOU nou Yerimia ko chite,

³naiuso Josia thso nou Jehoiakim nokpao taoko lüko apako müjam chite. Nung- phiai Josia thso Zedekia nokshing pon chekü tsak saokü, APAOU nou apako piaküjam chite. Nung pon alei pungo nouko Yirusalem khaiuniahoi nouso sua au thaloukü khuwan.

⁴APAOU nou ngotü ngiom,

⁵“Ngo ni thaimongai moseithokün khako aita chosan, naiuso ni mochetkün khako Ngü ni, mele nouso dongai E-po tsak theau shingsankü wan.”

⁶Ngü thalakü ngiom, “Akhengteng APAOU, ngü titi singio-e nung tsünge; tiautenai ngo thatü methsoteng noin.”

⁷Lüko APAOU nou ngo tü ngiom, “Ni thatü methso ta langio, lüko ngü ni hongtsün khaiuniahoi dongai lükhu, küta Ngü nitü angioau thoiluttsün alum ngüso hau lüchite.

⁸Ngüso lon hatkü lanoi, lüko ni kiploau Ngo niko hakü noi-e. Nung Ngü, APAOU nou ngiowaniu!”

⁹Nungai APAOU nou apa pha chinphu küta jü sontham nai thankü ngiom, “Anglu, Ni singiokü haolu ngio nouso ngü nihau kiuji.

¹⁰Lonyi Ngü nihau mele nouso naiuso nokshing nouso khako aseksanau naiuso alaopengau, alotheau naiuso ayakkanau, ashansanau naiuso athomau oukong kiuji.”

¹¹APAOU nou ngo tü sangkü ngiom, “Yerimia, ni ti epji?” Ngü thalakü ngiom, “Ngü almond paikia tsak epji.”

¹²Nungaih APAOU nou ngiom, “Ni thakü thala-iu, tititenai jüngio shithawao-iao ngü tsüokü thapji.”

¹³Nungaih müjam APAOU nou ngoko chitekü ngiom, “Ni loüh ti epshiji?” Ngü thalan, “Ajenapki nai pulak tsak putputkü ngü epji, naiuso nung ason nou nung yamtü sheilutkü noin.”

¹⁴Apaüh ngo tü ngiom, “Ajenapki ainou nung goumchi nai kihtsünso chikü khako alothe nou thawao-e,

¹⁵tiautenai ajenapki nai noitsün mele nouso chikü ngü jonkamji. Ngüso nokpao nousoüh Yirusalem bekhan nouso naiuso peh nouso naiuso amao Yihuda noksong nouso lemkü ngüso ün nokpao noikham shane.

¹⁶Ngü jü khaiuniaso hau angja kiu-e, tiautenai ngüsoüh angei suniu, ngüsoüh ngo wananiu, amao goa nouso hau aloat chaithio kiu-iu, naiuso sotsom nouso shanküta nungso tü amkhamiu.

¹⁷Lükhemlou, Yerimia, khuküta Ngü nitü angioau thoiluttsün alum ngüso hau lüchite. Loto ngüso lon hatkü lanoi, tsüdekünai tilai asam ngüsoko hakü noi-e, ngü ni tekkü hatatkü iula-i-e.

¹⁸Anglu, Yerimia! nung goh nouko noitsün khaiunia chikü- Yihudahai nokpao nouso, asong nouso, meson nouso, naiuso khaiunia nouso ni thako tsa-e. Lüko ngü lonyi nungso tha-anlouau nihau oukong kiuji: ni mongkü pejeikü noitsün noknio tsak, sonpe tsak, naiuso taoson lung peh tsak khekkü noi-e. Ngüsoüh ni tsüshio-e, tititenai ni kiplouau Ngo niko hakü noi-e ta Ngo, APAOU nou ngiowaniu.”