Read Khiamniungan Naga Yeremia 10 Bible Online

Yeremia 10 - Khiamniungan Naga bible

Yeremia 10

¹Israel hai, asam thaiutha APAOU ngiongem tü anglu.

²“Amao mele nouso yam tü lahoilut; amao mele nouso hatat lüko, maou nai ii hantsün nouko asam mong ayangelat lanoi.

³Tiautenai nung khaiunia nouso don yaang noin. Liutsa nai pai tsak hehongji küta nung sotsom seithotsünsoüh tsansanji,

⁴küta nung tü tangkason naiuso chaiou lakkeng nou aleng yamlutji. Nung tsüloian-ikü mongkü taiuau sonlah nou lahji.

⁵Ngüso sotsom goa nouso mülongpio nai tso lohatau sotsom shantaiutsün khekkü noin. Ngüsoüh ngio chite au tsüshioji; ngüso tsakeiau tsüshiophe, akanlu kankeiau noin. Ngüsoüh ni tü tsümeikü chhiau tsüshio; tsüdekünai amei chhiau lüko ngüso tü tsünoi.

⁶APAOU, nungko ni khekkü sau tsünoi; ni oukong noin, naiuso anianko oukong asong noin.

⁷Mele nouso nokpao, ni asu tsühatkü sau noi-e? ni asuhat epau maikü noin. Tiautenai mele nouso mongthat mongsai noitsün chikü ongko ni khekkü tsaktso tsünoi.

⁸Nungso chikü a-aiu naiuso mainga. Nung sotsom ainou ngüsoüh ti ngeluau shio-e?

⁹Ngüso sotsom nouso tü Spain ainou tangkason, naiuso Ufaz ainou chaiou lakkeng kanjikan nou tsomji; nung chikü waimonhai chhi noin; nungso maou leng sheitho naiuso nelah monhai tsangkü lahtsün anyakhao ne khekkü noin.

¹⁰Lüko APAOU, ni atsüo Goa noin, Ni aa noitsün Goa, naiuso athontsüyangkün nokpao. Tilai ni mongmatji nungai goumchi saiusaiuji; mele nousoüh ni mongmattsün jeilouau tsüshioji.

¹¹(Asamüh ngüso tü nungti lüngio: tisübao goa nousoüh goum naiuso aün tsüshan, ngüsoto goumchi ainou naiuso aün khemko mowane.)

¹²APAOU nou goum nung apa oukong tsangkü naiuso goumchi nou apa mongthat mongsai tsangkü shanküta aün nouso sapengkü taiu.

¹³Apa ngiokhemko maou nou khengai khiam nouso ngaoji, Apaüh goh athon ainou thengmia nouso kankü shiji. Apaüh ah-uo nouko ahsalap sungiji naiuso apa tsam ainou ahsheih nouso hongji.

¹⁴Nungko khaiuniahoi mainga naiuso mongyang tsünoikünli noin; sotsom shantsünso apem amiam, tiautenai ngüsoüh saitsün goa nung yaang naiuso ii tsülou.

¹⁵Nungso atheau ti tsünoi, lochikü wanau noin; tilai APAOU nou shi-e ngüsoto mowane.

¹⁶Yakob Goa to ngüso khekkü tsüde, apato alum sheithosantsün tsak noin, naiuso apaüh Israel nung apa tengkam theau chosan. Apa nian Akongting APAOU nou noin.

¹⁷Yirusalem, ni lemlouwankü noin! Ajengtsaiu lükamlou.

¹⁸APAOU nou ni nung gohthang ainou tsaktso tsüsathio taiukü sutneküta yakkanau noin ta ngiowaniu.

¹⁹Yirusalem haiüh wekü ngiom, “Sam thsüokü tawaikü noin! Sam mou nouso tsümeila-e. Nung samüh tsotsak jeilouau shio-e ta yangkü noiküla!

²⁰Sam nejenkhio nouso lotheaniu; naiuso aoke nou chanthataniu. Sam thsoso chikü khuwaniu; sam nejenkhio nouso müjam lahsanau tsaktso tsüpoishi; nekhongtsün phantaiu au lüko tsaktso tsünoi.”

²¹Ngü thalan, “Sam aniakeihoi mongyang tsüpung; ngüsoüh APAOU yamnia tsüsang. Nung shioko ngüsoüh ashio tsüep, naiuso sam khaiuniaso pengpunankü noin.

²²Anglu! Ngiongem nou shikü noin! Ajenapki mele asong tsakko apülai asong tsak noin! Nung Yihuda hai noknio nouso chiohoi kihtsün liutsa athang tsak iula-itsün süpaihoi nouso noin.”

²³APAOU, khaiunia tsak yam apa pem da tsünoi, sau khaiunia lünou apa aa nung apa khemko tsünoi.

²⁴APAOU akhaiuniaso alotha; lüko sam thonanau lümeikü ni mongmatküta sam hau angja kiunai, samüh tsükiploukü hau lümeiküto lathe.

²⁵Ni tü tsü-amkün mele naiuso ni wanantsün khaiuniahoi nouso khako ni mongmattsün lükheplutkiu. Tiautenai ngüsoüh akhaiuniaso loatiu; ngüsoüh akhaiunia loat-iu; ngüsoüh sam thumkü lotheküta sam goumchi lüko thumkü alothe nai lekü taiukiu.