Read Khiamniungan Naga Yeremia 11 Bible Online

Yeremia 11 - Khiamniungan Naga bible

Yeremia 11

¹APAOU nou ngo tü ngiom,

²“Nung athalou-e nou tü anglu. Ngo APAOU, Israel hai Goa nou nung athalou-e angio tsü-angkünso pungkü khako athesan tsak

³taiukiuwaniu ta Yihuda hai naiuso Yirusalem hai hau lüchite.

⁴Nung athalou-e tilai ngü ngüso paosiposo sonjin ajek noitsün Ijip goumchi ainou niasan, nung taoko Ngü ngüso ko shan. Ngo tü angio ang-au naiuso Ngo thoiluttaiutsün alum chhiau ngüso tü ngiom. Ngüsoüh angio-angnaito, ngüso jü khaiunia noi-e naiuso Ngo ngüso Goa noi-e ta ngüso tü ngiom.

⁵Nungaito Ngo ngüso paosipoko jangnyao si liukhiam tsangkü noitsün goumchi sübaoko lo ngüso kihkü noin nung kiuau thaloukü taiutsün chhi-e.” Nungai ngo, “ah, nungti achhikiu APAOU ta thalakü ngiom.”

⁶Nungai APAOU nou ngo tü ngiom, “Yihuda hai noknio chikü naiuso Yirusalem sonkeng nouso ai khukü, athalou-e nouso tü anglu, naiuso nungso tü angio angkü lüthe ta ngüso hau jü ngiongem lüchite.

⁷Tilai Ngo ngüso paosiposo Ijip ainou niasan, nungai Ngo ngüso tü jüngio ang-au mongkü lotsüo, naiuso nung lonyi saokü alotsüo tsülao.

⁸Nungti lüko ngüsoüh tsü-angji tsüdekünai tsükankeiji. Lüko khaiunia pungkü meshen angei mongpem kongtsün nailu tsakei. Ngü ngüso tü nung athalou-e kankeiau thoilut, lüko ngüsoüh tsükankei. Nungtiphe nung athalou-e nouko alohat nouso Ngü ngüso khako kankü shin.”

⁹Loüh APAOU nou ngo tü ngiom, “Yihuda hai naiuso Yirusalem hai mongko Ngo thako mongthat tsümeikü noin.

¹⁰Ngüsoüh Ngo ngiotsün tü tsü-angkü amaohai goa tü amkhamkü ngüso paosiposo angei nai laokü khuwaniu.

¹¹Nungtiphe lo Ngo APAOU nou, ngüso thakhuau tsüshiokün alothe tsak ngüso khako kankü shiji, nungko ngüsoüh ngotü ahalouau welüko, Ngo ngüso tü tsü-ang-e.

¹²Nungai Yihuda hai si Yirusalem hai ngüso tü halouau thaiutha sangkü ngüsoüh aloat chaithio kiutsün goa nouso dongai khu-e. Lüko tilai nung alothe ngüso khako shi-e, nung goa nousoüh ngüso kipsanau tsüshio-e.

¹³Yihuda haiüh ngüso noknio titi piakü noin nungtitso ngüso goa taim, naiuso Yirusalem nai kihtsünsoüh ngüso sonkeng piakü noitsünli achinyan goa Baal hau aloat chaithio kiutsün amthang nouso piakü lashankü noin.

¹⁴Yerimia, nung khaiunia nouso thaiutha ngo tü misao lasao tsüdekünai akoja lüko lakojakiu. Tilai ngüso angja-e nungtaoko ahalo thaiutha ngo tü jon nai, ngo ngüso tü tsü-anglu-e.”

¹⁵APAOU nou ngioji, “Khaiunia sauhai ngo tsüojinji, nungsoüh chhi tsümeikün chhiji. Nungaito ngüso Jü tsamai noiau ti ayam noin? Athalou shantsün naiuso thainian loatkü chaithio kiutsün tsangkü ngüsoüh akuothe shitsün kiapjeiau shio-e ta yangjiso? Nungüh ngüso mong- ling-i-e süne?

¹⁶Ngo ataojam ngüso tü olip pai aa, aleng amei eiu nou meankü noitsün ta jonkü noiküla, lüko lo, ah-ou-ahsheih ngem asong nai shikü ngo ngüso tü in jeklut-e, naiuso paikia nouso longekkü wane.

¹⁷“Ngo, Akongteng APAOU nou Israel naiuso Yihuda thomthio, lüko lo Ngo ngüso akuothe nou lohatte. Ngüsoüh phiokü chhi nou shioko ngüsoüh nung chija ngüso khako kankü shin; Baal hau aloat chaithio kiu nou tsangkü ngüsoüh Ngo mongmat-i.”

¹⁸Jü ehsoüh jü thako amongkhem mongthat thattsün APAOU nou ngü hau nge-in.

¹⁹Lüko ngo atsamlou onnemokthso aloat au nialoukü khutsün khekkü noiküla. Ngüsoüh jü thako amongkhem mongthat thatji ta ngo tsünge, tititenai ngüsoüh ngiom, “Samüh pai eiu nou sunkü apai nou he-anko, apa loatkü wanko, nungko loto apa nian sauüh tsüyangsanshi-e.”

²⁰Nungai ngo misao saokü ngiom, “akongting APAOU, ni ngiotsüo mikhemji, ni khaiuniahoi mong naiuso mongyang theluji. Jü shioko nouto ngo ni hau kiuwaniu, nungtiphe nung khaiunia nouso tü ni thamshiau ngü jiokü thapkü noin.”

²¹Anathoth haiüh ngo loatkü wanau mongchiokü noiküla. Naiuso ngo tsülaokü APAOU ngiongem pungpengkü noi naito ngüsoüh loat au mongchiokü noin ta chiten.

²²Nungtiphe Akongteng APAOU nou ngiom, “Ngü ngüso hau angja kiu-e! Ngüso pühehoi ehli nai eane, ngüso thsoso naiusile nou eane.

²³Anathoth hai khako akuothe kankü shiau ngü atao tsak latkü taim, naiuso tilai nung atao shi-e, ngüso tsaktso tsü-asane.”