Read Khiamniungan Naga Yeremia 12 Bible Online

Yeremia 12 - Khiamniungan Naga bible

Yeremia 12

¹“APAOU, ngü jü mi niko siu-wenai, nito thakü thasane. Nungti lüko ngo nitü ngiotsüo thaiutha sangji. Tiauta tsümeikün khaiuniahoi tsüomeiji? Tiauta tsüsaithakünsoüh ashio epji?

²Ni ngüso thomthio, naiuso ngüso tü eiu nou saoküta samsankü eiu nou eiuji. Ngüsoüh asaita ni mei nou thaiutha chiteji, nungti lüko atsüoting to ngüsoüh athaiutha ti paotsangkü tsünoi.

³Lüko, APAOU, ngü ti chhiji, naiuso nitü titi tsüojinji, nung ni ngeji. Atappan au noitsün onnemok hoi khekkü tsümeikün khaiunia nouso atenlükhunan-i; küta aloat au atao mosaokün lektso ngüso hüjeikü ataiu.

⁴Sam goh nung tilektso waikü noikü kengpun nai sang nouso shei-ane? Sam khaiuniaso tsümei nou shioko uo nouso si waio nouso eanji, tiautenai khaiuniahoi nou ngioji, ‘Samüh ti chhiji nung Goa nou tsüepji.’”

⁵APAOU nou ngiom, “Yerimia, ni khaiuniahoi nousoko she-e nai tanat naito, mokthso nousoko ni titi she-e au shio-e? Naiuso ehli tsünoikünkotso ni atsa au tsüshiokü naito, Yordan Haiusai liutsa ainai ni titi the-e?

⁶Atsamkhaiuteng mepemhoi si adeisiniosoüh lüko ni kausaiatkü kankei; ni thako tsatsün nai ngüso hoilutji. Ngüsoüh ngiomei chite lüko ngüso tü amonglam lataiu.”

⁷“Ngü Israel le-aniu; Ngü jü achosan mele tsülou, ta APAOU nou ngioji. Ngü tsüojintsün khaiuniahoi, ngü ngüso ehoi oukong nai kiuwaniu.

⁸Liutsa nai chongkhao tsaküh ngo tü ngaoluttsün khekkü, jü achosan khaiuniahoi nou ngo thako tsalou, nungtiphe ngü ngüso chinyan.

⁹Liuwaio tsak tü aniokün pungkü ai letchehoi shipotsünli jü achosan khaiunia nouso noin. Hoitsokam nai shikamhaau liuai noitsün thainian apem ajon!

¹⁰Gohmaohai nokpao nousoüh jü sainaoshep aimong lotheaniu; ngüsoüh jü eiuso ngamthiowaniu; ngüsoüh jü goh alengmei nou aodangkü phokleankiu-eiu.

¹¹Ngüsoüh nung goh aodangkü iula-i-iu; nung jü khako akeng le-an. Nung gohthang athum aodangkü iulakü sauüh apaotsang tsünoiji.

¹²Liutsa king goh nouso chikü nai alotheanau khaiuniahoi shikü noin. Tsaktso aalokü kih au tsüshiokü gohthang athum lotheanau ngü ehli nou hongkü noin.

¹³Jü khaiuniasoüh wet tso lethio, lüko chih-ai yamhe; ngüsoüh kongkü chhin, lüko nungko alesan ti tsüep. Ngo thsüokü mongmat sung nou shioko ngüso be-eiuyam tsüyamkü laowat.”

¹⁴APAOU nou ngioji, “Ngü jü khaiunia Israelhai hau kiutaiu nou goh lotheankiutsün Israelhai chenpaso thaiutha tso tsak ngioau noin. Ngüso goumchi ainou tsümeikün khaiunia nouso paisam seksantsünli ngü lou- wane, küta Yihuda halou-e.

¹⁵Ngüso ainou niashiküta, ngü ngüso khako atsüojinyang noi-e. Ngüso mele pungkü momo gohthang naiuso goumchi ai laokü shi-e.

¹⁶Ngüsoüh jü khaiuniaso tü Baal tsangkü ngiomong shinge tsandetsünli, jü khaiuniaso yam mongkiukü ngelou- kü jünianko ‘APAOU aa noiphe,’ ta ngiomong shinge naito nungai ngüso lüko jü khaiuniaso ongko haoson tsak noi-e, naiuso tsüomeikü khu-e.

¹⁷Lüko mele ajantsoüh nung tsü-angkü naito, nungai ngü thumkü seksane, naiuso nung lothekü wane ta Ngo, APAOU nou, ngiowaniu.”