Read Khiamniungan Naga Yeremia 14 Bible Online

Yeremia 14 - Khiamniungan Naga bible

Yeremia 14

¹Ah-wainio thaiutha APAOU nou ngotü ngiom:

²“Yihuda amongsaiu nai noin; naiuso nung noknio nouso eanji, apa khaiuniaso amongkia nou goh ai kauthiokü noin, naiuso Yirusalemüh ahalou thaiutha wesanji.

³Memei khaiuniahoi nou ngüso khu lüko khiam tsüep; nungtiphe ngüso khiam meng akeng kankü laokü shiji. Loto ngüso miamkü lekkat nou ngüso kha loijeikü noin.

⁴Ah-tsü-uo nou shioko goh nou waikü khuwanphe, Eiu-a khaiuniahoi amongkia nou ngüso kha loijeikü noin.

⁵Tsamei nai jinchai anyiu nou lo aptsün athso leankü khuji, tiautenai nungko khengliu tsünoi.

⁶Liutsa gado nouso choison nai tsakü chio nouso khekkü ngüsoüh ahsheih saoheji; ngüso niovei athapau outsükongshi, tiautenai ngüso eheshiu tsünoi.

⁷‘Sam angeiüh sam thako mitha kiulüko, APAOU, ni thaloutsünli sam ahachu. Atao piaküjam sam ni ainou pungekü khuwan; samüh athako angei sunlou-iu.

⁸Israel ün ayangtaiu ni lu noin; sam akuothe ainou kipsantsün tsak nou nung ni noin. Tiauta ni sam goh ko mesan tsak khekkü naiuso sotsolu shamtsün atsakei khaiunia tsaklilu noiji?

⁹Tiauta ni alekkattsün khaiunia tsakli naiuso ahachuau oukong tsüsunkün süpai tsak khekkü noiji? Nungti lüko APAOU samko hakü noin; sam lale-an.’”

¹⁰APAOU nou nung khaiunia nouso thaiutha ngioji: “Ngüsoüh Ngo ainou khulükhunau mongchioji, naiuso ngüso chija tsüthakip. Nungtiphe ngo ngüso tü tsümongling. Ngü ngüso aphio chhi nouso yangsan küta ngüso angei shioko angja kiu-e.”

¹¹APAOU nou ngotü ngiom, “Nung khaiuniahoi nouso hachuau ngotü lasang.

¹²Ngüsoüh keithon misao loulüko, ngü ngüsoüh ahachu thaiutha wetsün tü tsü-ange, naiuso ngüsoüh ngo hau ajahtsün chaithio naiuso eheshiu chaithio nouso thio lüko ngo nungso tü tsümonglinge. Nunglikoto ngü bao ngüso ehli naiuso naiusile si akiasiya tsangkü mowani-e.”

¹³Nungaih ngü ngiom, “Akhengting APAOU, ehli tsüdekünai naiusile tsünoi-e ta e-po nousoüh khaiuniahoi hau chiteji, sam goh ko aaloukü noi-e, tiautenai nung ni thaloukü taim ta ngüsoüh ngioji.

¹⁴Lüko APAOU nou thalakü ngiom, “E-po nousoüh jü nianko yaang chiteji, ngü ngüso tsühong, tsüdekünai ngüso tü ngiopem tsak lüko chiteau ti ngiokhem tsükiu. Ngüsoüh chitetsün atsangshei nouso ngü ainou tsüshi, ngüso khapiam ngio naiuso ayang nouso ti athang tsünoi.

¹⁵Ngü tsühong lüko sauhaiüh jü nianko ehli si naiusile nou nung goumchi tü tsüthane ta chiteji, ngüso ehli nai naiuso naiusile nou loate ta Ngo APAOU nou ngioji.

¹⁶Ngüsoüh khaiunia sauhai tü nung ngio nouso ngiom, ngüso lüko nung akuo nouko lu loate. Ngüso mea Yirusalem sonkeng nouso ai yakpenge, nungko ngüso khananau sautso tsünoi-e. Nung ngüso tsammongnyiuso, melothsoso si menyiuthsoso chikü ta wekülu thawao-e. Ngüso tsümeikün thaiutha ngü ngüso hau thami-e.”

¹⁷APAOU nou khaiuniahoi hau jü mongkiatsün thaiutha chiteau ngotü thoilutkü ngiom: “Ahnge ahnyah chikü jü niovei ai niochekhiam tsangkü anoi-i, ngo shaptsün tilaitso lalao-i, tititenai jü khaiunia thatü woi nou thsüokü tawaikü noin.

¹⁸Ngo tilai kengpun nai khuji, Ngü ehli nai loattsün khaiuniahoi mea epji; Ngo tilai noksong nouso ai khuji, Ngü naiusile nou eantsün khaiuniahoi epji. E-pohoi naiuso mesonhoi nousoüh goumchi nou tü saikü ngüso chhi chhiji, lüko ngüsoüh chhitsün ngüsoüh tsünge.”

¹⁹APAOU, ni Yihuda thumkü leaniu so? Ni Zion khaiunia chinyanji süne? Ameishiau tsüshiokü ni sam tiauta thsüokü tawaikiu? Samüh aalou thaiutha yam, lüko amei titso tsüthawao; samüh alomeiau yam, lüko nungliko alekkat bao shin.

²⁰APAOU, samüh athako angei sunhe-iu, sam si sam paosiposo angei samüh shankiuji.

²¹Ni thaloutsünso yangsan küta sam lalotsaokiu, ni nou ajinka nokpao noikhamthang Yirusalem khako amiam lakanjikan. Ni samko athalou-e taiutsün lalothe.

²²Mele nouso goa sotsom sauühtso ah-uo hongau tsüshio, maou nou ah-uo shankü uo-iau tsüshio. O APAOU, sam Goa, samüh sam ayang ni da taim, tiautenai nungso chhitsün tsak nou ni noin.