Read Khiamniungan Naga Yeremia 15 Bible Online

Yeremia 15 - Khiamniungan Naga bible

Yeremia 15

¹Nungai APAOU nou ngo tü ngiom, “Mosa si Samuel ne Jü khako tsakü Ngo tü koja lüko, ngü nung khaiunia nouso hau atsüojinyang titso tsühane. Jü khako nou ngüso lühongan, jü niokuo ainou ngüso lüsoian-i.

²Naiuso ngüsoüh ni tü sam tiai khu-e ta sangnai, ni ngüso hau nungti lüchite: APAOU nou nungti ngioji: Ajantso eanau thaiutha noin- ngüso eannai khu-e! Ajantso ehli nai eanau noin- ngüso ehli nai khu-e. Ajantso naiusile nou eanau noin- ngüso naiusile nou eane! Sauhai suo au thaloukü khuwanau noin- ngüso nung akuo nai khu-e!

³Ngüso khako akuothe athsüoting püle thawaoau ngo APAOU nou, thatlouwaniu: ngüso ehli nai eanau; ngüso mea jii nousoüh chipek heau; ngüso mea heanau aün waiotso nouso, naiuso apoitaiu nouso liu thainian nousoüh juowekü hean-e.

⁴Tiautenai Hezekia thso Manaseüh Yirusalem nai nokshing taoko ti chhin nung thaiutha goumchi khaiunia chikü khako ngü, ngüso alekkat tsak noi-i-e.”

⁵APAOU nou ngioji, “Yirusalem khaiuniahoi, sauüh ni tü yangkiu-e, tsüdekünai sauüh ni tü mea shappe? Ni titi noin ta semsei au sau laiukü tsakiu-e?

⁶Asamüh ngo tsülou; Asamüh jü dongai asam phi sheilut. Ngo jü mongmat lotsamau tan nou shioko ngo jüpha luküta asam sutne.

⁷Goumchi nai noksong pungkü ko, ngü ni tsokapli ahsheih hau yakkiuwan. Jü khaiuniaso, ngü ni lomokiu, ngü athsoso loat, tiautenai yam tsümeikü ainou asam tsüphokle.

⁸Nung goumchi nai jihi nouso khiamnok singtso tü piakü noin. Ngü asam thsoso pühetaotingko loat küta ngüso nyiuso omhe-i. Ngü ngüso tü amongmat naiuso alekkat nou alekta shiuh.

⁹Thsoso chinyat mowantsün nyiu nou iilouau tsüshiokü aiula. Nung nyiuhai ün anyi awon anyakhem au phokle-aniu, apa amiam nou mongai akia noin. Asam sauhai losaokü aa noin, ngü asam ehso hau asam loat-i-e; nung ngo APAOU nou ngiowaniu.”

¹⁰Ngo ti thangko amongling tsünoikün khaiunia! Jünyiuüh nung goumchi ai tiauta shi-in? Ngo nung goumchi khaiunia pungkü ko li-e au si siu-e au noin. Ngü sau chai laiulokü tsünoi tsüdekünai alaiu kiutaiukü tsünoi; lüko khaiunia pungkü nou ngotü athesan kiuji.

¹¹APAOU, ngü ni meikü yathsüokü tsünoikü naito, naiuso jü ehso angja si omhe nai ngü ngüso liko nitü kojakü tsünoikü naito, ngüso athesan chikü atsüo ashithawao-i.

¹²(Sauüh lünou son longek au tsüshioji, mothikü daoson ko lao-ekü noitsün ajenapki ainou son longek au tsüshio.)

¹³APAOU nou ngo tü ngiom, “Goumchi thapekkü jü khaiuniasoüh sunhetsün angei thaiuthako ngüso hau angja kiuau ngü ehoi hongküta ngüsoüh taiutsün memei jengtsaiu naiuso tengkam chikü kankü khuwani-e.

¹⁴Naiuso ngüsoüh tsüngekün goumchi tsak nai ngü ngüso hau ngüso ehoi yathsüo-i-e; tiautenai jü amongmat nung innyai khekkü noin, naiuso nung asaita nyaikü noi-e.”

¹⁵Nungai ngo ngiom, “APAOU, ni ngeji. Ngo ayangsan küta ahachu. Ngo jeiat-itsünso tü ngo hau athamshi-i. Ni laiukü jeiloutsün ko ngüsoüh ngo loat au ashio la-epi. Aliko ngü lochilotsaokü noin ta ayangsan.

¹⁶Ni ngoko chite, naiuso ngü angioyak pungkü anglukü noin. Akongteng APAOU Goa, ngo ahaoson noin, naiuso nungti angio nouso amongling nou jü mongpem meaniji naiuso mongtsamiji.

¹⁷Ngü jü atao anyaihetsün naiuso akoihetsün khaiunia hoikamko tsüwanji. Angio nouso tü angem angkü amongmat nou meankü ngü jü chija soikü noian.

¹⁸Ngo tiauta omhelutkü noiji? Jü mou nouso tiauta amei tsüyangkiu? Ngüso tsümeila-e süne? Ni ngo tü to asaiu haiuthsongan aplüshi-antsün tsak khekkü alekkat tsak noi-e süne?”

¹⁹Nungtü APAOU nou thalakü ngiom, “Ni nanloukü shi-etünaito, ngü ni laokü loshi-e, küta ni loüh ngo yathsüoshi-e. Naiuso ni athat tsünoikü ngiopengtsün liko ti chaiou ngiongem noin nung chim naito, ni loüh jü e-po theshi-e. Khaiuniahoi dongai ni khuau pokü tsünoikü, khaiuniahoi nou bao adongai laokü shi-e.

²⁰Nung khaiuniahoi khako ngü ni daoson pe tsak khekkü iula-i-e. Ngüso athako ehli nou tsalou-e lüko ngüsoüh ni tsüshio-e. Tiautenai ni kiplouau ngo niko noi-e naiuso ni kipsankü taiu-e.

²¹Naiuso tsümeikün oukong ainou naiuso ahat au lümeikün pha ainou ngü ni kipsane, ta Ngo, APAOU, nou ngiowaniu.”