Read Khiamniungan Naga Yeremia 16 Bible Online

Yeremia 16 - Khiamniungan Naga bible

Yeremia 16

¹Loüh APAOU nou ngoko chitekü ngiom,

²“Nungtin athang tsak nai ni thsohai chetsinyimkü tsamkhaiu layang.

³Tiautenai nungko chettsün methsoso naiuso ngüso posinyiu tü ti thawao au noin ngü nung nitü ngioko.

⁴Ngüso akiathe nou eane, naiuso ngüso thaiutha mongsaiukü nung mea nouso kamtaiuau sau tsünoi-e. Nungtiphe ngüso mea goh ai beisikinli kamsankü noi-e. Ngüso ehli nai loate, tsüdekünai naiusile nou eane, naiuso ngüso mea nouso liuwaio si liu thainian nousoüh eheshiuau the-e.

⁵“Mongsaiukü noitsün tsamkhaiu nai lanap. Sau thaiutha lünou mong lothekü lanoi. Loto jü khaiuniaso tü aalou nai tsü oukkiu-e tsüdekünai atsüojin naiuso atsüojinyang hantsün tsünoishi-e.

⁶Nung goumchi nouko memeihai si tsosilu hai nemthso eane, lüko ngüso thaiutha sauüh mongsaiukü khanau tsünoi-e. Sauüh meshen chija sah nou tsühelou-e, tsüdekünai amongsaiu hanau khaiu tsü-iuwane.

⁷Eantsün naiuso mongsaiukü noitsün aalou- iau tsaküh tsak ko hekü tsüdekünai shiukü sau tsünoi-e. Ajantso posinyiu eankü nouso thaiutha lüko atsüojin hantsün sau tsünoi-e.

⁸“Khaiuniahoi hoithsokam tsam nai ngüsoko hekü si shiukü kamha au lanap.

⁹Ngo, Apemshiotsün APAOU, Israel Goa nou ngioau noitsün tü anglu: Alonyai-etsün sang, amonglingetsün sangh, naiuso tsamsigoh shan sümai monglinge- tsün sang nouso ngo lolaokiu-e. Nungko noitsün khaiunia nousoüh nung thawaotsün epkü kih-e.

¹⁰“Tilai ni nungso chikü ngüso hau chite-e, ngüsoüh ni tü tiauta APAOU nou sam thako nungti thsüokü chhiau thatlut. Sam Goa, APAOU thako samüh ti angei sunlou naiuso aphio ti chhin ta ngüsoüh sange.

¹¹Nungai APAOU nou ngiotsün nung ngüso hau lüchite: ‘Asam paosiposoüh ngo wankü amao goa nouso yathsüokü amkham. Ngüsoüh ngo lean naiuso jü athoilut nouso tsükankei.

¹²Loüh asam paosiposo ko naibao asamüh tekkü tsaojengkü chhin. Asam chikü mongkong naiuso tsümeikü nou asamüh ngo tü tsüang.

¹³Nungtiphe, asam si asam paosiposoüh tilaitso tsüngekün goh tsak ai ngü asam nung goumchi ainou yakkan-e. Naiuso nungko asamüh ahso ahnyi chikü amao goa nouso yathsüo-e lüko ngü asam hau atsüojinyang tsühan-e.’”

¹⁴APAOU nou ngioji, “Tilai khaiuniahoi nou loto Israelhai Ijip goumchi ainou niasantsün nung aa Goa nou noin ta ngiomongshingkü tsüngio-e nung atao shiji.

¹⁵Nungliko, Israel hai nung ajenapki goumchi naiuso ngo kompengan- tsünso amao goumchi chikü ainou niakü shitsün nung ngo aa Goa nou noin ta ngiomongshingkü ngio-e. Ngü ngüso goumchi sübao ngüso paosiposo hau kiutaium nungai laokü kankü shi-e, ta ngo, APAOU nou ngiowaniu.”

¹⁶“Ngü nung khaiunia nouso thalouau ngouphek khaiuniahoi piakü hongji ta APAOU nou ngioji. Nungthan naito, ngü liuhom khaiuniahoi piakü hong-e; naiuso ngüsoüh king pungkü nai ngüso tü hom-e.

¹⁷Ngüso chhisiya alum ngü epji, nung ngo ainou titso tsangpokkü tsünoi, naiuso ngüso angei jü niokou ko thakhukü tsünoi.

¹⁸Ngü ngüso aphio naiuso angei thaiutha haoson nime nou phopkü thami-e, tiautenai ngüsoüh jü goumchi ilo tsünoikün mea naiuso sotsom nousoüh lochinyaniu, naiuso atsüotsüdekün goa nousoüh thameankü noin.”

¹⁹APAOU, ngo soloutsün naiuso ngo hau oukong kiutsün, angja taoko nai ni ngo hachu. Goumchi athon ainou mele nouso shikü ni tü ngio-e, “Sam paosiposoüh atsüotsüdekün goa naiuso atheau tsünoikün sotsom nouso tü simkü amao ti tsütaiu.

²⁰Khaiunia tsaküh apa ün tengkhaiu goa shanau shio-emo? Tsüshio-e, apaüh shanau shio naito, nungso to atsüoting goa nouso tsüde.”

²¹“Nungtiphe,” “ngü mele nouso hau jü oukong si akong nou asaita hau thaiutha jamlu nge-i-e; nungko ngüsoüh Ngo APAOU nou noin ta ngelou-e,” ta APAOU nou ngioji.