Read Khiamniungan Naga Yeremia 17 Bible Online

Yeremia 17 - Khiamniungan Naga bible

Yeremia 17

¹“Yihudahai, asam angei son thsamsatkai nou satkü noin; naiuso nung daimon lungsatkai nou asam mongpem da langlut küta nung amthang aniokun nai kikü taim ta APAOU nou ngioji.

²Choison nouso naiuso king goumchi nouso ai pai aa pungkü dongko menyiu goa Ashera sotsom nouso taiutsün amthang nouso ko asam khaiuniasoüh amji.

³Asam goumchi chiküüh sunloutsün angei nouso shioko asamüh taiutsün jengtsaiu chikü asam ehso hau kankü khuwan-i-e.

⁴Ngo asam hau kiutaiutsün goumchi asamüh lean-e, küta asamüh tsüngekün goh tsakai asam ehso yathsüo-e, tiautenai jü amongmat in khekkü noin, naiuso nung asaita nyaikü noi-e.”

⁵APAOU nou ngioji, “Sauüh choiankü khutsün khaiunia oukong nai naiuso khaiunia da amonglam taiukü APAOU ainou phoklekü khuji apa to athesan lünoi.

⁶Apa singtso goh nai ti amei tsüsungpotsün pai eng tsak khekkü. Nung amao pai ti tsüsamtsün gohwai jem goh nai samji. Apa da tilaitso amei tsüeppe.

⁷“Lüko sauüh ngo da amonglam taiuji ngü nung khaiunia nou ouk kiu-e.

⁸Apa to ah-eiu nouso khiamai thsanthiokü khiam simkü samtsün pai tsak khekkü noin. Ah-lam tao shinai tsühatji, tiautenai nung paisha nouso sangnyakülu noiji; Ah-tsü ou taoko tsüyangelatji; tiautenai apa da e-iu nou aokü noiji.

⁹“Khaiunia mongpem sauüh ngeau shioji? nungli akausai amao ti tsünoishi; nung akia meilaau thatü chek.

¹⁰Ngo, APAOU, nou mong yamji naiuso khaiuniahoi mongpem ta theluji. Khaiunia pungkü apa kihtsün tü likü, apaüh ti chhiji, nung tsangkü ngü apa ta theluji.”

¹¹Khaiunia sauüh ayam tsüthakü chai epji apa to waio tsaküh ali thiu tsüyangkü athso etsantsün khekkü. Apa aakih awemtingko nai apa memei mowan-e; naiuso athon naito apa mainga tsak tü shimkü amao ti tsüiula-e.

¹²Sam Amkham Tsam to aya ainou king atsokting tsak chiai tsatsün sam ajinka noikham khekkü noin.

¹³APAOU ni Israel ün ayangtaiu noin; ni leankü khuwantsün chikü miam-i-e. Pukhao chiai nian sattsün khekkü ngüso mowan-e, tiautenai ngüsoüh ni APAOU, thsanyan nyimtao khiam asangling nou leaniu.

¹⁴APAOU, ngo alomei naiuso ngo thumkü meila-e; ngo akipsan naiuso ngo pemkü kipsane. Tiautenai ngü lomsantsün nou ni noin!

¹⁵Khaiuniahoi nou ngo tü ngioji, “APAOU nou sam thako lohattsün ngio nouso tiai noin? Lo apa hau nung lüchilükhuni!”

¹⁶Lüko APAOU, ngü tilaitso ngüso thako akuothe kankü shiau tsükoja; ngü ngüso thaiutha angja tao shi-iau tsümongchio. APAOU, nung ni ngeji, ngü tilüsong sangküla nung ni ngeji.

¹⁷Ngo ko mongmatkü lanoi, angja shitaoko ni ngo khuluttsün athang noin.

¹⁸Ngo jeiatitsünso khako amiam nou kankü ashi, lüko ngo to amiam nai lanoi-i APAOU, ngüso lülekkati, lüko ngo to lalekkat-i. Ngüso khako akuothe ajekhaiu nou kankü shiküta ngüso lomokü lüwan.

¹⁹APAOU nou ngo tü ngiom, “Yerimia, lükhu küta Yihudahai Nokpaohoi ashi anap tsakeitsün khaiuniahoi ün Bekhan nai jü ngiongem lüwelut naiuso noknio nou wanküta Yirusalem hai bekhan chi- küai lükhu.

²⁰Nungko nokpao nouso, Yihudahai khaiunia chikü naiuso Yirusalem nai kihtsünso khaiunia pungkü tü nung bekhan nouso ai napküta, ngü ti ngioji nung tü angkü theau lüngio.

²¹Yihuda Anounyi ti thsa tsükanau noin; naiuso ngüsoüh Yirusalem bekhan yankü ti thsa kankü tsünapau noin,

²²tsüdekünai Yihuda Anounyi nouko ngüso tsam ainou ti kankü tsükhuau noin. Ngüsoüh Anounyi ti tsüchhikü, ngo ngüso paosiposo tü thoiluttsünli nung nyi nou asio ajekhaiu ta wesanau noin.

²³Nungti lüko ngüso paosipo- soüh ngü tü tsüang naiuso mong tsükiu. Nungliko, ngüso mong kongkü iula naiuso ngo ainou tsüngelou.

²⁴“Nung khaiunia nouso tü jü athoilut nouso chikü ang-au lüngio. Ngüsoüh Yihuda Anounyi nai nung noknio bekhan nouso yankü ti thsa tsükanthioau noin. Ngüsoüh nung Yihuda Anounyi nou asio ajekhaiuphe ti chhi tsüchhikü wesankü kankei-au noin.

²⁵Nungai ngüso nokpaohoi si menyiu nokpao nouso Yirusalem bekhan ai nappe naiuso David nokpao oukongko wekülu noi-e. Yihudahai si Yirusalem hai khaiunia ko aikü, ngüso ehli tsamkei naiuso mokthso nouso chiai moknoikü nappe, naiuso Yirusalem noknio asaita khaiunia nou meankü noi-e.

²⁶Yihuda hai noksong naiuso Yirusalem lemkü noitsün nok nouso ainou khaiuniahoi shi-e; ngüso Benjamin hai goh ainou, kinghok si king goh nouso ainou, naiuso ajepekki Yihuda goumchi ainou shikü ngüsoüh ajahtsün chaithio, aloat chaithio, nianlomkiu chaithio, naiuso angannyamtsün chaithio nouso APAOU tsamai kankü shi-e.

²⁷Lüko ngüsoüh ngo tü angio angkü Yihuda Anounyi nou asio ajekhaiu tsak ta wesanau noin. Nung ajekhaiu ko ngüsoüh Yirusalem bekhan nouso yankü ti thsa tsükanau noin. Ngüsoüh nung tsüangkü chhi naito, ngü Yirusalem bekhan nouso tü in jetlutte. Nung in nou Yirusalem nai nokpao noikham nouso jekthiowane, naiuso sauüh nung lonyatau tsüshio-e.”