Read Khiamniungan Naga Yeremia 18 Bible Online

Yeremia 18 - Khiamniungan Naga bible

Yeremia 18

¹APAOU nou ngo tü ngiom,

²“Pulak saitsün tsamai lüsao, nungko ngü jü ngiongem ni hau kiu-e.”

³Nungtiphe ngo pulak saitsün tsamai sao, nungai ngü apa pulak saikü noikü ep.

⁴Titaoko pulak saitsün pujah nou asai-au tsümeikü iulaji, apaüh nung pujah louküta loüh amao tso saisanshiji.

⁵Nungai APAOU nou ngü tü ngiom,

⁶Pulak saitsün khaiunia nou pujah nou tü titi chhin, nungti asam Israel hai tü chhiau ngo ayam thakü tsüde süne? Pulak saitsün phamong nai puja noitsün khekkü asam jü phamongko noin.

⁷Ti taokolünou ngü mele tsüdekünai nokshing ajantso sekkan-e, lopekkan-e, tsüdekünai lothean-e ta ngioji,

⁸lüko nung mele angei ainou phokle naito, ngo ti chhi-e ta ngiom, nung ngo tsüchhi-e.

⁹Naiuso ti taoko ngo mele tsak, tsüdekünai nokshing tsak shankü nung noi-iau ngio-e,

¹⁰lüko nung mele nou jü ngio tsüangkü tsümeikün chhi naito, ngo ti chhi-e ta ngiom, nung ngo tsüchhi-e.

¹¹Naito lo Yihudahai naiuso Yirusalemhai tü ngü ngüso thako angja kiu au ayang noin ta khukü lüngio. Ngüsoüh chhitsün, naiuso angei kihkih yam ainou lülaolo ta ngüso tü lüngio.

¹²Nungai ngüsoüh thalakü ngio-e, ‘Nyah!, sam tiauta shanshi-e? sam meshen ayangtaiu nai tsakei-e, naiuso sam khaiunia pungkü mongkü tsümeikü chhiau aiutsünli samüh chhi-e.’”

¹³APAOU nou ngioji, “Mele pungkü tü nung khako tilailünou nungtin akuo thawaokü noi lümo ta lüsang. Tiautenai Israelhaiüh ahatau lümeikü chhi tsak chhikü noin!

¹⁴Lebanon ün lungkap nouso tilaitso nyin tsüsaokü noin süne? Tsüdekünai king haiuthso atangsep nou waikü khuwan-e süne?

¹⁵Nungti lüko jü khaiuniasoüh ngo bean; ngüsoüh sotsom nouso tü angannyamtsün jahkiuji. Ngüso khuau noitsün yamko ngüso tü hokkha thekkiu, loto ngüso yamkeng nouso tü tsühoilutji, ngüso yamkheng tsünoikü nai tsakeiji.

¹⁶Asaita chinyankü hau, ngüsoüh nung gohthang alekkat jengtsaiu tsak hau iula-i-iu. Nungko yanlükhun nai eptsünso chikü nou lekkatkü ngüso khaiu ta mon-e.

¹⁷Shingngan ahsheih nou pukhao shipantsün khekkü ngü jü khaiuniaso ngüso ehso khako sukpengan-e. Ngü ngüso tü jüphi sheilut-e; naiuso akuothe shinai ngü ngüso tsühalou-e.”

¹⁸Nungai khaiuniahoi nou ngiom, “Samüh Yerimia thako tso tsak chhiko! Sam tü ayam hanau mesonhoi, mongthat mongsai kiu au ange amonhoi, naiuso Goa ün ngiongem thipengau e-po nouso asai noi-e. Samüh apa thako mi kiuko, küta apaüh ti ngioji nung angtsün laoloko.”

¹⁹Nungtiphe ngü misao sao, “APAOU, ngü ti ngioji nung alula naiuso jü thaiutha jü ehsoüh ti ngioji nungtü anglu.

²⁰Amei nou mai tsümeikü nou süne? Nungti lüko ngüsoüh jü aa thaiutha khanthop tsak thaiukü noin. Akhako ngü ngüso thaiutha ngiomei chitekiu, ni amongmat ngüso ainou phoklekü khuwanau ngo titi tsakiuküla nung ayangsan.

²¹Lüko lo, APAOU, ngüso thsoso naiusile nou; naiuso ngüso pem ehli nai loatkü lü ean-i. Menyiu nouso tsammongpo naiuso thsoso lümowan-i; pohaihoi akia nou naiuso pühehoi nouso ehlithang nai loatkü lü ean-i.

²²Alotsüo tsünoikü ngüso tsamkhaiu hoi asong tsak hau lükamhean-i; küta ngüso alekkat nai lüshapi. Ngüsoüh ngo saliau khanthop tsak thaiu naiuso ngo moniau jin tsak jin.

²³Lüko, APAOU, ngo loatau ngüso ün akausai mongthat chikü ni ngeji. Ngüso aphio lowankiu tsüdekünai ngüso angei lalowankiu. Ngüso ashio tsüepkünai lüloi-an-i; naiuso ni mongmat taoko ngüso tü pha lüphu.”