Read Khiamniungan Naga Yeremia 19 Bible Online

Yeremia 19 - Khiamniungan Naga bible

Yeremia 19

¹APAOU nou ngo tü khuküta puja nou saitsün pulak tsak lütuh ta ngiom. Apaüh loüh khaiuniahoi ong ainou petchehoi ajantso naiuso mesonhoi ong ainou petchehoi ajantso nialoukü,

²Hin- nom Tsamei dongai pulak paiantsün Bekhan yankü khuau ngiom. Nungko ngo apaüh ngo hau kiutsün ngiongem thipengau noiküla.

³APAOU nou ngo tü nung thunshiau ngiom, “Yihuda nokpaohoi naiuso Yirusalem khaiu- niaso, Ngo APAOU Apemshiotsün, Israel hai Goa, nou ngiotsün tü anglu. Ngo nung athang khako khaiunia pungkü nou lula nai thunkü lekkatau thaiutha akuothe tsak kankü shi-e.

⁴Tiautenai khaiuniahoi nou ngo lean küta nung athang nouko ngüso paosiposo tsüdekünai Yihudahai nokpaohoi nou ti tsüngekün amao goa nouso hau aloat chaithio kiutsün tsangkü lochinyanphe ngo nung chhiau noin. Ngüsoüh nung gohthang aphio tsülepkünso sheüh meani-iu,

⁵naiuso ngüsoüh ngüso thsoso Baal hau in nai jahkü aloat chathio kiuau amthang nouso shan. Nung chhiau ngü ngüso tü tilaitso tsüthoilut, tsüdekünai jü mongyang ashitso tsü- shi.

⁶Loto nung gohthang tü Topheth ta tsüdekünai Hinnom Tsamei ta tsüdekü lüko Achaoat Tsamei ta jonau atao shiji.

⁷Nung athang nouko ngü Yihuda hai si Yirusalem hai ün ayangtaiutsün chikü yaangau iula-i-e. Ngüso ehoi hau ngüso khako ashioloutsün epiküta ehlithang nai ngüso loat-i-e. Ngüso meapem liuai noitsün waio si thainian nouso hau waowan-e.

⁸Ayanlükhuntsün khaiunia pungkü lekkat küta ngawanau lümeikü nung noknio khako ngü alotheantsün atsüoting kankü shi-e.

⁹Nung noknio ehoi nou lemlo-e küta nungko noitsün khaiuniahoi loat-e. Nungai noknio lemlouwantsün thatü thsüokü noi-e tititenai nung noknio mongai khaiuniahoi nou momo thsoso naiuso ngüsoüh tsak si tsak nyih hetsün noi-e.”

¹⁰Nungai APAOU nou ngo ko khuhatsün khaiuniahoi khako nung pulak lopai küta.

¹¹APAOU Akongteng nou ngiotsün ngüso hau nungti lüchite ta ngiom, “Ngü nung khaiuniahoi naiuso noknio, nung puja lak khekkü lopai-e naiuso nung müjam saishiau tsüshio-e. Khaiuniahoi nou ngüso meapem khananau amao gohthang tiai tsünoishiphe Topheth nai lüko khanan-e.

¹²Nungli nung noknio naiuso nung khaiuniahoi nouso tü Topheth khekkü chhi-e ta ngo thalouji.

¹³Yirusalem hai tsam, Yihuda hai nokpaohoi tsam nouso, naiuso sübao tsamkhaiu nouso ai kianthsüo nouso hau angannyam- tsün jahkiuji naiuso amao goh nouso hau theng chaithio satpeng-nungso chikü Topheth lilu tsüsiokü noi-e.”

¹⁴Nungai APAOU nou ngo apa ngiongem welutau hongkü noitsün Topheth leankü khu. Nungai ngo khukü Amkham Tsam khako tsaküta khaiunia chikü tü ngiom,

¹⁵APAOU Akongteng, Israel Goa nou nungti ngioji: “Ngü nung noknio naiuso nung shimkü noitsün nokshing nouso chikü khako ngü ngiokü taiutsün angja kankü shi-e, tiautenai ngo ngiotsün tü tsüangkü asam mong kongkü iulan.”