Read Khiamniungan Naga Yeremia 20 Bible Online

Yeremia 20 - Khiamniungan Naga bible

Yeremia 20

¹Immer thso nou meson Pashur nung Amkham Tsam nai asonghoi ongko atengau thekü noi taoko, ngü khapiam ngio ngiotsün lula

²kü apaüh ngo woiatküta Amkham Tsam nai asongthun Benjamin Bekhan shimkü sonkhiang ao nou kekü akho tsamai wanau ngiokhem kiu.

³Nungthan nyap, meson Pashurüh ngo akhotsam ainou sokkü ta ngü apa tü ngiom, “APAOU nou ni Pashur ta tsünian, lüko apaüh kiutsün anian nungto ‘Alumai Lekkattsün,’ ta jonji.

⁴Ngü ni apem tü naiuso ahaiso tü alekkat au tsak shan-e, naiuso ni nung chikü ngüso ehoi salaiu nou loattsün eppe ta APAOU pemüh ngiokü noin. ‘Ngü Yihuda khaiunia chikü Babilon hai nokpao oukong ai thiowan-e; naiuso apaüh ajantso apa goumchi ai thaloukü kankü khuwan-e naiuso ajantso loatkü wan-e.

⁵Loüh ngü nung noknio tengkam ngüso ehso hau aplouwan-i-e naiuso ngüso jengtsaiu si chaiou nouso thalouwan-i-e, Yihuda hai nokpaohoi chaiou jengtsaiu nouso lüko alum Babilon goumchi ai kankü yaan-e.

⁶Pashur, athaiutha lüko nung noi-e, ni naiuso atsamkhaiu lüko thalou-e küta Babilon ai kankü khuwan-e. Nungko ni ahaiso naiuso sauhai hau ni atsüotsüdekü mitha piakü kiukü noiküla ngüso ko aikü ean-e küta khanan-e.’”

⁷APAOU, ni ngo kausaiat, naiuso ngo kausaiatkü noiküla, Ngo ko nai ni kongthso, naiuso ni ngo shioheaniu ta khaiunia pungkü ngo tü nyailutji; ajekhaiu tsütokü ngüso ngo tü nyailutji.

⁸Tiautenai titaoko ngü chiteji, “Pha poji! Alothe!” ta sang asong nou weaulu noiji. Ngü, angiongem pungpengtsün shioko jü thaiutha atao pungkü APAOU ngio nung athut naiuso alochi tsak iula-iu.

⁹Lüko tilai ngü, “Ngü APAOU nou tsüyangsanshi-e naiuso apa nianko loto tsüchite shi-e ta ngio-e,” nungai angio ngem nung in tsak khekkü jümongai jekkü noiji. Tilai ngü nung lolaokü taiuau koweji lüko loto nung lolaokü taiuau tsüshioting.

¹⁰“Alumai alekkat noin! ta khaiunia pungkü chitehetsün ngü lulaji. Nungtiphe samüh oukong suntsünso hau apa thaiutha chiteko!” Jü haimeitengsoüh lüko jü aa nung asaowan ta taiukü noiji. ‘Tsüngean apa kausaiatau shio-e,’ ta ngüsoüh chiteji; “nungai samüh apa thaloukü ta apa tü phaosanau shio-e.”

¹¹Lüko ni, APAOU, oukong naiuso akong ngoko noin, nungtiphe ngo jeiatitsünsoüh ashio tsüeppe. Ngüso athontsüyangkü miam-e tiautenai ngüsoüh ashio tsüepji.

¹²Lüko, Akongteng APAOU, ni khaiuniaso tü ngiotsüo nou theluji; ngüso mongpemai si mongai ti noin nung ni ngeji. Nungtiphe ni jü ehso khako phaosantsün ngü hau a-epi; tititenai ngo jü mi nouso aphamongai letaiuji.

¹³APAOU tü jih lühang! APAOU nou lülomsan! tiautenai tsümeikün khaiuniahoi oukong ainou ajeiatantsünso ni halouji.

¹⁴Ngo chettsün ajekhaiu nou athesan lüthe! jünyiuüh ngo chettsün ajekhaiu nou lübe-an-i!

¹⁵“Nung mele! Ni melothso tsak epiu!” ta tilai nung ngiongem apaüh kankü shin nungti jüpo monglingitsün khaiunia nou athesan lüthe.

¹⁶Apa to APAOU nou nung noknio nouso atsüojinyang tsülepkü lomowantsün khekkü lüthe. Ahom akia nou shaptsün sang apa hau lülula-i naiuso anyiwem tao ehli ngem lülula-i,

¹⁷tiautenai apaüh ngo mochetkün khako loatkü tsüwan. Nungtitünto jünyiu methso noithang nou jü etamthang noi-ela.

¹⁸Ngo angja omhelu waoheau tiauta chetkiu? Tsüdekünai jü aakih nung amiam nai thonane süne?