Read Khiamniungan Naga Yeremia 21 Bible Online

Yeremia 21 - Khiamniungan Naga bible

Yeremia 21

¹Yihudahai nokpao Zedekiaüh Malkia thso Pashur naiuso Maaseia thso meson Zefania ne nung akoja ngiongem kankü jü dongai hongkü ngiom:

²“Tsüojinyangko sam thaiutha APAOU tü achitekiu, tiautenai Babilon hai Nokpao Nebukadnezar naiuso apa süpaisoüh noknio nou thalouwanji. Tsüngean, APAOU nou apa athanga ii hantsün ongko tsak sam thaiutha chhiküta Nebukadnezar nung ainou laoloukü khuwane sao.”

³Nungai APAOU nou ngo tü ngiom, khaiunia sauhai adongai hongkü noin

⁴nungso hau APAOU Israel Goa nou Zedekia tü ngiotsün nungti chite kü ngiom, “Zedekia, Babilon hai nokpao naiuso apa süpaiso thako ehlikü noitsün asüpaiso ngü shiolouau noin. Ngo asüpaiso ün dun nouso noknio nokwemko kamsan-e.

⁵Jü oukong jü amongmat, jü atheshan, naiuso jü amongsong apem nou ni thako eh li-e.

⁶Ngü nung noknio nouko kihtsün khaiunia chikü loate; nung khaiunia naiuso thainian nouso akiathe tsaküh ean-e.

⁷Lüko ni, ni nou asonghoi ehli nai naiusile nai, naiuso akia ainou aasantsün khaiuniahoi nouso-asam loatkü wanau aiutsün asam ehso, naiuso Nokpao Nebukadnezar hau apem thalouwan-i-e. Nebukadnezarüh asam apem loatkü wan-e. Apaüh asam sau hautsüo atsüojinyang tsühan-e ta ngo, APAOU, nou ngiowaniu.”

⁸Nungai APAOU nou ngo tü ngiom, nung khaiunia nouso tü nungti lüngio; “Anglu! Ngo, APAOU nou, aa nai niatsün si eantsün nai niatsün yam asam khako acholouau taiukiuji.

⁹Nung noknio nouko sau noi-e sah nou, naiu nou naiuso imkia nou ean-e. Lüko sau shikhuküta lo noknio lemlouwantsün Babilonhai phamongai thumkü nappane, tsüloate, naiuso apa aa to apa ehli mai eptsün paopei tsak khekkü noi-e.

¹⁰Ngü nung noknio tsüpoitaiukü lomowanau yanglowaniu: Nung Babilonhai nokpao phamongai kiuwan-e küta apaüh nung noknio in nou jekthiowan-e, ta ngo, APAOU nou ngiowaniu.”

¹¹APAOU nou David kau Yihuda thsaosithsoso hau nung ngiongem lükiu ta ngotü ngiom: “Ngo APAOU nou ti ngioji nung anglu. Ajekhaiu tsütokü ngiotsüo nou chhiji ta lüyang. A-aploutsün khaiunia pha ainou angja eptsün lükipsan. Nungti tsü chhikü naito asamüh tsümeikü chhitsün nou jü mongmattsün nung alonyatau tsüshiokün inli nyai-e.

¹³Yirusalem, ni tsamei nai lung lokchokü noitsün tsak khekkü, tsamei nouso khengai noin. Sauüh ngo komanau tsüshio tsüdekünai jü pe losatkü napau tsüshio ta ni ngioji. Lüko ngo ni thako ehli li-e.

¹⁴Asamüh chhisantsün likü ngü asam hau angja kiu-e. Ngü anokpao tsam tü in nou jeklut-e naiuso nung lemkü noitsün alum in nou jekthiowan-e, ta ngo APAOU nou ngiowaniu.”