Read Khiamniungan Naga Yeremia 22 Bible Online

Yeremia 22 - Khiamniungan Naga bible

Yeremia 22

¹APAOU nou ngo tü David thsaosithsoso, Yihuda hai nokpao tsamai khuküta nokpao nou tü, apa khemko asonghoi nouso tü, naiuso Yirusalem hai tü APAOU nou ngiotsün angau lüngio ta ngiom:

³“Ti asio naiuso ayamtha noin nung lüchhi, ta ngo APAOU nou asam tü thoilutji. Thangmangatkü noitsün khaiunia athangmang kiutsün khaiunia ainou akipsan. Mesanhoi, mejet me ouhoi naiuso jihi hoi ta lathangmang. Nung asiothang nouko aphio tsünoikün khaiuniahoi laloat.

⁴Asamüh ngü thoiluttsünli atsüoting chhi naito, nungaito David thsaosithsoso asai nokpao-e. Naiuso ngüso khaiunia asonghoi nousoko aikü mokthso nou tenkeitsün tsamkei nouso chiai noikü nung nokpao bekhan nouso yankeitsün tsülao-e.

⁵Lüko asamüh jü athoilut nouso angio tsüangkü naito, nung nokpao tsam lothekü nyomane ta ngo, APAOU nou ngiomong shingkü ngioji.

⁶“Jü khako Yihudahai nokpao tsam Gilead alengmei goumchi naiuso Lebanon king nouso khekkü noin, lüko ngü nung athang khaiunia sau kih au tsüshiokü aodangkü iula-i-e.

⁷Ngü nung lotheau khaiuniahoi hongji. Ngüso apemüh ngüso ou kankü shikü alengmei cedar pai khiam nou hehong küta nungso in nai yakthio-e.

⁸“Nungphiai gohmao khaiuniahoi piakü nung yankü khunai, khaiunia pungkü tsak si tsak tü, tiauta Ngo, APAOU nou nung noknio asong nou tü nungti kankei ta sange-e.

⁹Nungai ngüsoüh APAOU ngüso Goa ko athalou-e taiutsün leankü amao goa nouso amkham naiuso yathsüokü khuwan ta ngüsoüh thashi-e.”

¹⁰Yihuda khaiuniaso, Nokpao Josia eantsün thaiutha lashap; tsüdekünai lamongsaiu: Lüko apa thso Joahaz, sau apa chettsün goumchi tilaitso müjam epshiau tsüshiokü hau ngüsoüh kankü khuwan apa thaiutha bao thsüokü lüshap.

¹¹Joahaz, sauüh apa po Josia, Yihudahai nokpao lilou, APAOU nou apa thaiutha ngioji, “Apa tilaitso laokü tsüshishiau nung ainou khu- waniu.

¹²Ngüsoüh kankü khutsün goumchi nai apa eane, naiuso apaüh nung goumchi loüh tilaitso tsüepshi-e.”

¹³Sauüh meshen tsam ngiotsüo tsüdekü nou lah-e, naiuso nung tsampai asaitha nou tsangkü tsüdekü losung-e, naiuso sauüh meshen goumchi khaiuniaso hau meshen chhi mai tsükiukü yaang nai yathsüo-i-e, nung khaiunia inyate!

¹⁴Sauüh, “Ngo jü thaiutha asungthun tsamthong tsampai alengmei sunkü tsam asong tsümeikü tsak lah-e.” Naiuso nungti nung tsam da koukhanthso nouso Cedar pai nou shankü nungtü aleng asong nou chukü lah-e ta ngioji, nung khaiunia inyate.

¹⁵Amaohai khengai cedar pai nou tsam ameiting lahnaito, nungüh ni nokpao amei tsak iula-e ta yangjiso? Apoüh asaita ngiotsüo naiuso asio nou chhiküta aakih nai amongleng saiukü ep: naiuso apaüh chhisiyatsün alumko apa khaai tsüomeikü khu.

¹⁶Apaüh tsosilu hai tü ayamtha nai kankei naiuso nung apa thaiutha amongtsam tsak noiküla. Nung tü APAOU ngelatsün ta ngioji.

¹⁷Lüko ni atengkhaiu mongchio thaiuthalu epkü aphio tsülepkünso loatji naiuso akhaiuniaso thatü thsüokü thangmangji ta APAOU nou ngiom.

¹⁸Nungtiphe, Yihudahai nokpao Josia thso nou Jehoiakim thaiutha APAOU nou ngioji, “Apa etsün thaiutha sauühtso, ‘Titi alekkat, jüpaiu, titi alekkat!’ ta ngiokü tsümongsaiu-e. ‘Jü APAOU! Jü nokpao!’ ta ngiokü apa thaiutha sauüh tsüshappe.

¹⁹Gado tsak ean nai asuhatkiukü yangtsünli apa Yirusalem bekhan nouso yanlükhun küta yakkan-e.”

²⁰Yirusalem khaiuniaso, Lebanon ai sungküta sang asong nou lüwe, Bashan goumchi ai khuküta lüshih; Moab hai king nouso ai khukü lüjon, tiautenai ni tsüojintsünso chikü shiolouwaniu.

²¹Tilai ni tsüomeikü noiküla APAOU nou niko chite, lüko ni anglu au tsümongchio. Nungti ni aakih chikü chhikü noiküla; ni tilaitso APAOU tü angio tsüang.

²²Asam aheihoi nouso ahsheih nou shipkü khuwan-e, ni tsüojintsünso ehli nai sua au thaloukü kankü khuwan-e, asam noknio lonyapkü amiam nai wan-e tiautenai nung tsümeikün chikü asamüh chhitaiu nou noin.

²³Lebanon ainou cedar pai nouso kankü shitsün ongko asam aalou eptsünso; tilai asam tü angja omhe nou shiuh-e nungai menyiu tsak thso chet taoko akia sungtsünli titi atsüojin au tsak noi-e.

²⁴APAOU nou Yihudahai nokpao Jehoiakim thso nokpao Jehoiachin tü ngiom, “Ngo atsüoting aa Goa tsakli noilüko ngü ni seksan

²⁵küta ni hatkü noitsün khaiuniahoi, sauhaiüh ni loat au mongchiokü noin nungso Babilon hai nokpao Nebukadnezar naiuso apa süpaiso hau kiuwan-e.

²⁶Ni naiuso anyiu aje ngü me goumchi ai thaloukü khu-i-e. Ti goumchi ko ni tsüchet nungko ni naiuso anyiu aje nemthso ean-e.

²⁷Ni nung goumchi müjam epshiau mongchio-e lüko tilaitso ni laokü tsüshi shi-e.”

²⁸Ngü ngiom, “Nokpao Jehoiachin nung sauüh tsüaiukü lopaiküta yakkantsün pulak tsak khekkü iulan süne? Nung apa si apa thsosoüh tsüngekün goumchi tsakai thaloukü khuwantsün shioko süne?”

²⁹O goumchi, goumchi, goumchi! APAOU nou ti ngioji nungtü anglu:

³⁰“Nung khaiunia nou apa thsoso mowankü, tilaitso ashio tsü eptsün khaiunia tsak ta lüwan. Yihuda nai David Nokpao noikhamko tsülaokü nokpaoau apa thsaosithsoso tsünoi-e ta Ngo, APAOU nou ngiowaniu.”