Read Khiamniungan Naga Yeremia 23 Bible Online

Yeremia 23 - Khiamniungan Naga bible

Yeremia 23

¹Jü khaiuniaso lomowantsün naiuso khupengitsün nokpao nouso khako inyate ta APAOU nou ngioji!

²Apa khaiuniaso paotsangau noitsün nokpao nouso thaiutha APAOU, Israel Goa nou nungti ngioji: “Asamüh jü khaiuniaso tsüpaotsangkü, ngüso kompengan. Nungtiphe asamüh tsümeikü chhitsün thaiutha ngü asam hau angja kiuau noin.

³Jü khaiunia apoi nouso ngü kompengantsün goumchi nouso ainou ngo niakame, naiuso ngüso goumchi ai laokü nialoukü shi-e. Ngüso chetsinyimkü haowe nai singkü khu-e.

⁴Ngü ngüso paotsangau nokpaohoi taiukiu-e. Loto jü khaiuniaso ahat si alekkat ti tsünoishi-e, naiuso ngo loüh ngüso hau angja tsükiushi-e, ta ngo, APAOU, nou ngiowaniu.”

⁵“David kau ainou asio nokpao tsak ngü chosanau atao shiji, ta APAOU nou ngioji. Nung nokpao nou mongsai amei noikü goumchi apemai ngiotsüo naiuso asio nou chhi-e.

⁶Apa nokpao taoko Yihuda hai kipsankü noi-e, naiuso Israel hai aalou nai noi-e. Naiuso Apa tü, ‘APAOU sam kipsantsün,’ ta jone.

⁷APAOU nou ngioji, “Ijip goumchi ainou Israel hai niasantsün aa Goa nianko khaiuniahoi nousoüh loto ngiomong shinge tsüshan shiau, “atao nou shiji.”

⁸Nungliko, ngüsoüh ajenapki goumchi naiuso ngü ngüso kompengantsün amao goumchi nouso ainou niasantsün aa Goa nianko ta ngiomong shinge shan-e, küta ngüso meshen goumchi nai kih-e.”

⁹E-po nouso thaiutha ko ngo da jü mongpem lothekü noin; Jü ou chikü ngaongaoji. APAOU naiuso Apa asio ngio nouso shioko theng nou shioheantsün ngo atukkat khaiunia tsak khekkü noin.

¹⁰Tititenai goumchi nou tsütsamtsütsüokü nou meankü noin; ngüso aakih akausai nai kihküta ngüso oukong ayam tsüthakünai kankeiji. Tiautenai APAOU ün athesan nou goum nou shapji naiuso khengliu nouso wonankü noin.

¹¹“Epohoi naiuso mesonhoi nouso Goa lon tsühattsün ngüso akausai chhisiya ngo Jü Tsamai epiu” ta APAOU nou ngioji.

¹²Nungtiphe ngüso yam ngüso thaiutha anyakhem nai anyinchei athang nousoli noi-e; naiuso ngü ngüso nungko hokkha thekkü khia-i-e. Ngü ngüso khako akuothe kankü shi-e, nung ngüso hau alohat kiuau nou atao shiji, ta Ngo, APAOU nou ngiowaniu.

¹³Samaria e-po nouso da ngü angei nou epji: ngüsoüh Baal nianko chite küta jü khaiunia Israel ayam tsüthakünai nialükhun.

¹⁴Lüko ngü Yirusalem nai e-po nousoüh nungtü tekkü tsaokü chhitsün epiu: ngüsoüh tsütsamtsütsüo kankeiji naiuso yaang ngio chiteji; tsüthakün chhiau ngüsoüh khaiuniahoi hachuji, nungtiphe tsümeikü chhitsün ainou sauüh tsülolaoji. Ngüso chikü jükhako Sodom naiuso Gomora hai tsümeikün khaiuniahoi khekkülu noin.

¹⁵“Nungtiphe, Yirusalemhai e-po nouso thaiutha ngo, Apemshiotsün APAOU nou nungti ngioji: Ngo ngüsoüh heau akhosak paisam nouso naiuso ashiuau ahsheih nou kiu-e, tiautenai nung e-po nouso ainou goa lon tsühattsün goumchi thapekkü lopengiu.”

¹⁶Apemshiotsün APAOU nou Yirusalem hai tü ngiom, “E-po nousoüh ti ngioji nungtü la-anglu; tiautenai ngüsoüh asam hau tsüthakün ayang nou miankü chiteji. Ngüsoüh asam hau ngü tsüngiokün ngüso mongyang ngio chiteji.

¹⁷Jü ngio ang-au nantsün khaiuniahoi nouso tü ngüsoüh ngioji, asam ko aalou nou noi-e. Naiuso angio tsü ang mongkan khaiunia pungkü tü akuothe nou tilaitso tsüshithan-e ta ngioji.”

¹⁸Ngü ngiom, “Nung e-po nouso sauüh tilaitso APAOU ün akhei mongyang tsünge. Ngüso sauühtso apa ngiongem tilaitso tsülula, tsüdekünai tsüngela, tsüdekünai tsüanglu, tsüdekünai apa ngiongem tü mongtsükiu.

¹⁹APAOU mongmattsün nung atsüoting ah-ou ahsheih tsakli sungkü noin, nung amongmat nou tsümeikünso khaiusuo ai salute,

²⁰naiuso apaüh yangtaiutsün alum mochhikhemkün lektso nung laokü tsükhu-e. Ashiau ajekhaiu nai apa khaiuniasoüh nung tsangsheikü ngela-e.”

²¹APAOU nou ngiom, “Nung e-po nouso ngo tsühong, lüko ngüso khun. Ngü ngüso hau jü ngiongem titso tsükiu. Lüko ngüsoüh jü nianko chiteji.

²²Ngüsoüh ngü nou akhei mongyang nouso ngetünto, jü khaiuniaso tü jü ngiongem punglut küta ngüso hau yam tsümeikün wananikü naiuso tsümeikü chhisi- yatsün ainou ngüso lolaoau shio-ela.

²³“Ngo athang tsak kolu tsüdekü alumai noitsün Goa tsak noin,

²⁴Ngü epau tsüshiokü saulünou pamkü noiau tsüshio. Aün nai naiuso goum- chi nai ngo alumai noin ta asamüh tsüngeso?

²⁵Ngüso meanmean nai ngüso hau ngo jü ngiongem kium ta wekü jü nianko yang ngio chitetsün ep nouso ngo ngeji.

²⁶Nung E-po nousoüh shansantsün yaang ngio nou tilektso jü khaiunia ayam tsüthakü nai niakei-e?

²⁷Ngüso paosiposo ngo beankü Baal dongai phoklekü khuwantsünli, ngüso meamean chitetsün nou jü khaiu- niaso hau ngü bean-iau ngüsoüh yangji.

²⁸E-po sauüh meameankü noin, apa hau mea mean lüchite-i, lüko e-po sauüh jü-ngiongem lula, apa hau nung ngiongem mongkiukü lüpongpengi. Tsonyak nouko tsokap tiko we-ekü noin? ta APAOU nou ngioji.

²⁹Jüngio nung in khekkü, naiuso lung nelangkü thiopektsün shenhop tsak khekkü tsüdeso?

³⁰Tsaküh tsak ngio kankü nung jü ngiongemli pungpengtsün e-po nouso thako ngo noin.

³¹Loüh e-po nouso sauhaiüh meshen chija ngio nung ngü ainou ep ta pungpengji, ngo ngüso thako noin.

³²Ngo, APAOU, nou ti ngioji anglu! Ngo yaang ngio nousoüh meankü ngüso meamean chitetsün e-po nouso thako noin. Ngüsoüh nung mea mean nouso yaang naiuso abülom nouko hakü chiteküta jü khaiuniaso yam tsüthakünai nialükhunji. Ngü ngüso tsühong tsüdekünai lükhu ta thoilutkü tsünoi, nungtiphe ngüso khaiuniahoi thaiutha ti apuo ahachu tsünoi, ta Ngo, APAOU, nou ngiowaniu.”

³³APAOU nou ngo tü ngiom, “Yerimia, tilai jü khaiuniaso ongko tsaküh tsüdekünai e-pohoi ongko tsaküh, tsüdekünai mesonhoi ongko tsaküh ni tü, ‘APAOU ün ngiongem ti in noin?’ ta sange ‘ni APAOU thaiutha thsale noin, naiuso apaüh ni wanane ta ni apa hau chiteau noin.’

³⁴Jü khaiuniaso ongko tsaküh tsüdekünai e-pohoi ongko tsaküh, tsüdekünai mesonhoi ongko tsaküh lüko nung APAOU ün thsale, ta ngioyak kankei naito, ngü apa naiuso apa tsamkhaiu hau angja kiu-e.

³⁵Nungliko, khaiunia pungkü nou meshen haiso tsüdekünai tsammongso tü, ‘APAOU nou ti athashitsün kiukü noin? naiuso APAOU nou ti ngiokü noin?’ ta sangau noin.

³⁶Nungtiphe ngüsoüh, ‘APAOU ün thsale’ ta ngioyak tsükan- keiau noin, tiautenai ajantsoüh nung kankei naito, ngü jü ngiongem apa hau atsüoting thsale iula-i-e. Khaiu- niahoi nou ngüso ün Akongteng aa Goa, ngio nou khepleankiu-iu.

³⁷Yerimiaüh e-po nouso tü, ‘APAOU nou asam hau athashitsün ti kiu? naiuso APAOU nou asam tü ti ngiokü noiküla?’ ta sang.

³⁸Naiuso ngüsoüh jü athoilut angio tsüangkü, ‘APAOU ün thsale,’ ta ngiokü ngüso hau chite naito,

³⁹ngü ngüso naiuso ngüso hau kiutsün noknio ngüso paosiposo hakü nemthso loklouküta ngo ainou laiukü yakkan-e.

⁴⁰Ngü, ngüsoüh tilaitso tsübeankü hau ngüso khako amiam naiuso tsüshiokün kankü shi-e.”