Read Khiamniungan Naga Yeremia 24 Bible Online

Yeremia 24 - Khiamniungan Naga bible

Yeremia 24

¹APAOU nou ngo hau phioshep thsa nime Amkham Tsam khako taiukü han. (Nung Babilon hai Nokpao Nebukadnezarüh Yihudahai Nokpao Jehoiachin thso nou Jehoiakim nung jengtsaiu shantsünso, waimon nouso, naiuso Yihudahai ahei nousoko aikü Yirusalem ainou Babilon ai thaloukü khuwantsün phiko noiküla.)

²Nung thsa aya nouko piamkü shemtsün phioshep amei nouso; naiuso thsa amao tsak nouko eheau thatü tsümeikün phioshep nouso napkü noiküla.

³Nungai APAOU nou ngo tü ngiom, “Yerimia ni ti epji?” “Phioshep sübao amei nouso thatü mei, naiuso tsümeikün nung eheautso thatü tsümeikü epji,” ta ngü thalan.

⁴Nungai APAOU nou ngo tü ngiom,

⁵“Ngo, APAOU Israel Goa, Babilon nai thaloukü khuwantsün khaiunia nouso nung phioshep amei nouso khekkü noin, naiuso ngü ngüso atsüojinyang nai wesan-e.

⁶Ngü ngüso chiai jiokü thape küta ngüso nung goumchi ai nialoukü shi-e. Ngo ngüso shansane, naiuso ngüso tsülotheane, ngü ngüso thome, lüko ngüso tsüshekkane.

⁷Ngü ngüso hau ngo APAOU noin ta ngeloau mong- chiotsün mongyang kiu-e. Nungai ngüso jü khaiuniaso noi-e, naiuso ngo ngüso Goa noi-e, Tiautenai ngüso mongpem chikü nou ngüso jü dongai laokü shi-e.

⁸“Ngü Yihudahai nokpao Zedekia, apa khemko asong nouso, nung goumchi nai kihtsün Yirusalemhai apoitaiu nouso, naiuso Ijip goumchi nai noi nouso achoi shioko eheau tsüshiokü noitsün phioshep nouso khekkü shane ta APAOU nou ngioji.

⁹Goumchi mele nouso lekkatau ngüso khako ngo akuothe tsak kankü shi-e. Khaiuniahoi nou ngüso lotsao-e, ngüso thaiutha lonyai-e-e, ngüso lochi-e, naiuso ngü ngüso pengpunitsün athang pungkü nai ngüso nian athesan tsakli kankei-e.

¹⁰Ngü ngüso si ngüso paosiposo hau kiutaiutsün goumchi nai ngüso moisemkü molomowankün lektso ngüso khako ehli, naiusile, naiuso imkia nou hong-e.”