Read Khiamniungan Naga Yeremia 25 Bible Online

Yeremia 25 - Khiamniungan Naga bible

Yeremia 25

¹Josia thso nou Jehoiakim, Yihudahai nokpao thetsün pon püle nouko nai, Yihuda khaiunia chikü thaiutha APAOU ainou ngü ngiongem tsak epkü noiküla. (Nung Babilon hai nokpao Nebukadnezar nokshing chongting pon nouko noiküla.)

²Ngü Yihuda hai si Yirusalem hai khaiunia chikü tü ngiom,

³“Yihuda hai nokpao Amon thso nou Josia nokshing pon chekü süme ainou lonyi saokü, nung pon kheikü süme APAOU nou ngüko chite, naiuso apaüh ti ngiom nung ngü asam hau jam lüko tsüchitekü tsünoi. Lüko asamüh nung da mong tsükiu.

⁴APAOU nou apa yathsüotsün e-po nouso tsülaokü hong lüko asamüh ngüso tü ang-au mong tsükiu.

⁵Asam si asam paosiposo hau asaita tengkam thaiutha goumchi APAOU naiuso angei chhisiyatsün ainou phokleau ngiom.

⁶Ngüsoüh asam tü amao goa nouso yathsüokü tsü amkhamau naiuso asamüh shansantsün sotsom amkhamtsün nou APAOU tsümongmati-au ngiom. Asamüh APAOU tü angio angtünto, apaüh asam hau angja tsükiu-ela.

⁷Lüko asamüh sotsom shantsün nou apa mongmat-i, naiuso apa tü angio angau nan nou shioko asam chija apa amongmat kankü shilom.

⁸“Nungtiphe, APAOU Apemshio- tsün nou ngioji, asamüh apa tü angio tsüang nou shioko,

⁹‘athaplu, ngo ajenapki mele chikü, naiuso ngo yathsüotsün Babilonhai nokpao Nebukadnezar jone, ta APAOU nou ngioji, naiuso nung goumchi khaiunia naiuso nung mele nouso lemkü noitsün chikü thako ngü ngüso honge, naiuso ngü ngüso moisemkü mowani-e. Naiuso ngüso alekkatau tsak, naiuso achinyanau tsak, naiuso asaita aodangkü hau iula-i-e ta ngo APAOU nou ngiowaniu.

¹⁰Ngü ngüso koisilomkü tsamsigoh shan sümai nai monglingetsün sang ngem nouso lotsame. Ngüso tson thaiutha ngüsoüh inkhiam tsütaiu-e, naiuso nungso khülam tsünoishi-e.

¹¹Naiuso nung goumchi athum lotheküta aodangkü iula-e naiuso chenpa mele nousoüh Babilon hai nokpao pon aochinyat yathsüo-e.

¹²Nungphiai Babilon nokpao naiuso nung mele nouso ngüso angei thaiutha ngo angja kiu-e. Naiuso ngü nung shingkhannio athontsüyangkü thaiutha lothekü le-ane.

¹³Ngü Yerimia tsangkü chitenai thsam nai sattaiutsün akuothe nouso chikü naiuso mele nouso khako akuothe kanjikanau ngü lohattsün nou Babilon hau angja kiu-e.

¹⁴Ngüso chhi mai ngü Babilon hau laokü kiushi-e, naiuso mele piakü nou si nokpao asong nousoüh ngüso shankiu-e.’”

¹⁵APAOU, Israel hai Goa nou ngo tü ngiom, “Jü amongmat nou meankü noitsün thengkam tsak nungko noin. Nung lülou küta ngü ni hongtsün mele nouso chikü dongai kankü lükhu, naiuso nungko nou ngüso hau lüshiu-i.

¹⁶Tilai ngüsoüh nung shiu-e, ngüso nungüh ngaongao-e tiautenai ngüso thako ngü ehli nou hongji.”

¹⁷Nungtiphe ngü APAOU pha ainou thengkam louküta nung APAOU nou ngü hongtsün mele nouso hau kiu, naiuso nungko nou ngüso hau shiu-i.

¹⁸Nungtiphe ngüso aodangkü iula- kü, thsüokü alekkat epau, ngüsoüh losaokü chhitsünli ngüso nian athesan tsakli kankei-au Yirusalem naiuso Yihuda noksong nouso, ngüso nokpao naiuso aheihoi nousoko hakü chikü hau nung shiu-i.

¹⁹Nung thengkam ko nou shiu-au noitsün amao nouso chikü nungko lingthiokü noin: Ijip nai nokpao, apa khemko asonghoi naiuso aheihoi; Ijip hai naiuso Ijip nai noitsün gohmao khaiuniahoi chikü; Uz hai goumchi nai nokpao nouso chikü; Philistia hai noknio Askelon, Gaza naiuso, Ekron nai nokshingtsün nokpao nouso chikü, naiuso Asdod nai poikü noitsünso chikü; Edom hai, Moab hai, naiuso Ammon hai khaiunia chikü, Tair naiuso Sidon hai nokpao nouso chikü, Mediteranian goh ai noitsün nokpao nouso chikü, Dedan, Tema, naiuso Buz hai noknio nouso chikü, Khaiuo letletkü iuwantsünso chikü Arabia hai nokpao chikü singtso goh mele nouso nokpao chikü Zimri hai, Elam hai naiuso Media hai nokpao chikü, Ajenapki nokpao nouso chikü, laiukü si shimkü nai nouso, tsak tü thankü tsak ta, Goumchi nai noitsün mele pungkü nou nungko nou shiu-e. Apem chiko aphiteng nai Babilon hai nokpao nou shiu-e.

²⁷Nungai APAOU nou ngo tü ngiom, “ngüsoüh tukkat küta mophukün lektso, ngüso atsashiau tsüshiokü moloikün lektso, nung theng lüshiu ta ngo, APAOU Apemshiotsün Israel hai Goa nou ngüso hau ngiokhem tsak kiuji ta khaiuniahoi hau lüchite, tiautenai nung ehli ngü ngüso thako hongji.

²⁸Naiuso ngüsoüh apha konou nung thengkam shiu-au nan naito, ngüso to APAOU Apemshiotsün nou nung titilünou shiu aulu noin ta ngioji ta lüchite.

²⁹Jü alothe chhisiya nou ngü jü noknio ko yalou-e. Ngüso angja tsüeppe ta ngüsoüh yangji süne? Ngüso hau angja kiu-e, tititenai goumchi khaiunia chikü khako ngü ehli nou honge ta Ngo APAOU Apemshiotsün nou ngiowaniu.

³⁰“Yerimia, ni, Ngü ngiotaiu nou alum pungpengau noin. Nung khaiunia nouso hau ni nung chiteau noin. ‘APAOU nou aün ainou jekü shi-e naiuso aün akhengting ainou ahmok mokke. Apa khaiuniaso thako apa jekü shi-e khaiunia tsaküh sainaoship nya nai sang asong nou wetsün khekkü shih-e goumchi khaiunia pungkü nou apa sangh lula-e,

³¹naiuso sang alangtha nou goumchi athun saokü khu-e. Mele nouso thako APAOU mi tsak noin. Apaüh khaiunia chikü thelu-e, naiuso tsümeikünso eantsün nai honge, ta APAOU nou ngiowaniu.’”

³²Mele tsak ainou mele tsak dongai akuothe nou shiji, naiuso goumchi athonting ainou ah-ou-ahsheih asong tsak kamsankü shiji ta APAOU Akongteng nou ngioji.

³³Nung ajekhaiu ko APAOU nou loattsün mea nouso goumchi athon tsak ainou tsak ta sukpenge. Ngüso thaiutha mongsaiu au sau tsünoi-e, naiuso nung mea nouso kankü khukü tsükhanne. Ngüso mea goh ai beisikinli kamsankü noi-e.

³⁴Asam ehoi nouso, lüshap, asam jü khaiunia jintsünso sang songkü lüshap! Mongsaiukü pukhao nai lüchinkei. Asam chaoatau thaiutha atao nou shisao-iu, naiuso onnemok- thso khekkü asam tappekke.

³⁵Nungko asam khuloau ayam tsünoi-e.

³⁶Asam amongkia nai mongsaiukü lüshap, tiautenai APAOU apa mongmat nou asam goumchi lotheaniu naiuso asam aaloukü noitsün goumchi lothekü leaniu.

³⁸Chongkhao tsaküh apa lungken leantsünli APAOU nou apa khaiuniaso leaniu. Alekkat ehli naiuso APAOU athsüoting amongmat nou goumchi akeng tsak hau iula-i-iu.