Read Khiamniungan Naga Yeremia 26 Bible Online

Yeremia 26 - Khiamniungan Naga bible

Yeremia 26

¹Yihuda hai nokpao Josia thso Jehoiakim nokpao au tsalou- küta,

²APAOU nou ngo tü ngiom, “Amkham Tsam keng nai lütsa, küta Yihuda noksong nouso ainou nungko amkhamau shitsün khaiuniahoi chikü tü ngo ni tü thoiluttsün chikü lüpunglut. Ngio tsaktso lakiaptaiu.

³Tsüngean, khaiuniahoi nou angio angkü ngüso tsümeikün yam ainou phokle-esao. Ngüso phokle naito, ngü ngüso chhi tsümeikün thaiutha ngüso khako alothe kankü shiau noitsün jü mongyang li-eshi-e.”

⁴APAOU nou nungti ngioji ta ni ngüso tü lüngio, “Ngü asam hau kiutaiu nou atsandetsün tü hoiluttsün

⁵naiuso ngü asam dongai hongdekü noitsün jü ayathsüotsün e-pohoi nouso ngio tü mongkiutsün tsangkü asamüh ngo tü angio ang-au noin. Tiautenai ngüsoüh ngiotsün tü asamüh tilaitso angio tsü-ang.

⁶Asamüh ngio ang-au tsülaokü nane tünaito, ngü Shiloh tü ti chhin, nung Amkham Tsam tü lüko chhi-e, naiuso nung goumchi mele apem nou nung noknio nian athesan tsakli kankei-e.”

⁷Mesonhoi, E-pohoi, naiuso khaiunia apemüh ngü ngiotsün nung Amkham Tsam nai lulanai,

⁸naiuso APAOU nou ngo tü achiteau thoiluttsün chikü ngü chitekhemkü thunkü, ngüsoüh ngo thalouküta wekü ngiom, “Nung thaiuthako ni loatkü wane!

⁹Nung Amkham Tsam Shiloh khekkü naiuso nung noknio lothekü nungko sau tsükih-e ta ni tiauta APAOU nianko ngiom?” Nungai khaiuniahoi nouso ngo lemkü kamshin.

¹⁰Tilai Yihuda hai aheihoi nousoüh athawaotsün lula, ngüso nokpao tsam ainou Amkham Tsamai liukü khuküta Bekhan Ayan nai naptsün ko moknoi.

¹¹Nungai meson naiuso e-po nousoüh khaiuniahoi naiuso aheihoi nouso tü ngiom, “Nung khaiunia eau maikü noin tiautenai asam noukhanüh lüko lukü sam noknio thako chite-iu.”

¹²Nungai apaüh ngiom, “APAOU nou ngü nung Amkham Tsam naiuso nung noknio thako alum pungpengau hong ta asamüh lula-iu.

¹³Asam lo kihtsün naiuso chhisiyatsün ayam nou li-eshi au noin, naiuso asam Goa APAOU tü angio ang-au noin. Asamüh nung chhi naito, asam khako alothe kankü shi-e ta apaüh ngiotsün ainou apa mongyang li-eshi-e.

¹⁴Jü thaiuthato, ngü asam oukong nai noin! Asam tü mei-in naiuso thakü noin ta yangtsün ngo hau achite.

¹⁵Lüko nung ngetaiukü lüthe, asamüh ngo loatnai, asam si nung noknio nai kihtsün khaiuniahoi nouso aphio noi-e, tiautenai asam tü alotsüo kiuau hongtsün nung APAOU nou noin.”

¹⁶Nungai aheihoi naiuso khaiu- niahoi nousoüh meson naiuso e-po nouso tü ngiom, “Nung khaiunia nou APAOU asam Goa nianko samko chite; nungtiphe apa loatkü tsüwane.”

¹⁷Nung phiko ashe nouso ajantso tsaküta kamshikü noitsün khaiu- niahoi nouso tü ngiom,

¹⁸“Hezekia, Yihuda nai nokpao noi taoko Moreshet hai nou e-po Mikaüh Akongteng APAOU nou ngiotaiu nou khaiunia chikü tü nungti ngiokü noiküla: ‘Zion nung eiu tsak khekkü ah-e, Yirusalem nung tsümeikü alothe tsak iula-e, naiuso Amkham Tsam noitsün king nung liutsa tsak hau iula-e.’

¹⁹Nokpao Hezekia naiuso Yihuda- haiüh Mika loatkü tsüwan. Nungliko Hezekiaüh APAOU lomsan küta apa atsüojinyang shiolouau kowe. Naiuso APAOU nou ngüso khako akuothe kankü shiau noitsün ainou apa mong li-eshi. Lüko samühto athsüoting akuothe tsak sam chija kanjikan- louau noin.”

²⁰(Loüh Yerimiaüh ngiotsün khekkülu APAOU nianko nung noknio naiuso goumchi thako chitetsün Kiriat Jearim ainou Shemaia thso Uria tsak noiküla.

²¹Tilai nokpao Jehoiakim naiuso apa süpaihoi naiuso asonghoi nousoüh Uriaüh ngiotsün lula, nokpao nou apa loatau kowekü noiküla. Lüko Uriaüh nung lulanai, apa lekkatkü khulükhun küta Ijip nai haiulou.

²²Nokpao Jehoiakimüh Ijip nai Uria thalouau Akbor thso nou Elnathan naiuso ajantso hong.

²³Ngüsoüh nokpao Jehoiakim dongai apa nialoukü shiküta apa loat naiuso apa mea nyong etam nai yakthiokü wan.)

²⁴Lüko ngo tü Shafan thso Ahikamüh jungkü noiphe, ngü khaiuniahoi hau kiukü apa tsüloat.