Read Khiamniungan Naga Yeremia 27 Bible Online

Yeremia 27 - Khiamniungan Naga bible

Yeremia 27

¹Zedekia thso Josia, Yihuda hai nokpao au tsaloukü thunkü, APAOU nou ngo tü,

²nyikhun naiuso pai nou khe tsak shanküta nung asangai lülakthio ta ngiom.

³Nungai APAOU nou ngo tü Yirusalem ainou nokpao Zedekia ko pheteau shitsün Edom hai, Moab hai, Ammon hai, Tair hai, naiuso Sidon hai nokpao nouso dongai ngiongem kantsünso tsangkü ngiongem hongau ngiom.

⁴APAOU, Akongteng, Israel hai Goa nou apaüh ngiotsün ngüso nokpaoso hau lüchite ta ngotü thoilutkü noiküla.

⁵“Jü oukong naiuso akong asong nou ngü goumchi nou, khaiuniale nou, goh chiai keitsün thainian nouso chikü saisan naiuso nung ngü chosantsün sauhai lünou ngü kiuji.

⁶Ngo yathsüotsün Babilon hai nokpao Nebukadnezar oukong nai nung mele nouso chikü taiutsün ngo noin, naiuso ngü apa liuthainian nouso hau lüko yathsüo-i.

⁷Apa nokshing loianau atao mosaokün lektso, mele chikü nou apa, apa thso naiuso apa thsao yathsüo-e. Nungphiai apa meleüh amao oukongteng mele naiuso nokpao asong nouso yathsüoshi-e.

⁸“Lüko mele tsüdekünai nokshing ajantsoüh Nebukadnezar nokshing ko tsühalutkünaito, ngü nung mele Nebukadnezar hau moisemkü molomowanikün lektso ehli, naiusile, naiuso akiasiya tsangkü angja kiu-e.

⁹Meamean tsangkü tsüdekünai eanhai onthso jonshitsün tsangkü, tsüdekünai alonga chhisiya tsangkü, ajantsoüh ashiau noitsün atao thaiutha khapiam ngiotaiuau shioji ta ngioji, tsüdekünai asam e-po nouso tü angio la-ang. Ngüso apemüh asam tü Babilon hai nokpao lüyathsüo ta ngioji.

¹⁰Ngüsoüh asam kausaiat- küta asam, asam goumchi ainou laiukü ai kankü khuwanau shanji. Ngü asam komane, naiuso asam mowane.

¹¹Lüko mele ajantso Babilon hai nokpao ko hakü apa yathsüo naito, ngü ngüso meshen goh ko noi-i-e; nungko eiu-a-ikü kih-i-e ta Ngo APAOU nou ngiowaniu.”

¹²Yihudahai nokpao Zedekia tü ngü nunglu ngiom, “Babilonhai nokpao ko lühaluttan. Apa si apa khaiuniaso lüyathsüo naiuso asam aa kih-e.

¹³Ni naiuso akhaiuniaso ehli nai tsüdekünai naiusile nai, tsüdekünai akiasiya nai tiauta ean-e? Babilon hai nokpaoko tsühaluttankünaito, sübao mele tülünou nung thawao-e ta APAOU nou ngiotsün nung noin.

¹⁴Nokpao oukong nai lanappan ta ngiotsün e-po nouso ngio tü la-ang. Ngüsoüh asam kausaiatji.

¹⁵Apaüh ngüso tsühong naiuso ngüsoüh apa nianko asam tü yaang ngio chiteji ta APAOU nou ngiom. Nungti apaüh asam komankü, asam naiuso asam hau nung yaang ngio chitetsün e-po nouso loat-e.”

¹⁶Nungai ngü mesonhoi nouso naiuso khaiuniahoi nouso hau APAOU nou ngiotsün chite-en. “Amkham Tsam jengtsaiu nou Babilon ainou shakta kanjikan shi-e ta ngiotsün e-po nouso tü la-ang. Ngüsoüh asam hau yaang chiteji.

¹⁷Ngüso tü la-anglu! Babilonhai nokpao ko lühaluttan, nungaih asam kih-e! Nung noknio tiauta alothe nai wanane?

¹⁸Ngüso atsüoteng e-pohoi naito, naiuso ngüsoüh jü ngio angjitünaito, Amkham Tsam ai poitaiutsün jengtsaiu naiuso nokpao tsam ainou Babilon ai kankü tsükhuwanau APAOU Akongteng ngotü asang-i.”

¹⁹(Tilai nokpao Nebukadnezarüh Yihudahai nokpao Jehoiakim thso nou Jehoiachin, naiuso Yihudahai si Yirusalemhai ashehoi Babilon nai thaloukü khuwan, apaüh khiam nouso, taoson khiamdan, jangtso nou kankeitsün tsamkei nouso, naiuso amkham tsam jengtsaiu amao nouso poian.)

²¹“Ngo, APAOU Akongteng, Israelhai Goa nou, Amkham Tsam nai poitaiutsün jengtsaiu naiuso Yirusalem nai nokpao tsamko poitaiutsün jengtsaiu thaiutha ti ngioji anglu:

²²Nungso Babilon nai kankü khuwane naiuso jü mong ngüso dongai mophoklekün lektso nungko noi-e. Nungphiai ngü ngüso laokü kanjikane, naiuso ngüso nung athang nai taiushi-e, ta Ngo APAOU nou ngiowaniu.”