Read Khiamniungan Naga Yeremia 28 Bible Online

Yeremia 28 - Khiamniungan Naga bible

Yeremia 28

¹Nung ponkolu Yihudahai nokpao Zedekia nokshing atsalou nai pon püle alei pungo nouko Gibeon noksong ainou e-po tsak Azzur thso Hananiaüh Amkham Tsam nai ngüko chitekü ngiom. Mesonhoi naiuso khaiuniahoi nouso khako,

²Akongteng APAOU, Israel hai Goa nou ngotü ngiom, “Ngü Babi- lonhai nokpao oukong lopai-aniu.

³Nokpao Nebukadnezarüh Babilon nai kankü khuwantsün amkham tsam jengtsaiu apem ngü pon nime mongko nung athang nai kankü shi-e.

⁴Babilon nai thaloukü khuwantsün Yihudahai chiküko hakü Jehoiakim thso Jehoiachin, sau Yihudahai nokpao noin, ngü apa nialoukü shishi-e. Ah, ngü Babilonhai nokpao oukong lopai-e ta Ngo, APAOU, nou ngiowaniu.”

⁵Nungai mesonhoi naiuso Amkham Tsam nai tsakü noitsün khaiuniahoi chikü khako ngo e-po Hanania tü ngiom:

⁶“Amen! APAOU nou nung chhi-e ta ngü yangji! Amkham Tsam jengtsaiu naiuso khaiunia sauhai akhothiotsünli thaloukü khuwan nungso chikü Babilon ainou laokü niajikan shiau ni nou khapiam ngio atsüo thawao-i-e ta ngü yangji.

⁷Lüko ngü ni naiuso khaiuniahoi nouso tü ti ngioji anglu:

⁸Jü khako si asam khako e-pohoi sauhaiüh atao laiukü nai nung thaiutha chite, ngüsoüh nung ehli, naiusile, naiuso akiasiya nou mele piakü dongai naiuso nokshing akongteng nouso dongai shi-e ta ngiowankü noiküla.

⁹Lüko e-po tsak sauüh nokmei ngiotaiuji nungh e-po nouto apaüh ngiokiutsün thawao nailu apa APAOU nou atsüojin hong ta ngeloji.”

¹⁰Nungaih e-po Hananiaüh jüsang ainou khe ngiosan küta nung nelangkü lone,

¹¹küta khaiunia chikü khako ngiom, “Nokpao Nebukadnezarüh khe loluttsün mele nouso chikü lopai-e, naiuso apaüh nung pon nime mongko chhi-e.” Nungai ngo tsaloukü khu.

¹²E-po Hananiaüh e-po Yerimia sang nai lakthio taiu nou pai khe lotheankütün phiko APAOU nou Yerimia tü ngiom,

¹³Khukü Hanania tü lüngio, APAOU nou nungti ngioji; “Ni pai khe nou lotheaniu, lüko nung liko ngü son khe shanshi-e.

¹⁴Akongteng APAOU Israel hai Goaüh ngiom, nungso mele chikü nou Babilonhai Nokpao Nebukadnezar yathsüoau ngü ngüso sang nai son khe tsak lakthiokiu-iu. Liu thainian nouso saukü hau ngü Nebukadnezar yathsüo-i-e ta APAOU nou ngiom.”

¹⁵Nungai e-po Yerimiaüh e-po Hanania tü ngiom, “Anglu, Hanania! APAOU nou ni tsühong, naiuso ni nung khaiunia nouso hau yaang nai monglamiji.

¹⁶Nungtiphe APAOU nou nungti ngioji, Athaplu, ngü ni goumchi ainou lowane. Nung ponkolu ni eane, tiautenai ni khaiuniahoi nouso tü APAOU thako khengshiau chiten.”

¹⁷Nungtiphe e-po Hanania nung ponkolu alei chinyat nouko nai ean.