Read Khiamniungan Naga Yeremia 29 Bible Online

Yeremia 29 - Khiamniungan Naga bible

Yeremia 29

¹Nebukadnezarüh Yirusalem ainou aheihoi, e-pohoi, mesonhoi, nouso Babilon akhothio nai kankü khuwantsün khaiunia nouso dongai ngü sattsün thsamsat:

²Nokpao Jehoiachin, apa nyiu, nokpao tsam nai asong nouso, Yihudahai naiuso Yirusalem hai aheihoi nouso, jengtsaiu shansan- tsünso, naiuso chhisiya nai ange amounhoi nouso, akhothio nai hau thaloukü khuwan phiai ngü nung sat.

³Ngü nung thsamsat nou Yihudahai nokpao Zedekiaüh Babilonhai Nokpao Nebukadnezar dongai hongtsün Shaphan thso Elasa si Hilkia thso nou Gamalia ne hau kiu. Nungko nungti satkü noiküla:

⁴“Yirusalem ainou Babilon nai akhothiotsünhoili, Nebukadnezar hau thaloukü khuwan-itsün khaiuniahoi tü APAOU Akongteng, Israel hai Goa nou ngioji:

⁵‘Tsam nouso lahlouküta nungko lükih. Ai nou lü ailou küta nungko sungtsün lühe.

⁶Asamüh tsam- sigoh lüyang naiuso chetsinyimkü lükhu. Naiuso asam thsoso hau tsamsigoh lüyang-i, nungti ngüsoüh methso hai chetsinyime. Asam haowe nai thsaokü tsüshikü singkü khuau noin.

⁷Ngü asam akhothiotsünli khothio-itsün noknio nouso thaiutha amei lüchhi. Naiuso nung noknio nouso thaiutha ngotü misao asao, tiautenai ngüso tsüomeikü naito, asam lüko tsüomeikü noi-e.

⁸Amaohai sauhaiüh ashiau thaiu- tha ngiokiuau shioji, tsüdekünai e-pohoi sauhai asam ongko kihakü noin, ngüso hau asam lasapthio-i ta Ngo, APAOU, Israel hai Goa nou lotsüoji. Ngüso meamean ta la-anglu.

⁹Ngüsoüh asam hau yaang ngio chiteji. Ngü ngüso tsühong ta ngo, APAOU Akongteng nou ngiowaniu.’

¹⁰“APAOU nou ngioji, ‘Tilai Babilon thaiutha pon aochinyat nou ngoi-e, ngü asam thaiutha yangkiutsün hane, naiuso jü athalou-e thawao-ikü asam müjam nialoukü shishi-e.

¹¹Asam hau akuothe tsüdekü atsüomei kankü shiau, asam thaiutha thattaiutsün ngülu ngeji.

¹²Nungaih asamüh ngo tü jone, naiuso shikü ngo tü misao-e, naiuso ngü asam tü thala-e.

¹³Asamüh ngü yame, naiuso ngo eppe, tiautenai asam mong chikü nou asamüh ngo yam.

¹⁴Asamüh ngo eppe ta ngü ngioji, naiuso asam goumchi ai ngo asam akuo kiushi-e. Naiuso ngü asam shingkhannio chikü naiuso asam khupengikü noitsün athang apem ainou niakame, naiuso ti goumchi ainou ngü asam hongpengan, nungso nung goumchi nai laokü niajikan shi-e, ta Ngo, APAOU nou ngiowaniu.’

¹⁵“Babilon nai APAOU nou asam hau e-po nou kiu ta asamüh ngioji.

¹⁶Nokpao sauüh David nokshing shingji, naiuso nung noknio nai noitsün khaiunia sauhai asamko hakü akhothio nai thaloukü tsükhuha, nungso asam tsam- mongso thaiutha APAOU nou ti ngioji, anglu.

¹⁷Akongteng APAOU nou ngioji, ‘Ngü ngüso khako ehli, naiusile, imkia, kankü shiji, naiuso ngü ngüso eheau tsümeikü semankü noitsün latshep khekkü shan-e.

¹⁸Ngü, ngüso tü ehli nou, naiusile nou, naiuso imkia nou kome, naiuso goumchi mele chikü nou nung epnai lekkate. Ngü ngüso kompengtsün athang pungkü nai ngüso tü thawaotsünko hattatkü lekkatte. Khaiuniahoi nou ngüso nian athesan tsakli kankei-e.

¹⁹Ngüsotü nung thawaoau noin, tiautenai ngo yathsüotsün e-po nouso tsangkü ngü ngüso dongai jü ngiongem hongdekü noitsün tü ngüsoüh angio tsü-ang. Ngüsoüh anglu au tsümongchio.

²⁰Ngü asam sauhai Babilon akhothio nai hongan, asamüh Ngo, APAOU nou ngiotsün tü anglu.’

²¹“Kolaia thso Ahab naiuso Maaseia thso Zedekia, sauhaiüh apa nianko yaang ngio chiteji, ngüso thaiutha Akongteng APAOU Israel hai Goa nou ngiom. Apaüh ngüne Babilon hai Nokpao Nebu- kadnezar oukong nai lethiowane, küta ngüne asam nioveiüh epkü loatkü wane.

²²Tilai Yirusalem ainou Babilon ai akhothiotsün ajantso thako athesan kiuau aiu-e, ngüsoüh nungti ngiokü noiküla: ‘Zedekia naiuso Ahab sauhai Babilonhai nokpao nou chaoat nung khekkü APAOU nou asam tü lüchhi!’

²³Ngüso akuo nung noi-e, tiautenai ngüsoüh athsüoteng angei suniu ngüsoüh tsütsamtsütsüo chhi-iu, naiuso APAOU nianko yaang ngio chite-iu. Nung APAOU mongchio thako noiküla, ngüsoüh chhitaiu nou apaüh ngeji, naiuso ngüso thako apa mitha noin, ta APAOU nou ngiowaniu.”

²⁴Nehelam hai nou Shemaia, sauüh meshen nianko Yirusalem nai noitsün khaiuniahoi chikü naiuso Maaseia thso Zefania, naiuso amao meson nouso chikü dongai thsamsat tsak hong; apa thaiutha Akongteng APAOU Israel hai Goa nou ngo hau ngiongem tsak kiu. Nung thsamsat nouko Shemaiaüh Zefania dongai nungti satkü noiküla:

²⁶“Jehoiada thangko APAOU nou ni meson tsak shankiu, naiuso loto ni Amkham Tsam nai atengteng tsak noin. Khaiunia pungkü sauhaiüh e-pohaiühli kausaikü ngioji, nung a-aiu ongko akhotsamai sonkhiang nou kekü naiuso apa sangnai son sangkom nou lakthiokü wanau nung achhi noin.

²⁷Ni nung Anathot hai nou Yerimia, sauüh khaiuniahoi nou tü e-po tsakli chiteji, apa tü tiauta tsüchhi?

²⁸Apa lolaokü wanau noin tiautenai apaüh atao laiukü naita khaiuniahoi nouso Babilon nai akhothiotsünli noi-e, naiuso ngüsoüh akihtsam laloukü, nungko kihloukü, ai nou aihekü, ngüsoüh a-santsünko nou he-e.”

²⁹Zefaniaüh nung thsamsat ngü hau wedenai,

³⁰APAOU nou ngotü,

³¹nung ngiongem Shemaia thaiutha Babilon nai akhothiotsünso chikü dongai hongau ngiom: “Ngo APAOU nou Shemaia naiuso apa thsaosithsoso hau angja kiu-e. Ngo apa tsühong, lüko apaüh asam tü e-po tsak khekkü chiteji, küta apaüh asam hau yaang nai monglamiji. Asam mongko apa thsaosithsoso tsünoi-e. Ngü jü khaiuniaso thaiutha amei chhiau epkü apa aa tsükih-e, tiautenai apaüh ngüso tü jü thako khengshiau ngiom, ta Ngo, APAOU, nou ngiowaniu.”