Read Khiamniungan Naga Yeremia 3 Bible Online

Yeremia 3 - Khiamniungan Naga bible

Yeremia 3

¹APAOU nou ngioji, “Khaiunia tsaküh meshen tsammongnyiu koman kü, nung nyiuhai nou apa le-anküta loüh apa amaohai tsam- mongnyiu tsak hau iulashi naito, apaüh nung menyiu laokü loshiau tsüshio. Nungüh goumchi nou thumkü lochinyanji. Lüko Israel, ni tsüojintsün piakü noin, naiuso ni lo jü dongai laokü shishiau aiuji!

²Kingson nouso ai thapsankü alu. Nungko ni ajisiwop haiüh chhitsün khekkü tsüchhikün athang tsoko noin süne? Arab haiüh singtso goh nai ashio tsüepkü mowantsünso tü taiutsünli ni yamkuk nouso ai atsüojine hai nouso tü taiukü noiküla. Ni ajisiwop chhitsün nou goumchi nou lochinyankü noin.

³Nungshioko ah-nou tsü-uo, naiuso chihsam khiamsam thaiutha ah-nou tsü-uo. Ni ajisiwop chhitsün tsak khekkü lüko epji; ni amiam tsüyang.

⁴“Naiuso ni lo ngotü ngioji, ‘Ni jüpo noin, naiuso ngo methso tao ainou ni ngü tsüojiniu.

⁵Ni ngoko asaita to tsümongmate, ni asaita ngoko nungtilu to tsünnoi-e.’ Israel, nung ngiotsün ni noiküla, lüko ashiotsün lektso ni tsümeikü chhi-iu.”

⁶Tilai Josia nokpao noiküla, APAOU nou ngo tü ngiom, “Mong tsükiukün menyiu Israelüh ti chhin nung ni epmo? Apa ngo ainou phoklekü khuwan, küta king atsok si paikhem pungkü apaüh ajisiwop chhitsün nyiuhai tsak khekkü chhin.

⁷Apaüh nungti chhisiyakütün phiai lüko, apa jü dongai laokü shi-e ta ngü yang. Lüko apa jü dongai laokü tsüshi; naiuso mongtsükiukün apa nuo Yihudaüh nung chikü epkü noiküla.

⁸Ngü Israel komankü hongantsün Yihudaüh lüko epkü noiküla, tiautenai apa ngo ainou phoklekü khuwan naiuso ajisiwop chhitsün tsak iulakü noiküla. Lüko Israel ün nuo mongtsükiukün Yihuda to tsühat. Apa lüko ajisiwop chhitsün tsak iula,

⁹naiuso amiamsimo titso tsünoi. Apaüh gohthang nou lochinyan, naiuso paisilung nouso amkhamtsün tsangkü tsütsamtsü- tsüo chhin.

¹⁰Naiuso nungso apem phiai Israel ün mongtsükiukün nuo Yihudaüh lu jü dongai laokü shiji ta hande, lüko apa mongsaitha tsüde, ta Ngo APAOU nou ngiowaniu.”

¹¹Nungaih APAOU nou ngo hau chitekü ngiom, Israel nung apa ainou phoklekü khuwan lüko, mong- tsükiukün Yihuda tübao apa meitso kü mitha epsan.

¹²Apaüh ngo tü khukü Israel tü, “Mongtsükiukün Israel, jü dongai laokü ashi ta ngioau ngiom. Ngo atsüojinyang noin, naiuso tsümongmatshi-e, ngü nitü asaita to tsümongmatshi-e.

¹³Ni aphio naiuso a-Goa, APAOU thakolu ni khengshikü noiküla ta lüngiowan. Paikhemsoh pungkü ni gohmao goa nouso hau ni nou atsüojin kiuwan, naiuso ni jü athoilut nouso angio tsü-angkü noiküla, ta Ngo APAOU nou ngiowaniu.

¹⁴“Mongtsükiukün khaiuniahoi, laokü ashi, asam jükotha nou noin. Ngü asam noksong pungkü ainou tsak tsak naiuso kau pungkü ainou nimeme nialou-e, naiuso ngü asam Zion king ai laokü nialoukü shi-e.

¹⁵Ngü asam hau jüngio angtsün nokpao nouso kiu-e, naiuso ngüsoüh asam khako mongthat mongsai naiuso angelatsün tsangkü nok- shinge.

¹⁶Nungaih tilai asam nungh goumchi nai aweau tsüshiokü iula-e, khaiuniahoi nousoüh loto jü Athalou-e Ngiokhem Paidan thaiutha tsüchiteshi-e. Ngüsoüh loto nung thaiutha tsüyange naiuso tsüyangsanshi-e, tsüdekünai ngü- soüh amao tsak lüko tsüshan shi-e.

¹⁷Tilai nung atao shi-e, Yirusalem tü, ‘APAOU ün Nokpao Noikham,’ ta jone, naiuso ngo amkhamao mele chikü nungko kamshi-e. Ngüso mongkong naiuso tsümeikün mongpem nou ngüso tü ti ngioji, loto ngüsoüh nung tsüchhi shi-e.

¹⁸Israel nung Yihuda ko ha-e, naiuso aikü napkü ajenapki goumchi ainou thaloukü khuwantsün ainou ngüso shi-e naiuso ngo ngüso paosiposo hau asaita tengkamau kiutsün goumchi nai kamshi-i-e.”

¹⁹APAOU nou ngioji, “Israel, ngü nihau goumchi chikü nou thatü alengmei goumchi, amongchiotsün goumchi tsak kiuküta ni jüthsoli loau mongchiokü noiküla. Ngü asam hau Ngo tü jüpo ta jon-ikü, naiuso ngo ainou tilaitso phoklekü tsükhushiau mongchiokü noiküla.

²⁰Lüko mongtsükiukün tsammongnyiu tsakli, ni Ngoko mongtsükiukü noi-an ta Ngo, APAOU nou nung ngiowaniu.”

²¹Kingson nouso chiai sangh tsak lulaji; nung Israel khaiuniahoi nouso shaptsün naiuso kojatsün noin; tiautenai ngüso angei kikih nai noikü shin naiuso APAOU ngüso Goa ngüsoüh be-an.

²²APAOU ainou phoklekü khuwantsün asam laokü ashi; apaüh asam lomeikiu-e naiuso mongkiukü shane. Asamüh ngioji, “Ah, sam APAOU dongai shiji, tiautenai apa sam Goa noin.

²³Kingson nouso ai samüh sotsom nouso amkhamtsün ko samüh titso ahachu tsü-ep. Israel thaiutha ahachu sam Goa APAOU ainoulu shiji.

²⁴Baal amiam goa amkham nou sam onnemok naiuso jangtso, melothso naiuso menyiuthsohoi, tsüthatsamkü noitsünli iula-i, petaonai yakü sam paosiposoüh nung apem chhisiyakü shi-aniu.

²⁵Sam amiam nai loikü noiko, naiuso nung miamsimo nou sam khopokkü anoi-i. Sam naiuso sam paosiposoüh sam Goa APAOU thako asaita angei sunlou; samüh apa athoilut nouso tilaitso angio tsü-ang.”