Read Khiamniungan Naga Yeremia 30 Bible Online

Yeremia 30 - Khiamniungan Naga bible

Yeremia 30

¹APAOU Israel hai Goa nou ngo tü ngiom,

²“Ngü nitü ngiotsün alum thsam tsak ko lüsattaiu,

³tiautenai jü khaiuniaso, Israel naiuso Yihuda akuo laokiushiau atao nou shiji. Ngü ngüso paosiposo hau kiutaiutsün goumchi nai ngüso müjam nialokü shi-e, naiuso ngüsoüh loüh nung tengkam loshi-e, ta Ngo, APAOU nou ngiowaniu.”

⁴APAOU nou Israelhai si Yihudahai tü ngioji:

⁵“Ngo aalou ngem tsüdekü ahat naiuso alekkat sang tsak lula-iu.

⁶Lo, laokü lüyanglu! Pohai tsaküh methso chetau shio-e süne? Nungaito tiau menyiu tsaküh methso noiloutsün khekkü pohai pungkü nou apa pha, apa thai ai pipkü ngü epji? Tiauta khasinio pungkü phattsaikü noin?

⁷Tsümeitengkün ajekhaiu tsak shiji, nungko amao ajekhaiu tsak shiji, nungto amao ajekhaiu tiko welu-eau tsüshio-e, jü khaiuniaso thaiutha athsüoting mongkia tao tsak, lüko nungko nou ngüso kipsane.”

⁸Akongteng APAOU nou ngioji, “Tilai nung ajekhaiu shi-e, ngüso sang lemkü pikü noitsün khe lopekke naiuso sonkhiang auo nou lowane, loto ngüso gohmaohai sua tsütheshi-e.

⁹Nungliko ngüsoüh Ngo, APAOU ngüso Goa yathsüo-e, naiuso ngü David ainou nokpao tsak sungi-e.

¹⁰“Jü khaiuniaso, hatkü lanoi, Israelhai, lekkü hattatkü lanoi. Asam noitsün akhothio goumchi ainou laiukü jettekü noitsün goumchi nai ngü asam kipsane. Asam laokü shishi-e küta aalo nai mongtsamkü kih-e, naiuso loto asam sauüh tsülohatshi-e.

¹¹Ngo asam dongai shikü asam kipsane, asam pengpunkü noitsün mele chikü ngü lomo-e, lüko asam to tsülomo-e. Ngü asam tü tsüthutküto tsüle-e; lüko ngü tilai asam tü thutte, ngü ngiotsüo nai thutte, ta Ngo APAOU nou ngiowaniu.”

¹²APAOU nou apa khaiuniaso tü ngioji, “Asam mou nouso tsayan tsüshitsün mou noin, asam atawaihetsün ameishiau tsüshiokün noin.

¹³Asam tü paotsangau sau tsünoi, asam chaikia mou ameila au tsüshiokün mou noin.

¹⁴Apemüh ni tsüojintsün be-aniu; loto ngüsoüh ni tsüthaisanshi. Ngo nitü eh tsak khekkü kom, nihau angja kiutsün thatü thsüo, tiautenai ni nou angei thatü thsüokü sungkü noin.

¹⁵Ni tawaihetsün thaiutha laweshi; athaiutha ameilatsün tsünoi. Ni angei thatü piakü naiuso chhi tsümeikün thatü asongphe, ngü ni hau nung angja kium.

¹⁶Lüko loto ni heantsün chikü miolikü wane, naiuso a-ehso chikü thaloukü khuwane. Ni tü thangmangtsün chikü thangmangkü wane, naiuso ni aploutsün chikü aploukü wane.

¹⁷‘A-ehsoüh awesan tsünoikün Zion noin; apa paotsangau sau tsünoi’ ta ngio lüko, Loüh ngü ni lomeishi-e naiuso ni nou mou nouso lomei-e ta Ngo, APAOU nou ngiowaniu.”

¹⁸APAOU nou ngioji, “Ngü jü khaiuniaso hau ngüso goumchi akuo kiushi-e naiuso tsamkhaiu pungkü hau atsüojinyang hane, Yirusalem müjam shanshiküta nokpao tsam akuo kankü shi-e.

¹⁹Nungko kihtsün khaiuniahoi nousoüh alomsan jih hange; ngüsoüh amongling nou we-e. Jü ouk nou ngüso haowe nai singkü khu-e; jü ouk nou ngüso hau asuhat kankü shi-e.

²⁰Ngü akeng oukong nou kiushi-e küta nung mongkü shanshi-e; Ngü ngüso thangmangtsün apem hau angja kiu-e.

²¹Ngüso nokpao ngüso ong ainou shi-e, ngüso nokpao nokshing ngüso ong ainou sunge. Ngo apa shimkü shi-i-e, naiuso apa jü dongai shi-e; tititenai sau tsüjonkünai shisome? Ngüso jü khaiunia noi-e, naiuso Ngo ngüso Goa the-e ta Ngo, APAOU nou ngiowaniu.”

²³APAOU mongmattsün nung ah-ou-ahsheih tsak noin, nung ahthe tsümeikünso khaiusuo ai pailutte. APAOU mongmat athsüoting nouto apaüh chhiau yangtaiutsün mo- chhiankün lektso tsüthone. Ashiau noitsün atao nai apa khaiuniasoüh nung tsangsheikü ngela-e.