Read Khiamniungan Naga Yeremia 31 Bible Online

Yeremia 31 - Khiamniungan Naga bible

Yeremia 31

¹APAOU nou ngioji, “Ngo Israel kau chikü thaiutha Goa, naiuso ngüso chikü jü khaiunia theau atao nou shiji.

²E ainou thakhutsün nung khaiunia nouso hau ngü liutsa nai atsüojinyang hankü noiküla. Tilai Israelhai aalou thaiutha mongchet,

³laiukü ainou ngo ngüso dongai sung. Israelhai, ngü ni asaita tsüojinkü shin, nungtiphe ngü ni tü tsüphioshikün atsüojin nou han.

⁴Loühjam ngü ni shanshi-e. Loühjam ni nou apat- ngemtsün sondan loküta thsüokü koikü hamkü jih hange.

⁵Loühjam Samariahai king nouso ai ni sainaoshep piu nou piu-e, naiuso nung piutsünsoüh nungko eiusantsün he-e.

⁶Ehü nousoüh Efraim king nouso ainou, ‘APAOU sam Goa dongai Zion nai sam sungko;’” ta wekü jonau atao nou shiji.

⁷APAOU nou ngioji, “Mele nouso ongko asongteng, Israel thaiutha koikü jih lühang. Asamüh alomsan jih nouso lühang, ‘APAOU nou apa khaiuniaso kipsan, apaüh meshen khaiunia apoi nouso chikü kipsaniu.’

⁸Ngü ngüso ajenapki ainou niaküshi-e naiuso goumchi athon saokü ainou niakame. Ngüsoko niopek naiuso chionehoi naiuso pem tsükengkü noitsün menyiuhoi, loteng methso chetau noitsünso hakü ngüso mele asong tsak laokü shi-e.

⁹Jü khaiuniaso shapkü laojikane, ngü ngüso misaokü laokü nialoushi-e. Ngo ngüso haiuthsongan nai nialut-e, naiuso ngüso tsükhia-anau yam mei nai nia-e. Tiautenai ngo Israel thaiutha Po tsak noin, naiuso Efraim jüthso melo thsoyamchong nou noin.”

¹⁰APAOU nou ngioji, “Mele nousoüh ngo tü angji, naiuso haiusai goumchi laiukü nai jüngio pungpengji.

¹¹Ngü Israel khaiuniahoi sokshi naiuso ngüso akongteng mele tsak ainou kipsan.

¹²Akoi nou ngüso shikü Zion king nai jih hang-e, naiuso jü paopei nouso: Khülam, theng, naiuso olip khiam, onnemok naiuso jang nouso thaiutha monglenge. Ngüso to khiam saiukü tsaluttsün aimong tsak khekkü noi-e; ngüsoüh pohtsün alum ngüsoüh taiu-e.

¹³Nungai methso nouso jih hangkü monglinge-e, naiuso petche si pühehoi monglinge au yalou-e. Ngüso mongsaiutsün akoi au, naiuso ngüso monghentsün amonglingau, phoklekiukü ngü ngüso aalou-i-e.

¹⁴Ngo memei chihsikhiam nou mesonhoi nouso meankiu-e, naiuso jü khaiuniasoüh pohtsün apem mongtsami-e, ta Ngo, APAOU nou ngiowaniu.”

¹⁵APAOU nou ngioji, “Ramah nai sangngem tsak luhji, nung thsüokü shaptsün sangngem noin. Rachel meshen thsoso thaiutha shapji, apa aalou au tsümongchio tiautenai ngüso tsünoishi.

¹⁶Ni shaptsün alaolou, naiuso aniochekhiam lübei-an. Ni athsoso thaiutha chhitsün chikü amai tsüyangkü tsüwane; ehoi goumchi ainou ngüso laokü shishi-e.

¹⁷Athaiutha ashiau nouko ayang noin, tiautenai athsoso laokü yashi-e ta Ngo, APAOU nou ngiowaniu.

¹⁸“Monget nai Israel haiüh nungti ngiotsün ngü lulaji, ‘APAOU to tsüthameloukün thainian tsak khekkü noiküla, lüko ni sam tü angio angau tsande. Sam laokü aniajikanshi, APAOU sam Goa, sam dongai laoshiau khemloukü noin.

¹⁹Sam ni ainou phoklekü khuwan, lüko samüh shakta laoshiau aiuji. Ni sam angjakiu phiai, amongsaiu nai sam khaiu kaukü nappan, sam miamsimokü noiküla, tiautenai sam oum taoko samüh angei sunhe.’

²⁰“Israel, ni ngü tsüojintsün melothso, ngü aphup tsüojintsün thso. Ngü titsojam anian kankei-e, ngü ni atsüojin nou hakü yangkiuji. Jü mongpem adongai noin; Ngü atsüojinyang noi-e.

²¹Yam nou tü ii naiuso athang pokü lüshantaiu, ni khelükhuntsün yam müjam lü-epsanshi. Israel khaiuniaso, laokü ashi, ni leantsün noksong nouso dongai laokü ashi.

²²Ni tilektso henyi-e amonglam tsünoikün khaiuniahoi? Menyiu tsaküh melo tsak kiploutsünli, aya nouko tsükhekkü tso ayan tsak saisaniu.”

²³Akongteng APAOU Israel hai Goa nou ngioji, “Tilai ngü Israel hai hau ngüso goumchi aya akuo kiushi-e, ngüsoüh loühjam Yihudahai goumchi noksong nouso ai ‘APAOU nou apa noitsün asiothang nou Yirusalemhai asioking ouk lükiu ta ngio-e.’

²⁴Khaiuniahoi nouso Yihuda nai nungko noitsün noksong nouso ai kih-e, nungko eiu-atsünso, naiuso onnemok jimhoi onnemok hakü noi-e.

²⁵Sauhai tanatkü noin, ngü ngüso alo-i-e, naiuso sauhai naiusile nou tsaosilaokü noin, ngüso apem mongtsami-e.

²⁶Nungaito khaiuniahoi nousoüh, ‘Ngo saiküta oukong epkü chushin ta ngio-e.’

²⁷“Yihudahai naiuso Israelhai goumchi ngo thainian nou meankü taiu-e, nung atao nou shiji ta ngo, APAOU nou ngioji.

²⁸Ngo sheksan- tsün, laopengtsün, yakkantsün, lothetsün, naiuso tsümeikü kankei- shiau ngüso tü titi mongtsüokü noiküla, nungti ngü ngüso thomau naiuso sheksanau mongkiukü the-e.

²⁹Tilai nung atao shi-e, khaiuniahoi nou loto, ‘Posinyiu haiüh ehejek shep nou henou thsoso hou hamji,’ ta tsüngioshi-e.

³⁰Sauhaiüh sainaoshep ehejek nou he-e, apa hou hame, naiuso khaiunia pungkü meshen angei shioko eane.”

³¹Ngü Israelhai naiuso Yihuda- haiko athalou-e ayan tsak shanau atao tsak shiji ta APAOU nou ngioji.

³²Nungto ngü ngüso paosiposo Ijip ainou niasantsün taoko shantsün akeng athalou-e khekkü tsüde. Ngo ngüso thaiutha tsammongpo tsak khekkü noilüko, ngüsoüh nung athalou-e tsükankei.

³³Ngo Israel haiko ayan athalou-e shanau noitsün nungti noi-e: “Ngü jü ngiokhem ngüso da thiokiu-e, naiuso nung ngüso mongpem tü satlute.

³⁴Loto ngüso sauühtso meshen paosiposo tü APAOU nou lüngio ta tsütsandeshi-e, tiautenai ehenting ainou asongting saokü chiküüh ngo nge-e. Ngü ngüso angei wankiu-e naiuso ngüso aphio chhi nouso loto tsüyangsanshi-e, ta Ngo, APAOU nou ngiowaniu.”

³⁵APAOU nou anyi awon thaiutha aje, asoh awon thaiutha alei naiuso kianthsüo nouso kiuji. Apaüh khiamnok lothsümon küta ngao-iji. Apa nian Akongteng APAOU noin.

³⁶Asamsantsün si asungtsün noi nou lektso, Israel mele tsüomei-e ta Apaüh thalouji.

³⁷Litsüko maou athum thatsanau naiuso goumchi athanya yamchukhemau shiotünto, Israel khaiuniahoi chhi-tsümei lüko ngü ngüso lean-ela, ta APAOU nou ngioji.

³⁸“Jü noknio Yirusalem, Hananel Tsamthong ajenap ainou Aniokun Bekhan saokü shanshiau “atao nou shiji,” ta APAOU nou ngioji.

³⁹Naiuso elung nou nung ainou tsülaokü ajenap ainou Gareb king naiuso Goh lemkü noi-e.

⁴⁰Ee mea nouso lotaiutsün tsamei athum naiuso Kidron haiuthso ainou Ajenap ai mokthso Bekhan tü thalutkü tsamei nouso apem APAOU khako asio noi-e. Nung noknio loto tilaitso tsüsun- penge tsüdekünai tsüloutheshi-e.”