Read Khiamniungan Naga Yeremia 32 Bible Online

Yeremia 32 - Khiamniungan Naga bible

Yeremia 32

¹Yihudahai nokpao Zedekia nokshing pon che naiuso Babilonhai nokpao Nebukadnezar nokshing pon chekü petjei nouko nai APAOU ngio Yerimia dongai shin.

²Nung taoko Babilonhai nokpao süpaihoi nouso Yerusalem tü poh nungko ngo nokpao tsam pemongai akhothiotsün nai noiküla.

³Ngo nungko Nokpao Zedekiaüh khothiokü noiküla, naiuso ngotü “Babilonhai nokpao hau nung noknio komhean- i-e,

⁴küta nokpao Zedekia tsüthakhu-e ta APAOU nou ngioji ta mi lolut. Apa Babilonhai nokpao hau kiuwane, apaüh Babilonhai nokpao ko khasikha eppekü chite-e ta ngiom.

⁵Nokpao Zedekia Babilon nai kankü khuwane, naiuso ngü apa mosailukün lektso apa nung akho tsamko noi-e. Apa Babilon haiko ehli lüko, apaüh tsüshio-e ta Ngo, APAOU nou ngiowaniu.”

⁶APAOU nou ngo tü,

⁷Shallum thso, jüpo ehen nou Hananel, apa eiu Anathot nai Benjaminhai goh haoson mongko noitsün tuh au kojakü jü dongai shi-e, tiautenai nung jü thaiutha tuhlouau ayam nai ashimteng nou ngo noiküla.

⁸Nungai APAOU nou ngiotsünli, nung eiu tuhlouau ngo tü sangkü Hananel jü dongai nokpao kamai shin. Nungtiphe ngü APAOU nou ngoko atsüoteng chiten ta ngekü noiküla.

⁹Ngü Hananel ko eiu nou tuh, küta apa hau chai nou thatkiunai, amai nou tangkason anelang chekü chinyat sungkü noiküla.

¹⁰Ngü nung chhi nouko jü niansat thaolutkü mitha kiu, naiuso nung chai nou tsoi nai thatkiu.

¹¹Nungai atuhsan mitha sattsün, niansat thaolutkü taiutsün nemtso, naiuso thsam sübao sopankü noiküla, ngiokhem si don saisileli nungso hakü ngü loum;

¹²naiuso atuhsan mitha sattsün jüpo ehen nou thso Hananel khako naiuso mitha nouso khako, naiuso Yihudahai sauhai ajimtsün tsamai noiküla, ngüso chikü khako Maseia thso Neria thso nou Baruk hau kiu.

¹³Ngüso chikü khako ngü Baruk tü ngiom,

¹⁴“Akongteng APAOU Israel hai Goa nou atuhsan mitha sattsün, niansat thaolutkü taiutsün, naiuso asoppantaiu nou thsamsat, nung chhi nouso kankü khuau ngiokhem kium, naiuso nungso ashiau noitsün vetao thaiutha khemtaiu au pulak nai lataiu ta ngiom.

¹⁵Akongteng APAOU Israelhai Goa nou ngioji, tsam nouso, eiu nouso, naiuso sainaoshep eiu nouso nung goumchi nai müjam tuhloushi-e.”

¹⁶Atuh mitha sattsün ngo, Neria thso nou Baruk hau kiuwan küta misao sao;

¹⁷“Akhengteng APAOU, ni nou oukong asong tsangkü aün naiuso goum shan, athaiutha tsüshiokü ti tsünoi.

¹⁸Ni nou atsüojin hengsiheng hau hanji, lüko loüh posinyiuhai angei thaiutha ni ngüso hau angja kiuji. Ni asong naiuso oukong Goa, Akhengteng APAOU noin.

¹⁹Ni tangsangmeikü thatji, naiuso asong chhisiyaji, khaiunia nou chhitsün ni alum epji, naiuso ni ngüso chhi maikü ngüso alesan kiuji.

²⁰Atao laiukü khu-iu, ni Ijip nai ii naiuso oukong nouso chhin, naiuso lonyi saokü ni nung tsülaokü chhiji, nung chhi Israel nai naiuso amao mele nouso chikü ongko chhiküta lo ni apem nou ngekü noin.

²¹Ni ii naiuso athanga chhitsün tsangkü sam ehso lekkati, ni oukong naiuso akong kankeikü akhaiunia Israel hai Ijip ainou nialoukü shin.

²²Ni ngüso paosiposo tü thaloutaiutsünli, nung memei naiuso atsüomei goumchi nou ngüso hau kiu.

²³Lüko tilai ngüso nung goumchi nai napküta kihlou, ngüsoüh ni thoiluttsün angio tsü-ang, naiuso ni tsandetsün yam tsangkü kih au tsüshio, ni ngüso hau achhiau ngiokhem kiutsün ngüsoüh titso tsüchhi. Nungtiphe ni nungso alothe chikü ngüso khako kankü shin.

²⁴“Nung noknio thalouau Babilon- hai kamsanküta nung kom. Nungko ehli, naiusile, naiuso imkia akuo nou nung noknio ngüso phamongai napi. Nungko ni ngiotsün thawaokü shitsün apem ni eppe.

²⁵Noknio nouto Babilonhaiüh thalouwanau noilüko, nung eiu nou mithahoi khako lütuh ta ngiokhem kiutsün Akhengteng APAOU, ni noiküla.”

²⁶Nungaih APAOU nou ngo tü ngiom,

²⁷“Ngo APAOU, khaiuniale chikü ün Goa noin jü thaiutha tsüshiokü titso tsünoi.

²⁸Ngü nung noknio Babilonhai Nokpao Nebukad- nezar si apa süpaiso hau kiuwanau noin; ngüsoüh nung noknio

²⁹thalouküta nungtü in jeklut-e. Ngüsoüh nung noknio nai tsamkhaiu nouso chiai Baal hau ajahtsün chaithio kiu nou ngo mongmat-i, naiuso amao goa sotsom nouso hau theng chaithio kiutsünko aikü in nou jekthiowane.

³⁰Chongteng ngiolat yalounai yakü Israelhai si Yihudahaiüh ngüso chhi tsangkü ngo tsümongling-ikü shin.

³¹Nung noknio nai noitsün khaiuniahoi nou nung noknio shantsün ajekhaiu ainou ngo thsüokü mongmat-i. Ngo nung lotheanau thatsaniu

³²tiautenai Yihudahai naiuso Yirusalemhaiüh ngüso nokpao, aheihoi, mesonhoi, naiuso e-pohoi nousoko aikü chhi apem tsümeikü chhin.

³³Ngüsoüh ngo tü ngüso phi sheilut, ngü ngüso tü tsandelutkü noilüko, ngüsoüh tsü-ang naiuso tsüngelou.

³⁴Ngü- soüh Ngo amkhamau Amkham Tsam lahtaiu nai lüko achinyan sotsom nouso taiukü lochinyanji.

³⁵Ngüsoüh Hinnom Tsamei nai Baal tü amkhamau amthang nouso shan, küta Molek goa sotsom hau ngüso thsoso chaithio kiu. Ngü ngüso tü nung chhiau tsüthoilut, naiuso Yihudahai hau nungti angei sunhe- iau jü mongai ashitso tsüshi.”

³⁶APAOU Israelhai Goa nou ngo tü ngiom, “Yerimia, khaiuniahoi nousoüh nung noknio ehli, naiusile, naiuso imkia tsangkü Babilon hai Nokpao phamongai nappane ta ngioji. Lo, ngü ngioshiau noitsün tü anglu:

³⁷Jü amongkia si mongmat taoko, ngü ngüso kompengkü taiutsün goumchi chikü ainou ngüso niakame, ngüso nung athang nai niakü shi-e, küta ngüso nungko aaloukü kih-i-e.

³⁸Nungai ngüso jü khaiunia hau the-e, naiuso Ngo ngüso Goa hau the-e.

³⁹Ngüso si ngüso thsaosithsoso meiau, atao chikü nouko Ngo lon asuhat au, ngü ngüso aa nai mongyang tsaklu kiu-e.

⁴⁰Ngü ngüsoko athalou-e tsak shane. Ngü ngüso thaiutha amei chhitsün tilaitso tsülao-e, nungti ngüso ngü ainou tilaitso phoklekü tsükhuwan- shiau, ngü ngüso hau mongpem apem nou ngülon hat-i-e.

⁴¹Ngo ngüso thaiutha chhi amei chhisiyatsün nai amongtsam noi-e, naiuso ngüso nung goumchi nai asaita mongkü noi-i-e.

⁴²“Ngü nung khaiuniahoi nouso khako akuothe kankü shitsünli,

⁴³khaiuniahoi nousoüh nung goumchi khaiunia tsüdekünai thainian kih au tsüshiokün singtso goh tsakli iula-iküta nung Babilonhai hau kiuwane ta ngioji. Lüko nung goumchiko eiu nouso loühjam tuhsan shi-e.

⁴⁴Khaiuniahoi nou nung tuhlou-e, küta nung khaiuniahoi niansatkü, niansat nou thanglutkü, naiuso mitha nou kiukü taiu-e. Nung Benjaminhai goh haoson mongko, Yirusalem lemkü noitsün nok nouso ko, Yihudahai noksong nousoko, naiuso king goumchi nai noksong nousoko, naiuso Yihuda ajepekki nousoko thawaokü noiküla. Ngü ngüso goumchi nai ngüso akuo shanshi-e, ta APAOU nou ngiowaniu.”