Read Khiamniungan Naga Yeremia 33 Bible Online

Yeremia 33 - Khiamniungan Naga bible

Yeremia 33

¹Loüh ngü ajimtsün tsam akhothiotsün nai noi taoko, APAOU ngio jü dongai müjam shin.

²APAOU sauüh goumchi saikü kamshiküta nung athang yangkü taiu, apaüh ngo tü ngiom, Apa nian APAOU nou ngiom.

³“Ngo tü ajon, naiuso ngo nitü thala-e, ni tsünge- thiokün athanga chhi thaiutha ngü ni hau chite-e.

⁴Eh nou pohkü thalouwantsün shioko Yirusalemhai tsam naiuso Yihudahai nokpao tsam nyikü loiane ta ngo, APAOU Israel hai Goa nou ngioji.

⁵Ajantso Babilonhai thako eh li-e, naiuso ngü jü amongmat naiuso amongthe nou shiohattsün mea nousoüh tsam nou meane. Nung khaiunia nousoüh tsümei chhitsün shioko nung noknio ainou jükha phokleaniu.

⁶Lüko ngü nung noknio naiuso khaiunia nouso alomeiau kankü shikü ngüso lomei-e. Ngü ngüso hau nokmei naiuso saiukü aaloutsün hane.

⁷Ngü Yihuda naiuso Israel memei shankiu-e, naiuso ngüso ayanaililu shanshi-e.

⁸Ngüsoüh jü thako sunloutsün angei ainou ngü ngüso losang-e, naiuso ngüsoüh khengshitsün ngüso angei wankiu-e.

⁹Yirusalem nung jü thaiutha amongling, asuhat, naiuso akoi au nian tsak iula-e, naiuso ngü Yirusalem tü naiuso nungko kihtsün khaiunia nouso tü amei chhikiutsün naiuso nung noknio memei shankiu- tsün thaiutha lulanai, goumchi mele pungkü hatkü ngaongao-e!”

¹⁰APAOU nou ngiom, “Khaiunia nou nung athang khaiunia tsüdekünai thainian tsükihkün singtso goh tsak khekkü noin ta ngioji. Naiuso ngüsoüh thakü ngioji, tiautenai Yihudahai noksong nouso naiuso Yirusalem yamkheng nouso khaiunia tsüdekünai thainian tsütsakeikü akeng noin. Lüko nung athang nouso ko,

¹¹amongling ngem sang naiuso tsamsigoh shan sümai akoihetsün sang nouso asamüh müjam lushi-e. Khaiuniahoi nousoüh jü Amkham Tsamai nianlom chaithio kiutsün jihang sang nouso lushi-e küta ngüsoüh ngio-e, ‘Akongteng APAOU hau nianlom lükiu; tiautenai apa amei noin naiuso apa atsüojin athontsüyang.’ Ngü nung goumchi nung thaiuko lilu memei shanshi-e ta Ngo, APAOU nou ngiowaniu.”

¹²Akongteng APAOU nou ngiom, “Nung khaiunia tsüdekünai thainian tsükeitsün singtso goh tsak khekkü nouko, loühjam khengliu samsanshi- e, küta onnemok jimhoi nousoüh ngüso onnemok nungai niathioau shio-e.

¹³King goumchi noksong nousoko, kinghok nousoko, ajepekki Yihuda nai, Benjamin goumchi haosonko, Yirusalem lemkü noitsün nok nousoko, Yihudahai noksong nousoko, onnemok jimhoi nousoüh ngüso onnemok loühjam welushi-e, ta Ngo, APAOU nou ngiowaniu.”

¹⁴APAOU nou ngioji, “Ngo Israelhai si Yihudahai tü thaloutaiutsün thawao au atao nou shiji.

¹⁵Nung taoko nai ngü David kau ainou asio nokpao tsak chosane. Nung nokpao nouto goumchi nai ngiotsüo naiuso asio nou chhi-e.

¹⁶Yihuda naiuso Yirusalemhai kipsankü aalou nai kih-e. Naiuso nung Noknio noutü, ‘APAOU sam kipsantsün,’ ta jone.

¹⁷Ngo, APAOU nou David kau ainou asaita Israelhai nokpao tsak sungi-e ta thalouji.

¹⁸Naiuso Ngo ajah chaithio nouso, chih chaithio nouso, naiuso aloat chaithio nouso, kiukü yathsüoau Levi kau ainou meson asaita noi-e.”

¹⁹APAOU nou ngo tü ngiom,

²⁰“Ngü anyi si asoh asaita ngüsoüh momo atao tongtü kankeiau athalou-e tsak shaniu, naiuso nung athalou-e tilaitso lopaiau tsüshio.

²¹Nung khekkü ngo yathsüotsün David ainou asaita nokpao tsak noi-e ta ngü athalou-e tsak shaniu, naiuso Levi kau nou mesonhoi ayathsüo chhi chhiau ngü athalou-e tsak shaniu, loüh nung athalou-e tilaitso lopaiau tsüshio.

²²Ngo yathsüotsün David thsaosithso naiuso Levi kau ainou meson nouso ngü haowe nai singkü iula-i-e, nungti maou nai kianthsüo nouso tsüdekünai haiusai nai singtso nouso khekkü ngüso tü weau tsüshio-e.”

²³APAOU nou ngo tü ngiom,

²⁴“Ngü Israel naiuso Yihuda, ngü chosan- tsün pothsoneüh tsüloukü leaniu ta khaiuniahoi nou ngiotsün ni iilamo? Nungti ngüsoüh jü khaiunia lean, nungshioko ngüso khako mele tsak tsüwesanshi.

²⁵Lüko ngo, APAOU nou, anyih naiuso asoh nouko athalou-e tsak noin, naiuso ngü goh si maou thatsamtsün ngiokhem nouso shan.

²⁶Naiuso ngü atsüoteng chhikü shitsünli, jü athalou-e Yakob thsaosithsoso naiuso ngo yathsüo- tsün David ko taiu-e. Abraham, Isak, naiuso Yakob thsaosithsoso khako nokshingau ngü David thsaosithsoso ongko tsak chosane. Ngü jü khaiuniaso tü atsüojinyang noi-e, naiuso ngüso loüh tsüomeikü shanshi-e.”