Read Khiamniungan Naga Yeremia 34 Bible Online

Yeremia 34 - Khiamniungan Naga bible

Yeremia 34

¹Tilai Babilonhai nokpao Nebukadnezar naiuso apa süpai hoiso tü apa khemko noitsün mele naiuso khaiuniale chikü ainou hachukü Yirusalem si nungko shimkü noitsün noksong nouso komkü noiküla, APAOU nou ngo tü

²APAOU Israelhai Goa nou khuküta Yihudahai nokpao Zedekia tü nung ngio ngioau ngiom, “Ngo APAOU nou nung noknio Babilonhai nokpao phamongai kiuwane, naiuso apaüh nung jekthio wane.

³Ni tsüthakhu-e; ni thalouküta apa phamongai lethiowane. Ni apako khasikha eppe-e, naiuso akhotsam nai apako chite-e, nungphiai ni Babilon nai khu-e.

⁴Zedekia, ngü athaiutha ti ngioji, aanglu, ni ehlithang nai tsüloat-e.

⁵Ni aaloukü eane, naiuso akhako nokpao nouso apaosiposo khantsün tao khaiuniahoi nou angannyam jahtsünli, athaiutha ngüsoüh angannyam nou jah-e. Ngüso athaiutha ‘Sam Nokpao Eaniu! ta ngiokü mongsaiu-e,’ ta ngo, APAOU nou ngiowaniu.”

⁶Nungaih ngü nung ngiongem Yirusalem nai Nokpao Zedekia hau kiu;

⁷nung taoko Babilonhai Nokpao süpaihoi nou noknio nou komkü noiküla. Yihuda nai meikü pejeikü taiutsün apoi noknio nime Lakish naiuso Azeka lüko süpaihoi nousoüh koman.

⁸Nokpao Zedekia si Yirusalem khaiuniahoi nousoüh meshen khaiu- nia Israelhai ongko sua taiutsün shikü

⁹ngüso ün Ibrihai melo si menyiu sua nouso jashiau ngiomong shinge tsak shan.

¹⁰Khaiunia chikü naiuso ngüso aheihoi nousoüh loto tilaitso müjam sua tsütaiu shikü jashiau mongchiosan. Nungtili ngüsoüh sua nouso jashi.

¹¹Lüko phikü ngüso mongyang li-eshiküta ngüsoüh jashitsün sua nouso loüh müjam sua au iula-ishi.

¹²Nungai APAOU,

¹³Israelhai Goa nou khaiuniahoi nouso hau chite au ngo tü ngiom, “Ngü asam paosiposo Ijip sua ainou niasankü jashitsün taoko ngüsoko athalou-e tsak shan. Ngü ngüso tü

¹⁴Ibri hai sua saulünou pon luok yathsüoküta pon chinyat pungkü nouko ngüso jashiau noin. Lüko asam paosiposoüh ngo tü mong- tsükiu tsüdekünai ngü ngiotsün tü tsü-ang.

¹⁵Ajekhaiu thsaothsaokü khako asam mong li-eshiküta asamüh ngo mongtsamtsün chhin. Asam chiküüh meshen khaiunia Is- raelhai jashiau mongchiokü, asamüh ngo tü amtsün Amkham Tsam nai jü khako athalou-e tsak shan.

¹⁶Lüko loüh asam mong li-eshikü jünian lochikiu. Asam chiküüh mongchio- sankü jashitsün laokü loshiküta ngüso loüh sua akuo nai kojakü napishi.

¹⁷Nungtiphe lo, Ngo, APAOU tü, asamüh angio tsü-ang; asamüh meshen khaiunia Israelhai jashiau tsümongchio. Naito, thatü mein, ngü asam hau asam chija theau nou nung: ehli tsangkü eau, imkia tsangkü eau, naiuso naiusile tsangkü eau kiu-e. Ngü asam tü chhitsün tsangkü goumchiko mele pungkü lekkat-iau shane.

¹⁸Yihudahai naiuso Yirusalemhai asong, Nokpao tsamai asonghoi, meson nouso, naiuso aheihoi nousoüh jangtso pong loatküta hethatkü ee nime jetko tsakeikü khutsün tsangkü ngüko athalou-e tsak shan. Lüko ngüsoüh nung athalou-e lothe naiuso angiotsün tsükankei. Nungtiphe ngü nung khaiunia nousoüh jangtsopong nou tü chhitsünli nung khaiunia nouso tü chhi-e.

²⁰Ngü ngüso loatau aiutsün ngüso ehso hau kiuwane, naiuso ngüso mea liuwaio nouso si liu thainian nousoüh he-ane.

²¹Naiuso ngü loüh Yihudahai nokpao Zedekia naiuso apa khemko asonghoi nouso ngüso loatau aiutsün Babilonhai süpaihoi hau kiuwane.

²²Ngü ngüso hau ngiokhem kiuküta, ngüso nung noknio nai laokü shi-e. Nungko ngüsoüh nungtü pha poh-e, naiuso thalou-e, küta nung jekthiowane. Ngo Yihudahai noksong nouso sau kihau tsüshiokün singtso goh tsak khekkü shane, ta Ngo, APAOU nou ngiowaniu.”