Read Khiamniungan Naga Yeremia 35 Bible Online

Yeremia 35 - Khiamniungan Naga bible

Yeremia 35

¹Yihudahai nokpao Josia thso nou Jehoiakim taoko, APAOU nou ngo tü ngiom,

²“Lükhu, küta Rekab kau mepemhoi nousoko lüchite. Naiuso Amkham Tsam nai tsampai tsak ko niathio küta theng intso lüshen.”

³Nungtiphe ngo Habbazzima thso nou Yerimia thso Jazania, naiuso apa deisinioso si melothso nouso naiuso Rekab kau athum nialou,

⁴küta ngüso Amkham Tsamai nialoukü shin. Ngü ngüso Igdalia thso nou e-po Hanan sahoiso tsampai ai niathio. Nung tsampai nou Shallum thso nou Maaseia, sau Amkham Tsam nai asonghoi ongko ateng tsak noiküla, apa tsampai khengko amao asonghoi nouso tsampai shimkü noiküla.

⁵Nungai ngü thengkam naiuso chiu nouso theng nou meankü Rekab hai khako taiukiu küta ngüso tü, “Theng intso lüshiu,” ta ngiom.

⁶Lüko ngüsoüh thalan, “Samüh theng tsüshiuji. Sam paosipo Rekab thso nou Jonadabüh sam tü sam si asam thsaosithsosoüh tilaitso theng tsüshiuau ngiom.

⁷Apaüh sam tü tsam nouso lalah, tsüdekünai eiu nouso la-ah, naiuso sainaoshep ao lathom, tsüdekünai nungso latuh ta ngiom. Apaüh sam tü asaita nejenkhio nai kih au thoilut, nungti sam nung goumchi nai mesanhai khekkü kihji.

⁸Jonadabüh sam hau kiutsün ayamhan apem samüh angio angkü noin. Sam pemüh, sam tsam- mongnyiusoüh, sam thso melothso si menyiuthso nousoüh tilaitso theng tsüshiu.

⁹Samüh akih au tsam tsülahji-sam nejenkhio nouso nai kihji-naiuso samüh sainaoshep eiu, eiu nouso, tsüdekünai chihsikhiam lethiokü tsü-ahji. Sam paosipo Jonadabüh sam tü thoiluttsün samüh alum thumkü angkü noin.

¹¹Lüko Nokpao Nebukadnezarüh sam shingkhannio komheantsünko, sam Babilonhai si Siriahai süpaihoi ainou thakhuau samüh Yirusalemai shiau thatloum. Nungshioko sam lo Yirusalem nai kihkü noin.”

¹²Nungai Akongteng APAOU Israelhai Goa nou, ngo tü Yihudahai si Yirusalemhai tü khukü ngioau ngiom, “Ni tiauta jü ngio naiuso jü ayamhan nouso tü ang-au tsü-aiu, ta ngo, APAOU nou ni tü sangji.

¹⁴Jonadab thsaosithsosoüh theng tsüshiuau apa athoilut angio ang, naiuso nung ajekhaiu tü thalutkü ngüso sauühtso ti tsüshiu. Lüko ngo asam tü chitelutkü noilüko, asamüh jü ngio tsü-ang.

¹⁵Ngü, ngo yathsüotsün e-pohoi nouso tsülaokü hongkü, ngüsoüh asam tü amao goa nouso la-amkham naiuso layathsüo ta lotsüokiu. Lüko asamüh jü ngio tsü-ang, naiuso ngo tü mongtsükiu.

¹⁶Jonadab thsaosithsosoüh ngüso paosiposoüh thoiluttsün angio-ang, lüko asamüh to jü ngio tsü-ang.

¹⁷Nungtiphe lo, ngo, APAOU, Akongteng Israelhai Goa üh ngü thaloukü taiutsün alothe apem asam Yihudahai si Yirusalemhai khako kankü shi-e. Ngü nung chhi-e tiautenai ngo asamko chitetsün taoko asamüh ngo tü tsü-anglu, naiuso ngü asam tü jontsün taoko asamüh ngo tü tsüthala.”

¹⁸Nungai ngü Rekab kau hau APAOU, Akongteng, Israelhai Goa nou ngiotsün chiten, “Asam paosipo Jonadabüh asam hau kiutsün athoilut asamüh angio ang, asamüh ayamhan chikü ko hoilut, naiuso apaüh asam tü thoiluttsün alum asamüh chhin.

¹⁹Nungtiphe ngo, APAOU, Akongteng Israelhai Goaüh Rekab thso Jonadab thsaosithsosüh ngo yathsüoau melo tsak asaita noi-e.”