Read Khiamniungan Naga Yeremia 36 Bible Online

Yeremia 36 - Khiamniungan Naga bible

Yeremia 36

¹Josia thso nou Jehoiakim, Yihuda nai nokpao tsaloukü pon püle nouko nai APAOU nou ngo tü ngiom,

²“Thsamlai tsak lülou küta ngü nitü Israel naiuso Yihuda thaiutha naiuso mele apem thaiutha ngiotsün alum lüsat. Nokpao Josia ainou losaokü nouko ngü nitü chongteng chitetsün atao ainou alum lüsat.

³Tsüngean, Yihudahai üh ngüso khako ngü alothe kankü shiau noitsün ayangtaiu chikü thaiutha lulakü ngüso yam tsümeikün ainou phokle-e sao. Nungaito ngü ngüso aphio naiuso angei nouso wankiu-e.”

⁴Nungtiphe ngü Neria thso nou Baruk jonshiküta ngo tü APAOU nou ngiotsün alum ngiothankü satlo-i. Naiuso Baruküh nungso apem thsamlai tsakko satthio.

⁵Nungai ngü Baruk hau ayamhan ajantso kiu: “Ngo Amkham Tsamai tsüshi-ikü kiapan.

⁶Lüko ngü ni nungthan taoko khaiuniahoi nousoüh keithon- tsün nai khu-iau mongchioji. Ni ngüso hau thsamlai nou sang songkü lüvede. Nungaito ngüsoüh APAOU nou ngo tü ngiothankü sattaiu nou alum lula-e. Yihudahai sauhai ngüso noksongso ainou shikü noin nungso mongchiohakü khaiunia pungkü nou lula au shiotsün nai ni nung lüwede.

⁷Tsüngean ngüsoüh APAOU nou tü misaoküta ngüso angei ainou mongphokle-e, tiautenai APAOU nou nung khaiunia nouso apa athsüoteng amongmat tsangkü lohatkü noin.”

⁸Nungtiphe Baruküh APAOU ngio nou ngü apa tü ngiotsünli tongtü Amkham Tsam nai wede.

⁹Yihudahai nokpao Jehoiakim nokshing pon pungo alei lükao nouko nai khaiuniahoi nousoüh APAOU ün atsüojinyang lesanau keithon lokü noiküla. Nung keithon misao nouko Yirusalem nai kitsünso chikü naiuso Yihudahai noksong nouso ainou shitsünso chikü nou lukü noi.

¹⁰Nungai, khaiunia chikü nou anglukü noitsün taoko, Baruküh Thsamlai ainou ngü ngiotsünli alum wede. Apaüh nung Amkham Tsam nai Shefan thso nou Gemaria, sau mikhem nai asat noiküla, apa tsampai ai chhin. Apa tsampai nung asungthun mikhem puo amkham Tsam Bekhan Ayan nai naptsün shimkü noiküla.

¹¹Tilai Shefan thsao Gemaria thso nou Mikaiaüh Thsamlai nai Baruküh APAOU nou ngiotsün wedekü lula,

¹²nungai apa nokpao tsamai khukü mikhem nai asat thetsün tsampai sübao nai asonghoi nouso chikü ngiokam noiküla nungko nap. Mikhem nai asat thetsün Elishama, Shemaia thso nou Delaia, Akbor thso nou Elnathan, Shefan thso nou Gemaria, Hanania thso nou Zedekia, naiuso amao asonghoi nouso chikü nungko noiküla.

¹³Baruküh khaiu- niahoi nouso hau wedekü apaüh lulatsün alum Mikaiaüh ngüso hau chiten.

¹⁴Nungai asonghoi nousoüh Shemaia thsao Nethania thso nou Jehudi nung khaiuniahoi nouso hau wedetsün thsamlai nou kankü ashi ta Baruk tü ngioau hong. Nungai Baruküh thsamlai nou ngüso dongai kankü shin.

¹⁵Ngüsoüh apatü ngiom, “Mokkü anoi,” “küta nung thsamlai nou sam hau awede.” Nungtiphe Baruküh nung wede.

¹⁶Apaüh nung wedeküta phiai, ngüso tsüoloukü tsaksitsak thape, küta Baruk tü ngiom, “Samüh nung nokpao hau chite au noin.”

¹⁷Nungai ngüsoüh apatü sangkü ngiom, “Nung chikü ni titi satkü shin, sam hau lo achite. Yerimiaüh nitü ngiothankü chhin süne?”

¹⁸Baruküh thala, “Yerimiaüh nung ngio auo pungkü ngo tü ngiothan kiuküta ngo nung thsamlai nouko thsamsat khiam nou satkü noin.”

¹⁹Nungai ngüsoüh apatü ngiom, “Ni naiuso Yerimia aje khuküta pamanau noin. Aje tiai noin nung sau hau lüko lange-i.”

²⁰Asonghoi nousoüh nung thsamlai mikhem nai asat thetsün Elishama tsampai ai taium ta ngüsoüh nokpao hau alum chiten.

²¹Nungai nokpao nou nung thsamlai kankü shiau Jehudi hongküta apaüh nung Elishama tsampai ainou kankü shikü nokpao naiuso asonghoi nouso apem sauhai nungko apa lemkü tsakü noiküla, ngüso hau wede.

²²Nung chongtaophe, nokpao nou apa chongtaoko noitsün nokpao tsam nai in lamhekü moknoi.

²³Jehudiüh nung ngioyak aling süme tsüdekünai püle thatso khemsikhemkü nokpao nou sah ehenthso tsaküh nung hene naiuso nungso in nai yakthiowan. Apaüh nung thsamlai athum mochethekhemkün lektso chhikü noiküla.

²⁴Nokpao tsüdekünai apa khemko asonghoi nousoüh nung lula lüko ngüsoüh amonghen ii titso tsühan.

²⁵Elnathan, Delaia, naiuso Gemariasoüh nokpao tü thsamlai nung lajah-an ta koja lüko apaüh ngüsotü tsü-anglu.

²⁶Nungai nokpao thso Jerameel ko hakü Azriel thso Seraia, naiuso Abdiel thso nou Shelemia sotü ngo ko jü asat Baruk hakü kelouau ngiokhem kiu. Lüko APAOU nou sam tsangkü wanan.

²⁷Nokpao Jehoiakimüh ngü Baruk tü ngiothankü sattaiutsün thsamlai nou jahthiowankü phiai, APAOU nou ngo tü

²⁸ayanai satkü shitsünli amao thsamlai satshiau alo küta nungko asat ta ngiom.

²⁹APAOU nou ngo tü nokpao tü nungti lüngio ta ngiom, “Ni thsamlai nou jahthiowan, naiuso ni Yerimia tü Babilonhai nokpao shiküta nung goumchi naiuso nungko noitsün khaiuniahoi naiuso thainiahoi lomowane ta tiauta sang.

³⁰Nungtiphe Nokpao Jehoia- kim, athsaosithsoso tilaitso David nokshing nai nokpao tsütheha-e, ta Ngo, APAOU, nou nitü ngioji. Naiuso amea anyi alam taoko naiuso asoh chongtaoko kengpun nai yakkane.

³¹Ni angei nouso mosunloutsün thaiuthako ngü ni naiuso akhemko noitsün asonghoi nouso naiuso athsaosithsoso hau angja kiu-e. Ni, Yirusalemhai naiuso Yihudahaiüh jü alotsüo nouso tü mongtsükiu, nungti- phe ngü lohatkü shitsün akuothe nouso chikü akhako kankü shi-e.”

³²Nungai ngü amao thsamlai tsak loküta jü asat Baruk hau kiu, naiuso apaüh jü ngiothan alum nungko satthio. Ayating thsamlai nai satküshitsün alum apaüh sat naiuso nung apatü ngiothan ngiongem ngü kiutsün khekkülu noiküla.