Read Khiamniungan Naga Yeremia 37 Bible Online

Yeremia 37 - Khiamniungan Naga bible

Yeremia 37

¹Babilon hai Nokpao Nebukad- nezarüh Yihudahai nokpao au, Jehoiakim thso nou Jehoiachin liko Josia thso Zedekia the-i.

²Lüko Zedekia, apa khemko asonghoi nouso, naiuso khaiuniahoi nousoüh APAOU nou ngo hau kiutsün ngiongem tü tsü-ang.

³Nokpao Zedekiaüh Shelemia thso nou Jehukal naiuso Maseia thso nou meson Zefania ne sam mele thaiutha APAOU sam Goa tü misao ngo hau lokiu-iau jü dongai hong.

⁴Nung taoko ngo akhotsamai mothiowankü khaiuniahoi ongko ti ayangelat tsü- noikü tsakeikü noiküla.

⁵Babilonhai süpaihoi nousoüh Yirusalem thaloukü noitao tilai ngüsoüh Ijip süpaihoi nousoüh elung yananiu ta lula, ngüso phiai soikü shin.

⁶Nungai APAOU Israelhai Goa nou ngotü,

⁷Zedekia tü ngioau ngiom “Ijip hai süpai sauhai ni halouau shin, lüko ngüso laolokü khuwanshi- e ta noin.

⁸Nungaito Babilonhai laolokü shishikü nung noknio tü po-e, naiuso thalouküta in nou jekthiowane.

⁹Babilon hai laokü tsüshishi-e ta yangtsün ko ni achija lasapthio, tiautenai ngüso laokü shi-e ta Ngo APAOU nou lotsüoji.

¹⁰Babilon hai süpaihoi athum shioloukü, atawaihoi nousolu poikü, ngüso nejenkhio nai saikü noian lüko, nung khaiunia nouso thsüoshiküta nung noknio pukhao au iulakü jekthiowane.”

¹¹Babilon hai süpaihoi Yirusalem ainou soikü khu, tiautenai Ijip hai süpaihoi shisaowankü noiküla.

¹²Nungtiphe ngo Yirusalem lean- küta jü haoson nou tsammonghai ün tengkam louau Benjaminhai gohthang ai khu.

¹³Lüko tilai ngo Benjamin Bekhan shisaom, nungko ehü nai tsakü noitsün süpai asong tsak nian nou Irija, sau Hanania thsao Shelemia thso, ngo loyangküta ngiom, “Ni Babilonhai dongai khulükhunanji!”

¹⁴Ngü thalan, “Nungti tsüde! Ngo tsükhulut.” Lüko Irijaüh ngotü tsü-anglu. Nungliko apaüh ngo kelouküta asonghoi nouso dongai kankü khu.

¹⁵Ngüso ngo ko thatü mongmatkü ngo tü woi-i naiuso akhotsamai thetsün, mikhem nai asat thetsün Yonathan tsamai khowan.

¹⁶Ngo goh khei ai khan tsakko atao laiukü wanan.

¹⁷Phikü nokpao Zedekiaüh ngo jonau hong küta niasankü apaüh ngotü nokpao tsamai tengkhaiukü sangkü ngiom, “APAOU ainou ngiongem tso noimo?” “Noin,” ta ngü thala, naiuso ngioshin, “Ni Babilonhai Nokpao phamongai thumkü kiuwane.”

¹⁸Nungai ngü sangshin, “Asamüh ngo akho tsamai thioau, ngü asam thako, asonghoi thako, tsüdekünai khaiuniahoi thako ti aphio chhikü noin?

¹⁹Asam tü Babilonhaiüh asam si asam shingkhannio tsükome ta ngiotsün asam e-po nouso tü ti thawao?

²⁰Naiuso lo Asuhatkü noitsün Nokpao, ngü nitü ti sangji nungtü a-anglu ta kojaji. Tsüojinyangkü ngo Yonathan ün tsam sübao akhotsam noin nungai laokü lahongshi. Ni hongshi naito, ngo atsüoteng nungko eane.”

²¹Nungtiphe Nokpao Zedekiaüh ngo nokpao akhotsam nai khukü wanan. Ngo nungko noitaoko noknio nai asaisantsün themtsai mokhemkün lektso ngüsoüh ngo hau ajekhaiu pungkü themtsai tsak tsak kiu.